SBI કે પોસ્ટ ઓફિસ, FD પર કોણ આપી રહ્યું છે વધુ વ્યાજ? જાણો વિગતો
છેલ્લું અપડેટ : 22 Feb 2025
શેરબજાર અને મ્યુચ્યુઅલ ફંડમાં વળતરની અનિશ્ચિતતા વચ્ચે અનેક લોકો આજે પણ, એફડીને રોકાણનું શ્રેષ્ઠ અને સલામત માધ્યમ માને છે. ભારતીય શેરબજારમાં મહિનાઓથી ચાલી રહેલા ભારે ઘટાડાએ સામાન્ય રોકાણકારોની ઊંઘ હરામ કરી દીધી છે. આવી સ્થિતિમાં, બજારથી મોહભંગ થયેલા રોકાણકારો ફરી એકવાર બેંક એફડી તરફ પાછા ફરી રહ્યા છે. દેશની તમામ સરકારી અને ખાનગી બેંકોની સાથે, પોસ્ટ ઓફિસ પણ તેના ગ્રાહકોને FD પર ભારે વ્યાજ આપી રહી છે. આજે આપણે અહીં જાણીશું કે સ્ટેટ બેંક ઓફ ઈન્ડિયા (SBI) અને પોસ્ટ ઓફિસમાંથી કોણ ફિક્સ્ડ ડિપોઝિટ પર વધુ વ્યાજ આપી રહ્યું છે.
સ્ટેટ બેંક ઓફ ઇન્ડિયા (SBI)
સ્ટેટ બેંક ઓફ ઈન્ડિયા દેશની સૌથી મોટી સરકારી બેંક છે. આ બેંક તેના ગ્રાહકોને FD પર 3.50 ટકાથી 7.25 ટકા સુધીનું વ્યાજ આપી રહી છે. SBI તેના ગ્રાહકોને 1 વર્ષની FD પર 6.80 ટકા, 2 વર્ષની FD પર 7.00 ટકા, 3 વર્ષની FD પર 6.75 ટકા, 4 વર્ષની FD પર 6.75 ટકા અને 5 વર્ષની FD પર 6.50 ટકા વ્યાજ આપી રહી છે. આ બધી FD યોજનાઓ પર SBI 60 વર્ષથી વધુ ઉંમરના લોકોને 0.50% વધારાનું વ્યાજ આપી રહી છે.
પોસ્ટ ઓફિસ
બેંકોની જેમ, પોસ્ટ ઓફિસ પણ તેના ગ્રાહકોને FD ખાતું ખોલવાની સુવિધા પૂરી પાડે છે. પોસ્ટ ઓફિસમાં, FD ને ટાઈમ ડિપોઝિટ એટલે કે TD તરીકે ઓળખવામાં આવે છે. પોસ્ટ ઓફિસમાં ઓછામાં ઓછા 1 વર્ષ અને વધુમાં વધુ 5 વર્ષ માટે TD કરી શકાય છે. પોસ્ટ ઓફિસ 1 વર્ષના TD પર 6.9 ટકા, 2 વર્ષના TD પર 7.0 ટકા, 3 વર્ષના TD પર 7.1 ટકા અને 5 વર્ષના TD પર 7.5 ટકા વ્યાજ આપી રહી છે. બેંકોથી વિપરીત, પોસ્ટ ઓફિસ વરિષ્ઠ નાગરિકોને કોઈ વધારાનું વ્યાજ આપતી નથી. પોસ્ટ ઓફિસમાં બધાને સમાન વ્યાજ આપવામાં આવે છે.
