હોટલ તાજના ગેટ પર સૂતા કૂતરાની તસવીર થઈ વાયરલ, મેનેજમેન્ટે જણાવ્યું આવું કારણ

લક્ઝરી અને સ્વચ્છતા માટે જાણીતી ફાઈવ સ્ટાર હોટલમાં જો તમે રખડતા કૂતરાઓ જુઓ છો, તો શક્ય છે કે તે હોટલ પ્રત્યે તમારો દ્રષ્ટિકોણ બદલાઈ શકે છે. જો તે હોટલ તાજ હોય તો તમે તેના પર વિશ્વાસ નહીં કરી શકો. પરંતુ તાજ હોટલ સાથે જોડાયેલ એક દ્રશ્ય કંઈક અલગ જ કહાણી કહી રહ્યું છે. તાજ હોટલની આવી તસવીર સોશિયલ મીડિયામાં સામે આવી છે, જેને જોઈને લોકો રતન ટાટાના વખાણ કરતા થાકતા નથી.

હોટલ તાજના દરવાજે સૂતો કૂતરો

હોટલ તાજના વેલકમ ગેટ પર સૂતા કૂતરાનો ફોટો અત્યારે સોશિયલ મીડિયામાં વાયરલ થઈ રહ્યો છે. HR મેનેજર રૂબી ખાને આ ફોટો શેર કર્યો છે. આ તસવીર જોયા બાદ દરેક લોકો રતન ટાટાની મહાનતાના વખાણ કરી રહ્યા છે. રૂબી ખાને તેના LinkedIn પેજ પર તાજ હોટલની અંદરની તસવીર શેર કરી છે. ફોટામાં, એક કૂતરો ગેટ પાસે શાંતિથી સૂઈ રહ્યો છે. ન તો કોઈ ગાર્ડ કે કોઈ સ્ટાફ તેને ત્યાંથી હટાવતો દેખાય છે.

કૂતરા માટે ખુલ્લા રહે છે તાજ હોટલના દરવાજા

રૂબીએ પોતાની પોસ્ટમાં લખ્યું કે, જ્યારે તેણે હોટલ તાજના સ્ટાફને કૂતરા વિશે પૂછ્યું તો તેને ખબર પડી કે તાજની કૂતરાઓને પરેશાન ન કરવાની નીતિ છે. તાજના દરવાજા કૂતરાઓ માટે ખુલ્લા રહે છે. કોઈ તેમને મારતું નથી કે દૂર પીછો કરતું નથી. જે હોટલમાં દેશ-દુનિયાના મોટા-મોટા મહેમાનો આવે છે અને રોકાય છે ત્યાં કૂતરાઓને પણ સમાન સન્માન મળે છે. અહીં મહેમાનોનું ખુલ્લા દિલથી સ્વાગત કરવામાં આવે છે પરંતુ પ્રાણીઓને પણ ખૂબ મહત્ત્વ આપવામાં આવે છે.

રતન ટાટાનો ખાસ ઓર્ડર

રતન ટાટાનો અબોલ પ્રાણીઓ માટેનો પ્રેમ કોઈનાથી છૂપો નથી. તેમને ખાસ કરીને શ્વાનનો શોખ છે. તાજેતરમાં તેમણે કૂતરાઓ માટે મલ્ટિ સ્પેશિયાલિટી હોસ્પિટલ ખોલી છે. તેમણે હોટલ તાજમાં કૂતરાઓ સાથે દુર્વ્યવહાર કરવાની સખત મનાઈ ફરમાવી છે. હોટલના સ્ટાફનું કહેવું છે કે, રતન ટાટાએ સ્પષ્ટ નિર્દેશો આપ્યા છે કે પ્રાણીઓને કોઈપણ પ્રકારની સમસ્યાનો ન થવી જોઈએ. માત્ર ટાટાની હોટલોમાં જ નહીં પરંતુ ટાટાની ઓફિસોમાં પણ પ્રાણીઓ સાથે ખરાબ વ્યવહાર કરવામાં આવતો નથી. રતન ટાટાએ પોતાના ઘરમાં ઘણા કૂતરા પાળ્યા છે. તેમને કૂતરા અને અબોલ પ્રાણીઓ પ્રત્યે ખાસ લગાવ છે.