કેન્દ્રીય કર્મચારીઓને ટૂંક સમયમાં મળશે ભેટ! દિવાળી પહેલા આટલું DA વધારી શકે છે સરકાર, જાણો વિગતો

મોદી સરકાર દિવાળી પહેલા કેન્દ્રીય કર્મચારીઓ માટે મોંઘવારી ભથ્થા (DA)માં 3 ટકા વધારાની જાહેરાત કરી શકે છે. અગાઉ એવા અહેવાલ હતા કે, કેન્દ્ર સરકાર 9 ઓક્ટોબરે કેન્દ્રીય કેબિનેટની બેઠક બાદ વધારાની જાહેરાત કરી શકે છે. જોકે, હવે એવા સંકેત મળ્યા છે કે ઓફિશિયલ એનાઉન્સમેન્ટ દિવાળીની ઉજવણીની નજીક આવી શકે છે. તહેવારના થોડા દિવસો પહેલા મળનારી કેબિનેટની આગામી બેઠકમાં ડીએમાં વધારાનો નિર્ણય લેવામાં આવી શકે છે. કેન્દ્ર સરકારના કર્મચારીઓને દિવાળી પર મોટું બોનસ મળવાની શક્યતા છે કારણ કે સરકાર મોંઘવારી ભથ્થા (DA)માં 3% વધારાની જાહેરાત કરી શકે છે. ઓફિશિયલ એનાઉન્સમેન્ટ દિવાળીની ઉજવણીની નજીક આવી શકે છે, જે 31 ઓક્ટોબરે યોજાનાર છે.

વર્ષમાં બે વાર વધે છે મોંઘવારી ભથ્થું

મોંઘવારી ભથ્થાની ગણતરી ઓલ ઈન્ડિયા કન્ઝ્યુમર પ્રાઈસ ઈન્ડેક્સ (AICPI)ના આધારે કરવામાં આવે છે, જે રિટેલ ભાવની વધઘટને ટ્રેક કરે છે અને વર્ષમાં બે વાર તેમાં સુધારો કરવામાં આવે છે. ડીએમાં વધારો એટલે સરકારી કર્મચારીઓના વેતનમાં વધારો, એવા સમયે જ્યારે મોંઘવારીનો દર લોકો પર ભારે પડી રહ્યો છે.

વધીને 53 ટકા થશે મોંઘવારી ભથ્થું

હાલ મોંઘવારી ભથ્થું 50% છે પરંતુ જો સરકાર આ યોજના સાથે આગળ વધે છે તો 1 જુલાઈ, 2024થી નવો દર વધીને 53% થઈ શકે છે. આનાથી કેન્દ્ર સરકારના એક કરોડથી વધુ કર્મચારીઓ અને પેન્શનરોને ફાયદો થવાની સંભાવના છે અને કર્મચારીઓને જુલાઈ, ઓગસ્ટ અને સપ્ટેમ્બર મહિનાનું એરિયર્સ પણ મળશે.

હિમાચલે ડીએમાં કર્યો 4 ટકાનો વધારો

ગયા વર્ષે, સરકારે તહેવારોની સિઝન પહેલા જ મોંઘવારી ભથ્થામાં વધારો કરવાની એનાઉન્સમેન્ટ કરી હતી. અગાઉ, દશેરા પહેલા, હિમાચલ પ્રદેશ સરકારે દિવાળી પહેલા તેના કર્મચારીઓને 4% મોંઘવારી ભથ્થામાં વધારાની ભેટ આપી હતી. આનાથી રાજ્યના 1.80 લાખ કર્મચારીઓ અને 1.70 લાખ પેન્શનરોને ફાયદો થવાની અપેક્ષા છે.