શેરબજારમાં ઐતિહાસિક તેજી: સેન્સેક્સ 2,008 પોઈન્ટ ઉછળ્યો, માર્કેટ કેપ પહેલીવાર ₹500 લાખ કરોડને પાર
ભારતીય શેરબજારમાં તેજીનો સિલસિલો યથાવત રહેતાં રોકાણકારો માટે આજનો દિવસ ઐતિહાસિક રહ્યો હતો. વૈશ્વિક બજારોમાંથી મળેલા મજબૂત સંકેતો અને ક્રૂડ ઓઇલના ભાવમાં થયેલા મોટા ઘટાડાને પગલે ભારતીય શેરબજારમાં જોરદાર ખરીદી જોવા મળી હતી. કારોબારના અંતે સેન્સેક્સ 2,008 પોઈન્ટના ઉછાળા સાથે 79,310 પર બંધ થયો હતો. જ્યારે નિફ્ટી 576 પોઈન્ટ વધીને 23,536ના સ્તરે પહોંચ્યો હતો. આ તેજી સાથે BSEમાં લિસ્ટેડ તમામ કંપનીઓનું કુલ માર્કેટ કેપિટલાઇઝેશન (Market Capitalisation) પ્રથમ વખત ₹500 લાખ કરોડને પાર થયું હતું. એક જ દિવસમાં રોકાણકારોની સંપત્તિમાં ₹8 લાખ કરોડથી વધુનો વધારો નોંધાયો હતો.
સતત છઠ્ઠા દિવસે બજારમાં તેજી
ભારતીય શેરબજારમાં સતત છઠ્ઠા ટ્રેડિંગ સત્રમાં તેજી જોવા મળી હતી. નવેમ્બર 2025 બાદની આ સૌથી લાંબી તેજીની શ્રેણી છે. બેન્કિંગ શેરોમાં પણ જોરદાર ખરીદી જોવા મળી હતી. નિફ્ટી બેન્ક ઇન્ડેક્સ 1,860 પોઈન્ટ વધીને 57,774 પર બંધ થયો હતો. જ્યારે મિડકેપ ઇન્ડેક્સ 1,115 પોઈન્ટના ઉછાળા સાથે 60,621ના સ્તરે પહોંચ્યો હતો.
M&M સહિત અનેક શેરોમાં ઉછાળો
કંપનીઓનાં ત્રિમાસિક પરિણામોએ પણ બજારને ટેકો આપ્યો હતો. મહિન્દ્રા એન્ડ મહિન્દ્રા (M&M)ની આવકમાં 25.3 ટકાનો વધારો થઈ ₹57,515 કરોડ નોંધાઈ હતી. જ્યારે નેટ પ્રોફિટ 25 ટકા વધીને ₹4,588 કરોડ થયો હતો. કંપનીના શેરમાં 5 ટકાથી વધુનો ઉછાળો જોવા મળ્યો હતો. આ ઉપરાંત NBCCનો નફો 34 ટકા વધીને ₹206 કરોડ થયો હતો. ઇપ્કા લેબ્સના નફામાં 33 ટકાનો વધારો નોંધાયો હતો. રોલેક્સ રિંગ્સનો શેર 8.6 ટકા વધ્યો હતો. LG ઇલેક્ટ્રોનિક્સ અને અમાગી મીડિયા લેબ્સનાં પરિણામો પણ મજબૂત રહ્યાં હતાં. જોકે, બજારમાં સર્વાંગી તેજી વચ્ચે કેટલીક કંપનીઓના શેરમાં ઘટાડો પણ નોંધાયો હતો. નબળાં પરિણામોને કારણે PI ઇન્ડસ્ટ્રીઝનો શેર 19 ટકાથી વધુ અને કમિન્સ ઇન્ડિયાનો શેર આશરે 14 ટકા તૂટ્યો હતો.
ક્રૂડ ઓઇલના ઘટાડાથી બજારને સપોર્ટ
બજારમાં તેજી પાછળનું મુખ્ય કારણ આંતરરાષ્ટ્રીય સ્તરે ક્રૂડ ઓઇલના ભાવમાં થયેલો ઘટાડો માનવામાં આવે છે. આ સપ્તાહ દરમિયાન ક્રૂડ ઓઇલના ભાવમાં આશરે 19 ટકાનો ઘટાડો નોંધાયો હતો, જે એપ્રિલ 2020 પછીનો સૌથી મોટો સાપ્તાહિક ઘટાડો હોવાનું જણાવાયું છે. આ ઉપરાંત અમેરિકાની મિડટર્મ ચૂંટણી બાદ વૈશ્વિક નીતિઓ અંગેની અનિશ્ચિતતામાં ઘટાડો થતાં રોકાણકારોનો વિશ્વાસ વધ્યો હતો. વિદેશી પોર્ટફોલિયો રોકાણકારો (FPI) દ્વારા ભારતીય બજારમાં ખરીદી કરવામાં આવી રહી છે. ડૉલર સામે ભારતીય રૂપિયો પણ અગાઉના 94.64ના સ્તરથી મજબૂત થઈ 94.48 પર બંધ થયો હતો. આમ, વૈશ્વિક સંકેતો, ક્રૂડ ઓઇલના ઘટાડા અને કંપનીઓનાં મજબૂત પરિણામોના સહારે ભારતીય શેરબજારે નવો ઐતિહાસિક રેકોર્ડ નોંધાવ્યો હતો.
