શેરબજારમાં સતત પાંચમા દિવસે તેજી, સેન્સેક્સ 383 પોઈન્ટ ઉછળ્યો

ભારતીય શેરબજારમાં બુધવારે સતત પાંચમા દિવસે તેજીનો માહોલ જોવા મળ્યો હતો. ધનતેરસ અને દિવાળી પહેલાં રોકાણકારોની ખરીદી વધતાં સેન્સેક્સ અને નિફ્ટી બંને લીલા નિશાનમાં બંધ થયા હતા. સેન્સેક્સ 383 પોઈન્ટના ઉછાળા સાથે 77,301 પર બંધ રહ્યો હતો, જ્યારે નિફ્ટી 115 પોઈન્ટની મજબૂતી સાથે 23,960ના સ્તરે પહોંચ્યો હતો. દિવસના કારોબાર દરમિયાન સેન્સેક્સ એક સમયે ગગડીને 76,604ના સ્તરે પહોંચ્યો હતો, જ્યારે નિફ્ટી પણ 23,696ના નીચલા સ્તરે ગયો હતો. જોકે, નીચલા સ્તરે ખરીદી વધતાં બંને ઇન્ડેક્સે જોરદાર રિકવરી કરી હતી.

BELના શેરમાં 5%નો ઉછાળો

નિફ્ટીમાં સામેલ 50માંથી 36 શેર વધારા સાથે બંધ થયા હતા. તેમાં ભારત ઇલેક્ટ્રોનિક્સ લિમિટેડ (BEL), અદાણી એન્ટરપ્રાઇઝિસ અને ટાઇટનના શેરમાં 4 ટકાથી વધુનો ઉછાળો નોંધાયો હતો. BELના શેરમાં લગભગ 5 ટકાની તેજી જોવા મળી હતી. બીજી તરફ, TCS, HCL ટેક અને BSEના શેર આશરે 2 ટકા ઘટીને ટોપ લુઝર્સ રહ્યા હતા. સેન્સેક્સના 30 શેરમાંથી 21 શેરમાં તેજી નોંધાઈ હતી. સેક્ટરલ ઇન્ડેક્સની વાત કરીએ તો IT સેક્ટર સિવાય લગભગ તમામ સેક્ટરમાં ખરીદી જોવા મળી હતી. મીડિયા ઇન્ડેક્સમાં 5 ટકાનો ઉછાળો આવ્યો હતો, જ્યારે મેટલ અને રિયલ્ટી ઇન્ડેક્સ 2 ટકા વધ્યા હતા. FMCG અને એનર્જી સેક્ટરમાં પણ સારી ખરીદી જોવા મળી હતી.

સ્મોલકેપ શેરોમાં પણ જોરદાર તેજી

મોટા શેરોની સરખામણીએ સ્મોલકેપ અને મિડકેપ શેરોમાં વધુ મજબૂતી જોવા મળી હતી. નિફ્ટી સ્મોલકેપ 100 ઇન્ડેક્સ 2 ટકા અને નિફ્ટી મિડકેપ 100 ઇન્ડેક્સ 1.55 ટકા વધ્યો હતો. જોકે, IT શેરોમાં વેચવાલીનું દબાણ રહ્યું હતું. ખાસ કરીને ઇન્ફોસિસ અને TCSના શેરોએ નિફ્ટીની તેજી પર દબાણ બનાવ્યું હતું.

ક્રૂડ ઓઇલ અને વૈશ્વિક પરિબળો પર નજર

મોતીલાલ ઓસ્વાલ ફાઇનાન્સિયલ સર્વિસીસના રિસર્ચ હેડ સિદ્ધાર્થ ખેમકાના જણાવ્યા અનુસાર, ઘરેલું અર્થતંત્રના સારા સંકેતો અને ક્રૂડ ઓઇલના ભાવમાં નરમાઈ ભારતીય બજારને ટેકો આપી શકે છે. જોકે, વૈશ્વિક અનિશ્ચિતતાઓને કારણે બજારમાં ઉતાર-ચઢાવ જોવા મળી શકે છે. બ્રેન્ટ ક્રૂડ પ્રતિ બેરલ આશરે 102 ડોલરની આસપાસ ટ્રેડ કરી રહ્યું હતું. અમેરિકાની મિડટર્મ ચૂંટણી બાદ રોકાણકારોની નજર હવે પશ્ચિમ એશિયામાં અમેરિકાની આગામી નીતિ અને તેના કારણે ક્રૂડ ઓઇલના ભાવમાં થનારા ફેરફારો પર રહેશે.

નિફ્ટી માટે 24,000નું સ્તર મહત્વનું

એનરિચ મનીના CEO પોનમુડી આરના જણાવ્યા અનુસાર, નિફ્ટી માટે 24,000નું સ્તર મહત્વનું રહેશે. જો નિફ્ટી આ સ્તરને મજબૂતીથી પાર કરશે તો બજારમાં વધુ તેજી આવી શકે છે. બીજી તરફ, 23,700થી 23,750નું સ્તર મહત્વના સપોર્ટ તરીકે કામ કરશે. બજારનો રિલેટિવ સ્ટ્રેન્થ ઇન્ડેક્સ (RSI) 68.55 પર પહોંચ્યો છે, જે ખરીદીનું મજબૂત વલણ દર્શાવે છે. જોકે, તે ઓવરબોટ ઝોનની નજીક હોવાથી રોકાણકારોએ સાવચેતી રાખવી જરૂરી છે.