દિવાળી મુહૂર્ત ટ્રેડિંગ ૨૦૨૬: દિવાળી પર શા માટે ખૂલે છે શેરબજાર? જાણો મુહૂર્ત ટ્રેડિંગની આખી વાત
દિવાળીના તહેવાર નિમિત્તે સામાન્ય રીતે શેરબજારમાં રજા હોય છે, પરંતુ દર વર્ષે આ દિવસે વિશેષ સમય માટે શેરબજાર ખુલ્લું રાખવામાં આવે છે. આ ખાસ સત્રને ‘મુહૂર્ત ટ્રેડિંગ’ (Muhurat Trading) કહેવામાં આવે છે. હિન્દુ પરંપરા અને વેપારીઓની માન્યતા અનુસાર દિવાળીના શુભ અવસરે રોકાણની શરૂઆત કરવી શુભ માનવામાં આવે છે. આ વર્ષે મુહૂર્ત ટ્રેડિંગ 8 નવેમ્બર, 2026ના રોજ રવિવારે યોજાશે.
8 નવેમ્બરે કેટલા વાગ્યે ખુલશે બજાર?
નેશનલ સ્ટોક એક્સચેન્જ (NSE) અને બોમ્બે સ્ટોક એક્સચેન્જ (BSE) પર મુહૂર્ત ટ્રેડિંગ સત્ર બપોરે 2:20થી 3:30 વાગ્યા સુધી ચાલશે. આ પહેલાં બપોરે 2:05થી 2:20 વાગ્યા સુધી પ્રી-ઓપન સેશન (Pre-Open Session) યોજાશે. સામાન્ય દિવસોની સરખામણીએ આ સત્રનો સમયગાળો ટૂંકો રહેશે.
શું છે મુહૂર્ત ટ્રેડિંગ?
મુહૂર્તનો અર્થ શુભ કાર્ય શરૂ કરવા માટે પસંદ કરાયેલો વિશેષ સમય થાય છે. દિવાળીના દિવસે રોકાણકારો શેરની ખરીદી અને વેચાણ કરીને નવા સંવત્સર અથવા નાણાકીય વર્ષની શરૂઆતને શુભ બનાવવા પ્રયાસ કરે છે. વેપારી સમુદાયો માટે દિવાળી નવા હિસાબી વર્ષની શરૂઆતનો અવસર પણ છે. આથી શેરબજારમાં મુહૂર્ત ટ્રેડિંગની પરંપરાને વિશેષ મહત્ત્વ આપવામાં આવે છે.
BSEથી શરૂ થઈ પરંપરા
મુહૂર્ત ટ્રેડિંગની શરૂઆત વર્ષ 1957માં બોમ્બે સ્ટોક એક્સચેન્જ (BSE)માં થઈ હોવાનું જણાવવામાં આવે છે. ત્યારબાદ વર્ષ 1992માં નેશનલ સ્ટોક એક્સચેન્જ (NSE)એ પણ આ પરંપરા અપનાવી હતી. અગાઉ ઓનલાઈન ટ્રેડિંગ અને ડીમેટ ખાતાંની સુવિધા ન હતી ત્યારે વેપારીઓ જાતે એક્સચેન્જમાં પહોંચીને આ ખાસ સત્રમાં ભાગ લેતા હતા.
ચોપડા પૂજન સાથે જોડાયેલી પરંપરા
ગુજરાતી અને મારવાડી વેપારી સમુદાયમાં દિવાળીના દિવસે ચોપડા પૂજન કરવાની પરંપરા છે. વેપારીઓ નવા વહી-ખાતાંનું પૂજન કરીને માતા લક્ષ્મી પાસે ધંધામાં સમૃદ્ધિ અને પ્રગતિની પ્રાર્થના કરે છે. મુહૂર્ત ટ્રેડિંગને આ જ પરંપરાનું આધુનિક સ્વરૂપ માનવામાં આવે છે. આ દિવસે શેરની ખરીદી કરીને રોકાણકારો પણ નવા વર્ષની શુભ શરૂઆતની આશા રાખે છે.
મુહૂર્ત ટ્રેડિંગમાં નફાની કોઈ ગેરંટી નથી
મુહૂર્ત ટ્રેડિંગને શુભ શરૂઆત સાથે જોડવામાં આવે છે, પરંતુ આ દિવસે શેર ખરીદવાથી નફો જ થશે તેની કોઈ ખાતરી નથી. સત્રનો સમય ઓછો હોવાથી અને કારોબાર મર્યાદિત રહેવાની શક્યતા હોવાથી શેરના ભાવમાં ઉતાર-ચઢાવ આવી શકે છે. તેથી રોકાણકારોએ માત્ર શુભ મુહૂર્તના આધારે ઉતાવળમાં નિર્ણય લેવાને બદલે કંપનીની સ્થિતિ, બજારની હિલચાલ અને પોતાની જોખમ લેવાની ક્ષમતા ધ્યાનમાં રાખીને રોકાણ કરવું જોઈએ.
