દિવાળી પૂજામાં લક્ષ્મીજીની મૂર્તિ કે તસવીર ખરીદતી વખતે રાખો આ 4 બાબતોનું ધ્યાન
દિવાળીનો તહેવાર ધન, સુખ, સમૃદ્ધિ અને સૌભાગ્યનું પ્રતીક માનવામાં આવે છે. આ પર્વ પર દેવી લક્ષ્મી અને ભગવાન ગણેશની પૂજાનું વિશેષ મહત્ત્વ છે. ધાર્મિક માન્યતા અનુસાર, કારતક માસની અમાસની રાત્રે દેવી લક્ષ્મીનું પૂજન કરવાથી ઘરમાં સુખ-સમૃદ્ધિ અને ધન-ધાન્યનો વાસ થાય છે. જોકે, દિવાળી પૂજા માટે દેવી લક્ષ્મીની મૂર્તિ કે તસવીર ખરીદતી વખતે કેટલીક બાબતોનું ખાસ ધ્યાન રાખવું જોઈએ. વાસ્તુ અને ધાર્મિક માન્યતાઓ અનુસાર, મૂર્તિમાં ચોક્કસ મુદ્રાઓ અને પ્રતીકો હોવાં શુભ માનવામાં આવે છે.
1. દેવી લક્ષ્મી બેઠેલી મુદ્રામાં હોવાં જોઈએ
દિવાળી પૂજા માટે દેવી લક્ષ્મીની એવી મૂર્તિ કે તસવીર પસંદ કરવી જોઈએ જેમાં તેઓ બેઠેલી મુદ્રામાં હોય. ધાર્મિક માન્યતા અનુસાર, બેઠેલી મુદ્રા સ્થિરતા અને કાયમી સમૃદ્ધિનું પ્રતીક છે. એવું માનવામાં આવે છે કે આ સ્વરૂપની પૂજા કરવાથી ઘરમાં લક્ષ્મીજીનો કાયમી વાસ રહે છે.
2. કમળના ફૂલ પર બિરાજમાન હોવાં જોઈએ
દેવી લક્ષ્મી કમળના ફૂલ પર બિરાજમાન હોય તેવી મૂર્તિ પસંદ કરવી શુભ માનવામાં આવે છે. કમળનું ફૂલ પવિત્રતા, દિવ્યતા અને આધ્યાત્મિકતાનું પ્રતીક છે. ધાર્મિક માન્યતા અનુસાર, કમળ પર બિરાજમાન લક્ષ્મીજીની પૂજા કરવાથી ધન, બુદ્ધિ અને શુભતાની પ્રાપ્તિ થાય છે.
3. જમણો હાથ આશીર્વાદ મુદ્રામાં હોવો જોઈએ
દેવી લક્ષ્મીનો જમણો હાથ આશીર્વાદ આપતી મુદ્રામાં હોય તેવી તસવીર પસંદ કરવી જોઈએ. આ મુદ્રા સુખ, સમૃદ્ધિ, ભયમુક્તિ અને મનોકામના પૂર્ણ થવાનું પ્રતીક માનવામાં આવે છે. આવી મૂર્તિની પૂજા કરવાથી ભક્તોને માતાના આશીર્વાદ પ્રાપ્ત થાય છે તેવી માન્યતા છે.
4. હાથમાંથી સોનાના સિક્કા વરસતા હોવા જોઈએ
દેવી લક્ષ્મીના હાથમાંથી સોનાના સિક્કા વરસતા હોય તેવી મૂર્તિ પણ શુભ માનવામાં આવે છે. આ સ્વરૂપ ધન-સંપત્તિ, સમૃદ્ધિ અને અખૂટ ભંડારનું પ્રતીક છે. આ ઉપરાંત, દેવી લક્ષ્મીની સાથે હાથી દર્શાવવામાં આવ્યો હોય તો તેને પણ શુભ સંકેત માનવામાં આવે છે.
પૂજામાં ગણેશજીનું સ્થાન પણ મહત્વનું
દિવાળીની પૂજામાં દેવી લક્ષ્મીની સાથે ભગવાન ગણેશની સ્થાપના પણ કરવામાં આવે છે. ધાર્મિક માન્યતા અનુસાર, પૂજા દરમિયાન ભગવાન ગણેશને દેવી લક્ષ્મીની જમણી બાજુ રાખવા જોઈએ. ગણેશજી બુદ્ધિ અને વિઘ્નહર્તાના પ્રતીક છે. તેમની પૂજા કરવાથી સંપત્તિનો યોગ્ય ઉપયોગ થાય અને જીવનમાં આવતા અવરોધો દૂર થાય તેવી માન્યતા છે.
નોંધ: આ લેખમાં આપવામાં આવેલી તમામ માહિતી વિવિધ સ્રોતો જેવા કે - પંચાંગો/ ઉપદેશો/ ધાર્મિક માન્યતાઓ/જ્યોતિષીઓ/ શાસ્ત્રોમાંથી સંકલિત કરવામાં આવી છે અને તમને પ્રસારિત કરવામાં આવી છે. અમારો હેતુ માત્ર માહિતી પૂરી પાડવાનો છે. GSTV આની પુષ્ટિ નથી કરતું. તેના માટે કોઈ નિષ્ણાતનું માર્ગદર્શન લેવું.
