VIDEO: Auto News : SUVના ક્રેઝ વચ્ચે પણ મારુતિની આ કાર સુપરહિટ! 5-સ્ટાર સેફ્ટી સાથે બની દેશની સૌથી વધુ વેચાતી ગાડી
છેલ્લું અપડેટ : 05 Jul 2026
ભારતીય બજારમાં આજકાલ એસયુવી (SUV) કારની માંગ સતત વધી રહી છે, તેમ છતાં મારુતિ સુઝુકી ડિઝાયરે પોતાની લોકપ્રિયતા જાળવી રાખી છે. જૂન 2026માં આ કાર ફરી એકવાર દેશમાં સૌથી વધુ વેચાતી સેડાન કાર બની ગઈ છે. કંપનીએ આ સમયગાળા દરમિયાન Maruti Suzuki Dzire ના 17, 899 યુનિટ વેચ્યા છે, જ્યારે જૂન 2025માં આ આંકડો 15, 484 યુનિટ હતો. આ રીતે કારના વેચાણમાં વાર્ષિક 15.60 ટકાનો વધારો નોંધાયો છે.
કિંમત અને વેરિઅન્ટ્સ
નવી Maruti Dzireની શરૂઆતી એક્સ-શોરૂમ કિંમત રૂ. 6.26 લાખ છે, જ્યારે તેના ટોપ વેરિઅન્ટની કિંમત રૂ. 9.35 લાખ સુધી જાય છે. કંપનીએ તેને LXi, VXi, ZXi અને ZXi+ જેવા ચાર વેરિઅન્ટમાં રજૂ કરી છે. જે ગ્રાહકો ઓછા બજેટમાં કાર ખરીદવા માંગે છે તેમના માટે LXi સારો વિકલ્પ છે. જ્યારે AMT અને CNG નો વિકલ્પ VXi અને ZXi વેરિઅન્ટમાં ઉપલબ્ધ છે.
નવી ડિઝાઇન અને પ્રીમિયમ લુક
નવી Dzire પહેલા કરતાં ઘણી અલગ છે. કંપનીએ તેની બહારની ડિઝાઇનમાં ઘણા ફેરફારો કર્યા છે, જેના કારણે તે વધુ પ્રીમિયમ દેખાય છે. તેમાં નવી ફ્રન્ટ ગ્રિલ, એલઇડી હેડલાઇટ્સ અને આકર્ષક એલોય વ્હીલ્સ આપવામાં આવ્યા છે. કેબિનની ડિઝાઇન પણ નવી છે, જે કારને પહેલા કરતાં વધુ મોર્ડન અને સ્ટાઇલિશ બનાવે છે.
એન્જિન અને શાનદાર માઇલેજ
નવી ડિઝાયરમાં 1.2 લીટરનું Z-સિરીઝ ૩-સિલિન્ડર પેટ્રોલ એન્જિન આપવામાં આવ્યું છે. આ એન્જિન 80bhp નો પાવર અને 112Nmનો ટોર્ક જનરેટ કરે છે. ગ્રાહકો તેમાં મેન્યુઅલ અને AMT ગિયરબોક્સનો વિકલ્પ પસંદ કરી શકે છે.
માઇલેજની વાત કરીએ તો, તેનું મેન્યુઅલ વેરિઅન્ટ 24. 79 કિમી/લીટર, જ્યારે AMT વેરિઅન્ટ 25. 71 કિમી/લીટર સુધીની માઇલેજ આપે છે. બીજી તરફ, CNG મોડલ એક કિલોગ્રામ ગેસમાં 33.73 કિલોમીટર સુધી ચાલી શકે છે, જે તેને ઓછા ખર્ચે ચાલતી કારોની યાદીમાં સામેલ કરે છે.
ફીચર્સની લાંબી યાદી
નવી Dzire માં ઘણા આધુનિક ફીચર્સ આપવામાં આવ્યા છે. તેમાં ઇલેક્ટ્રિક સનરૂફ, ૯-ઇંચની ટચસ્ક્રીન ઇન્ફોટેનમેન્ટ સિસ્ટમ, વાયરલેસ ફોન ચાર્જર અને 360-ડિગ્રી કેમેરા જેવી સુવિધાઓ મળે છે. આ સિવાય પાછળ બેસતા મુસાફરો માટે રિયર એસી વેન્ટ્સ અને આર્મરેસ્ટ પણ આપવામાં આવ્યા છે, જેનાથી લાંબી મુસાફરી વધુ આરામદાયક બને છે.
સેફ્ટીમાં પણ શાનદાર
સેફ્ટી (સુરક્ષા)ના મામલામાં પણ નવી Dzire એ શાનદાર પ્રદર્શન કર્યું છે. તેને ગ્લોબલ NCAP (Global NCAP) તરફથી 5-સ્ટાર સેફ્ટી રેટિંગ મળ્યું છે. કારમાં 6 એરબેગ્સ, ABS ની સાથે EBD, હિલ હોલ્ડ આસિસ્ટ અને અન્ય ઘણા જરૂરી સુરક્ષા ફીચર્સ સ્ટાન્ડર્ડ (બધા વેરિઅન્ટમાં) આપવામાં આવ્યા છે. ભારતીય બજારમાં તેની સીધી સ્પર્ધા Honda Amaze, Hyundai Aura અને Tata Tigor જેવી સેડાન કાર સાથે થાય છે.
