WhatsApp યુઝર્સ માટે મોટા સમાચાર: 1 ઓક્ટોબરથી બદલાઈ રહ્યા છે નિયમો, જાણો કોના ખિસ્સા પર પડશે બોજ!
છેલ્લું અપડેટ : 30 Sept 2026
1 ઓક્ટોબર 2026થી WhatsApp પર મેસેજ મોકલવા માટે આ લોકોએ પૈસા ચૂકવવા પડશે. આ ફેરફાર સામાન્ય WhatsApp યુઝર્સ માટે નથી. એટલે કે જો તમે મિત્રો, પરિવાર કે અન્ય કોઈ વ્યક્તિને વૉટ્સએપ પર મેસેજ મોકલો છો, તો તમારે તેના માટે કોઈ પૈસા આપવાના રહેશે નહીં. આ ફેરફાર WhatsApp Business Platformનો ઉપયોગ કરતી કંપનીઓ અને બિઝનેસ માટે છે. મેટા 1 ઓક્ટોબરથી આ પ્લેટફોર્મની મેસેજિંગ ફીમાં ફેરફાર કરવા જઈ રહ્યું છે. અત્યાર સુધી ગ્રાહકના મેસેજ કર્યા પછી 24 કલાકની વિન્ડોમાં બિઝનેસ તરફથી મોકલવામાં આવતા કેટલાક મેસેજ મફત હતા.
પરંતુ 1 ઓક્ટોબરથી આ નિયમમાં ફેરફાર થશે અને કેટલાક યુટિલિટી મેસેજ, જેમ કે ઓર્ડર કન્ફર્મેશન અને ડિલિવરી અપડેટ પર ચાર્જ લાગશે. જોકે બિઝનેસ માટે પણ સંપૂર્ણપણે તમામ સર્વિસ મેસેજ પર તરત જ પૈસા નહીં લાગે. મેટા દરેક બિઝનેસ ફોન નંબર માટે દર મહિને 1,000 સર્વિસ રિપ્લાય ફ્રી રાખી રહ્યું છે. ત્યાર બાદ વધારાના મેસેજ પર ચાર્જ લાગશે.
1 ઓક્ટોબરથી શું બદલાવાનું છે?
1 ઓક્ટોબર 2026થી 24 કલાકની વિન્ડોની અંદર મોકલવામાં આવતા કેટલાક યુટિલિટી મેસેજ પર પણ ચાર્જ લાગશે. જેમાં ઓર્ડર કન્ફર્મેશન, ડિલિવરી અપડેટ અને આ પ્રકારની અન્ય વિગતો સામેલ હોઈ શકે છે. કસ્ટમર સર્વિસ રિપ્લાય માટે દરેક બિઝનેસ નંબરને દર મહિને 1,000 ફ્રી સર્વિસ મેસેજ મળશે. એટલે કે નાના કારોબારીઓ જેના કસ્ટમર ઇન્ટરેક્શન ઓછા છે, તેના માટે શરૂઆતી 1,000 રિપ્લાય પર અલગથી ચાર્જ નહીં લાગે.
કેટલા પૈસા ચૂકવવા પડશે?
ભારતમાં Metaની નવી પ્રાઇસિંગ મુજબ યુટિલિટી મેસેજની કિંમત GST પહેલાં લગભગ 11.5 પૈસા પ્રતિ ડિલિવર્ડ મેસેજ છે. 18 ટકા GST ઉમેર્યા પછી આ રકમ લગભગ 13.6 પૈસા પ્રતિ મેસેજ થાય છે. ધ્યાન આપવા જેવી બાબત એ છે કે આ ચાર્જ કંપની તરફથી મોકલવામાં આવતા એલિજિબલ બિઝનેસ મેસેજ પર છે. ગ્રાહકે WhatsApp પર કોઈ બિઝનેસને મેસેજ કરવા માટે કોઈ પૈસા આપવાના રહેશે નહીં.
માર્કેટિંગ મેસેજનો ચાર્જ વધુ હશે
વૉટ્સએપ બિઝનેસ પ્લેટફોર્મ પર દરેક પ્રકારના મેસેજની કિંમત સરખી નથી. માર્કેટિંગ મેસેજ એટલે કે પ્રમોશનલ ઑફર્સ, સેલની જાહેરાતો અને અન્ય માર્કેટિંગ ઇન્ફર્મેશન માટે ભારતમાં રેટ યુટિલિટી મેસેજ કરતાં ઘણો વધારે છે. રિપોર્ટ અનુસાર ભારતમાં માર્કેટિંગ મેસેજનો સ્ટાન્ડર્ડ રેટ GST પહેલાં 86.31 પૈસા પ્રતિ મેસેજ રાખવામાં આવ્યો છે.
