એલોન મસ્કને કેટલો પગાર મળે છે? ટેસ્લાના CEO એ પોતે આપી હતી માહિતી

ટેસ્લાના CEO અને વિશ્વના સૌથી પ્રખ્યાત ઉદ્યોગપતિ એલોન મસ્કને કેટલો પગાર મળે છે? મસ્કે પોતે સોશિયલ મીડિયા પર આ માહિતી આપી હતી.

ટેસ્લાના CEO અને વિશ્વના સૌથી લોકપ્રિય ઉદ્યોગપતિ એલોન મસ્ક ફરી એકવાર સમાચારમાં છે. યુએસના રાષ્ટ્રપતિ ડોનાલ્ડ ટ્રમ્પ સાથેના તેમના સંબંધો હવે કડવાશભર્યા બની રહ્યા છે. તેમણે સ્પષ્ટપણે કહ્યું છે કે જો તેઓ ત્યાં ન હોત તો ટ્રમ્પ આ વખતે યુએસના રાષ્ટ્રપતિની ચૂંટણી જીતી શક્યા ન હોત.

હવે એલોન મસ્ક વિશ્વના સૌથી ધનિક લોકોમાં સામેલ છે, તેથી લોકો તેમના પગાર અને નેટવર્થ વિશે જાણવા માંગે છે. આજે અમે તમને જણાવીએ છીએ કે એલોન મસ્કને કેટલો પગાર મળે છે.

મસ્કને કેટલો પગાર મળે છે?

તમને જાણીને નવાઈ લાગશે કે ટેસ્લા જેવી દિગ્ગજ કંપનીના CEO હોવા છતાં, મસ્કને છેલ્લા સાત વર્ષથી કંપની દ્વારા કોઈ પગાર આપવામાં આવ્યો નથી. મસ્કે પોતે સોશિયલ મીડિયા પર આ માહિતી આપી હતી અને ઘણા અહેવાલોમાં તેનો વિગતવાર ઉલ્લેખ પણ કરવામાં આવ્યો છે.

વોલ સ્ટ્રીટ જર્નલના અહેવાલમાં ખુલાસો થયો

વોલ સ્ટ્રીટ જર્નલમાં પ્રકાશિત એક અહેવાલમાં જણાવાયું છે કે એલોન મસ્કને 2023માં 0 ડોલરનો પગાર મળ્યો હતો. એટલે કે, તેમને ટેસ્લા તરફથી એક પણ ડોલર પગાર તરીકે આપવામાં આવ્યો નહતો. એટલું જ નહીં, મસ્કે પોતે  સોશિયલ મીડિયા સાઈટ X પર પોસ્ટ કરીને આ વાતની પુષ્ટિ કરી છે.

તેમણે કહ્યું, "કંપનીનું મૂલ્ય 2000 ટકાથી વધુ વધાર્યું હોવા છતાં, સાત વર્ષથી શૂન્ય" એટલે કે તેમણે કંપનીનું મૂલ્ય 2000 ટકાથી વધાર્યું હતું, છતાં તેમને સાત વર્ષ સુધી કોઈ પગાર આપવામાં આવ્યો ન હતો.

2018માં સ્ટોક-આધારિત સોદો મળ્યો હતો

મસ્કને ટેસ્લા દ્વારા 2018માં એક ખાસ ડીલ આપવામાં આવી હતી. મસ્ક અને ટેસ્લા વચ્ચે પ્રદર્શન-આધારિત સ્ટોક ઓપ્શન ડીલ નક્કી કરવામાં આવી હતી. આ ડીલ હેઠળ, મસ્કને લગભગ 304 મિલિયન સ્ટોક ઓપ્શન ઓફર કરવામાં આવ્યા હતા. મસ્કને આ નફો ત્યારે જ મળશે જ્યારે તે કંપનીને નાણાકીય અને શેરબજારના લક્ષ્યો સુધી લઈ જવામાં સફળ થશે. 2023 સુધીમાં, મસ્કે આ બધા લક્ષ્યો પૂર્ણ કરી લીધા હતા, જેના કારણે તેમને સોદાનો સંપૂર્ણ નફો મેળવવાનો અધિકાર મળ્યો હતો. તે સમયે, આ સ્ટોક ડીલનું મૂલ્ય લગભગ 146 બિલિયન ડોલર સુધી પહોંચી ગયું હતું.

કોર્ટે સોદો રદ્દ કર્યો હતો

જોકે, જાન્યુઆરી 2024માં, ટેસ્લા અને મસ્ક વચ્ચેના આ સોદાને મોટો ફટકો પડ્યો જ્યારે ડેલવેરની ચાન્સરી કોર્ટે તેને ફગાવી દીધો. કોર્ટના ન્યાયાધીશ કેથલીન મેકકોર્મિકે તેમના નિર્ણયમાં કહ્યું કે સોદા સમયે, ટેસ્લાનું બોર્ડ મસ્કના વધુ પડતા પ્રભાવ હેઠળ હતું અને તેણે વ્યાજબી નિર્ણય લીધો ન હતો. તેણે કહ્યું કે બોર્ડના સભ્યો "અહંકારી CEOના આજ્ઞાકારી ગુલામો" જેવું વર્તન કરતા હતા. કોર્ટે આ સોદો અન્યાયી ગણાવીને રદ્દ કર્યો હતો.

કોર્ટમાં આપવામાં આવેલી માહિતી અનુસાર, આ સ્ટોક ડીલનું મૂલ્ય તે સમયે લગભગ 56 બિલિયન ડોલરહતું, જે ડિસેમ્બર 2023 સુધીમાં વધીને $146 બિલિયન થઈ શકે છે. કોર્ટ દ્વારા તેને ફગાવી દેવામાં આવ્યા પછી, હવે તેનું મૂલ્ય લગભગ 98 બિલિયન ડોલર હોવાનું માનવામાં આવે છે.

ટેસ્લા બોર્ડે મસ્કના પગાર માટે નવી સમિતિની રચના કરી

આ વિવાદ પછી, ટેસ્લા બોર્ડે એક ખાસ સમિતિની રચના કરી છે જે મસ્કના પગાર અને ભાવિ ચુકવણી મોડેલ પર વિચાર કરી રહી છે. ફાઈનાન્સિયલ ટાઈમ્સના અહેવાલ મુજબ, ટેસ્લાના SEC ફાઈલિંગ (31 માર્ચ 2025) માં આ સમિતિ વિશે માહિતી આપવામાં આવી છે. આ સમિતિમાં ટેસ્લાના બોર્ડ ચેરપર્સન રોબિન ડેનહોમ અને ડિરેક્ટર કેથલીન વિલ્સન-થોમ્પસનનો સમાવેશ થાય છે. હવે આ સમિતિ નક્કી કરશે કે ભવિષ્યમાં મસ્કને કેવા પ્રકારનું વળતર આપવામાં આવશે.

આ સમગ્ર વિવાદમાં, મસ્ક કહે છે કે તેણે પૈસા કમાયા નથી, પરંતુ કંપનીનું મૂલ્ય અનેક ગણું વધાર્યું છે . આ ચર્ચા હવે ફક્ત ટેસ્લા પૂરતી મર્યાદિત નથી , પરંતુ વૈશ્વિક વ્યવસાયમાં સૌથી મોટી ચર્ચાઓમાંની એક બની ગઈ છે .