Tech: શું ખરેખર Instagramના નવા Map Featureથી યુઝર્સની પ્રાઇવસી પર સંકટ? META સવાલોના ઘેરામાં
છેલ્લું અપડેટ : 09 Aug 2025
Instagram પોતાના Featuresમાં અવાર નવાર બદલાવ કરતું રહેતું હોય છે અને મોટાભાગે યુઝર્સ તેનાથી ખુશ થતા હોય છે. પરંતું, આ વખતે તેની અપડેટે યુઝર્સના મનમાં સવાલો ઉભા કર્યા છે. Instagramની લેટેસ્ટ અપડેટને લઈને ડિજિટલ પ્રાઇવસી અંગે ઘણાં સવાલ ઊભા થઈ રહ્યાં છે. Instagram દ્વારા નવું મેપ ફીચર લોન્ચ કરવામાં આવ્યું છે. આ ફીચરની મદદથી યુઝર પોતાની છેલ્લી એક્ટિવ લોકેશનને તેના ફ્રેન્ડ્સ સાથે શેર કરી શકે છે. સ્નેપચેટના સ્નેપ મેપ ફીચરની જેમ જ આ કામ કરે છે. જોકે ઇન્સ્ટાગ્રામના આ ફીચરને લઈને યુઝરની પ્રાઇવસી અંગે ઘણાં સવાલો ઊભા થઈ રહ્યાં છે.
શું છે Instagram Map Feature?
am દ્વારા Map Feature દુનિયાભરના યુઝર્સ માટે લોન્ચ કરવામાં આવ્યું છે. આ Feature હેઠળ યુઝર પોતાની છેલ્લી એક્ટિવ લોકેશનને તેમના મ્યુચ્યુઅલ ફ્રેન્ડ અથવા તો કસ્ટમ લિસ્ટ સાથે શેર કરી શકે છે. આ Featureની મદદથી યુઝર જે તે લોકેશનની રીલ્સ, સ્ટોરીઝ અને નોટ્સ ફ્રેન્ડ્સ અને પબ્લિક પોસ્ટ દ્વારા મેળવી એટલે કે જોઈ શકે છે. આ માટે ડાયરેક્ટ મેસેજમાં એક ડાયનામિક મેપ ઇન્ટરફેસ આપવામાં આવ્યો છે. METAનું કહેવું છે કે આ ફીચર જે તે લોકેશનના યુઝર્સ તેમજ ફ્રેન્ડ્સ સાથે કનેક્ટ થવા માટે છે.
Privacy અંગે ઉઠ્યા સવાલ
METAએ કહ્યું છે કે આ ફીચર યુઝરને એકમેક સાથે વધુ સારી રીતે કનેક્ટ થવા માટે આપવામાં આવ્યું છે. તેમ છતાં યુઝર્સ સોશિયલ મીડિયા પર તેનો ખૂબ જ વિરોધ કરી રહ્યાં છે. કેટલાક યુઝર્સનું કહેવું છે કે તેમણે આ ફીચર માટે હામી ન ભરી હોવા છતાં તેમનું લોકેશન લોકોને દેખાઈ રહ્યું છે. કેટલાક યુઝર્સ સિક્યોરિટીને લઈને અવાજ ઉઠાવી રહ્યાં છે કે કોઈ પણ વ્યક્તિ હવે કોઈનો પણ પીછો કરી શકે છે. તેમજ આ ફીચરને કોઈ પણ પ્રકારની ચોક્કસ જાહેરાત અથવા તો નોટિસ આપ્યા વગર લોન્ચ કર્યું હોવાથી પણ તેને વખોડી કાઢવામાં આવ્યું છે.
શું કહ્યું METAએ?
Instagramના ચીફ એડમ મોસેરીએ આ ટીકાઓ વિશે કહ્યું છે, ‘આ Feature યુઝર માટે બાય ડિફોલ્ટ બંધ હોય છે. તેમજ તેને ચાલુ કરવા માટે યુઝર પાસે બે વાર પરવાનગી માગવામાં આવે છે. પહેલી વાર આ ફીચર માટે તૈયારી દેખાડી અને બીજી વાર તેને કન્ફર્મ—એમ બે વાર પરવાનગી લેવામાં આવે છે. પોતાના મેપ પર પોતાને જોઈ શકતા હોવાથી તેનો અર્થ એ નથી થતો કે હજારો લોકો તેને જોઈ શકે છે. અમારી ટીમ દરેક વસ્તુને વારંવાર ચેક કરે છે કે કોઈ પણ જાતની પરવાનગી વગર યુઝરના લોકેશન શેર ન થાય.’
METAના પ્રવક્તાએ આ વિશે કહ્યું કે ‘Instagram મેપ બાય ડિફોલ્ટ બંધ હોય છે. તેમજ યુઝરની લાઇવ લોકેશન ક્યારેય શેર થતી નથી જ્યાં સુધી યુઝર પોતે તેને ચાલુ ન કરે. યુઝર તેને શરૂ કરે તો પણ યુઝર જેને ફોલો કરે છે અથવા તો પ્રાઇવેટ અથવા તો કસ્ટમ લિસ્ટની વ્યક્તિ જ લોકેશન જોઈ શકશે. આ પસંદગી યુઝરની પોતાની રહેશે.’
કાયદાકીય મુશ્કેલીમાં આવી શકે છે META
અમેરિકાની સરકારને પ્રતિનિધિત્વ કરતાં લોરી ટ્રહાન અને કેથી કાસ્ટર દ્વારા અગાઉ આ ફીચરને બંધ કરવા માટે મેટાને વિનંતી કરવામાં આવી હતી. ટીનએજરની લોકેશન અંગે તેમણે ચિંતા વ્યક્ત કરી હતી. આ વિશે તેમણે કહ્યું હતું કે ‘ટીનએજરની જીયોલોકેશનનું સર્વેલન્સ કરવું એ પ્રાઇવસીનો ભંગ છે. તેના કારણે તેઓ સ્ટોકિંગ, સેક્ટોર્શન અને એનાથી પણ વધુ ખતરનાક મુશ્કેલીઓનો સામનો કરી શકે છે.’
આ અંગે METAએ કહ્યું છે કે ટીન એકાઉન્ટ્સમાં આ માટેની તમામ પરવાનગી પેરેન્ટ્સને આપવામાં આવી છે. લોકેશન શેર કરવી કે નહીં તેનો કન્ટ્રોલ પેરેન્ટ્સના હાથમાં છે. તેઓ ઇચ્છે તો આ ફીચરને બ્લોક પણ કરી શકે છે જેથી લોકેશન શેર ન થાય.
Featureને કેવી રીતે બંધ કરવું?
આ માટે Instagram ઓપન કરવું, ત્યાર બાદ ડાયરેક્ટ મેસેજમાં જવું અને મેપ આઇકન પર ક્લિક કરવું. ત્યાર બાદ સેટિંગ્સમાં જઈને લોકેશન શેરિંગ બંધ કરી દેવું. આ સિવાય મોબાઇલની લોકેશન સર્વિસમાં જઈને Instagramની લોકેશન પરવાનગીમાં “Never” ઓપ્શન પસંદ કરવું. તેથી પણ આ ફીચર બંધ થઈ જશે.
