ભૂલથી પણ ટેલિગ્રામ પરથી આ ફાઇલ ડાઉનલોડ ન કરતા, હેકર્સ બનાવી રહ્યા છે શિકાર

જો તમે પણ મેસેજિંગ પ્લેટફોર્મ ટેલિગ્રામ એપનો ઉપયોગ કરો છો, તો તમારે સાવચેત રહેવાની જરૂર છે. આ એપમાં એક મોટી ખામી સામે આવી છે જેના કારણે હેકર્સ તમને ખતરનાક ફાઇલો મોકલી શકે છે. આ ફાઇલો વીડિયો જેવી દેખાય છે, પરંતુ વાસ્તવમાં તે માલવેર છે જે તમારા માટે ખૂબ જ ખતરનાક સાબિત થઈ શકે છે. ESETના સંશોધકોએ આ અંગે એક મોટો ખુલાસો કર્યો છે જેમાં કહેવામાં આવ્યું છે કે, યુઝર્સે તરત જ કેટલાક મહત્ત્વપૂર્ણ પગલાં લેવા જોઈએ અને એપને અપડેટ કરવી જોઈએ.

આ ફાઇલ ડાઉનલોડ કરવી ખૂબ જ જોખમી

સાયબર સિક્યોરિટી રિસર્ચર્સ અનુસાર, હેકર્સ EvilVideo નામના માલવેરનો ઉપયોગ કરી રહ્યા છે અને 30 સેકન્ડના વીડિયોના રૂપમાં ખતરનાક ફાઇલ મોકલી રહ્યા છે. આ ફાઇલો ટેલિગ્રામ પર ગ્રૂપ અથવા ખાનગી ચેટ પર મોકલવામાં આવી રહી છે. આટલું જ નહીં, વધુ ખતરનાક એ છે કે, જો કોઈ વ્યક્તિએ ઓટોમેટિક ડાઉનલોડ ઓન કર્યું હોય તો ફાઈલ ચેટ ઓપન થતાની સાથે જ ડાઉનલોડ થઈ જાય છે.

ભૂલથી પણ આ ભૂલ ન કરો

જ્યારે યુઝર આ ફાઈલ ખોલે છે, ત્યારે ટેલિગ્રામ પર દેખાય છે કે આ વીડિયો ચાલી રહ્યો નથી. પરંતુ તે અન્ય કોઈપણ એપથી પ્લે કરી શકાય છે. જો તમે અન્ય એપ્લિકેશનને વીડિયોચલાવવાની મંજૂરી આપો છો, તો તે નુકસાનકારક એપ્લિકેશન ઇન્સ્ટોલ કરે છે. આ એજ એપ હશે જે તમારા માટે જોખમી સાબિત થઈ શકે છે. તમે સરળતાથી હેકર્સની જાળમાં ફસાઈ શકો છો, જેના પછી તેઓ તમારો ડેટા ચોરી શકે છે અને તમને ઘણી રીતે નુકસાન પહોંચાડી શકે છે. જો તમે ટેલિગ્રામનું લેટેસ્ટ વર્ઝન અપડેટ ન કર્યું હોય તો તરત જ કરો અને કોઈપણ અજાણ્યા સ્ત્રોતમાંથી કોઈપણ એપ ડાઉનલોડ કરશો નહીં.