VIDEO: વરસાદ બાદ હરિદ્વારમાં ગંગાનું જળસ્તર ભયાનક રીતે વધ્યું, નદીમાં તણાયા વાહનો

હરિદ્વારમાં શનિવારે બપોર બાદ હવામાનમાં ફરી એકવાર પલટો આવ્યો હતો. બપોર બાદ શહેરમાં ભારે વરસાદના કારણે લોકોને ગરમીમાંથી થોડી રાહત મળી હતી. પરંતુ, વરસાદ સાથે લોકોની મુશ્કેલીમાં પણ વધારો થયો છે.

ચોમાસાના આગમનની સાથે જ ઉત્તરાખંડમાં પણ વરસાદની મોસમ શરૂ થઈ ગઈ છે. હરિદ્વારમાં શનિવારે બપોરે વરસાદ બાદ ગંગા નદીનું જળસ્તર અચાનક વધી ગયું હતું. સુખી નદીના જળસ્તરમાં વધારો થતાં અનેક ગાડીઓ નદીમાં વહી ગઈ હતી.

ગંગા નદીમાં કારને તરતી જોઈને લોકોની ભારે ભીડ એકઠી થઈ ગઈ. જોકે રાહતની વાત એ છે કે નદીમાં કાર તણાઈ જવાને કારણે કોઈ જાનહાનિ થઈ નથી. નદીમાં ઉછાળો આવ્યા બાદ કાંગડા ઘાટ પર ગાડીઓ ફસાઈ ગઈ હતી. નદીના પાણીના સ્તરમાં વધારો થવાને કારણે ખડખડી સ્મશાન ભૂમિ પર પાર્ક કરેલી ઘણી કાર ધોવાઈ ગઈ હતી.

બીજી તરફ ભારે વરસાદના કારણે લોકોની મુશ્કેલીમાં પણ વધારો થયો હતો. અનેક કોલોનીઓમાં પાણી ભરાઈ જવાની સમસ્યાનો લોકોને સામનો કરવો પડ્યો હતો અને રસ્તાઓ પાણીમાં ડૂબી ગયા હતા. વરસાદ બાદ ઘરમાં વરસાદી પાણી ઘુસી જતાં લોકોને મુશ્કેલીનો સામનો કરવો પડ્યો હતો.