VIDEO/ રાજસ્થાનના DY. CMના દીકરાએ બનાવી રિલ, પોલીસ પ્રોટેક્શન સાથે ટ્રાફિક નિયમોનો કર્યો ભંગ
રાજસ્થાનના નાયબ મુખ્યમંત્રી પ્રેમચંદ બૈરવાના પુત્રનો એક વીડિયો સોશિયલ મીડિયા પર વાયરલ થઈ રહ્
રાજસ્થાનના નાયબ મુખ્યમંત્રી પ્રેમચંદ બૈરવાના પુત્રનો એક વીડિયો સોશિયલ મીડિયા પર વાયરલ થઈ રહ્યો છે. આ વીડિયોમાં DY. CMનો પુત્ર આશુ બૈરવા ટશનમાં ખુલ્લી હૂડવાળી જીપ ચલાવતા જોવા મળે છે. પોલીસ જીપને આગળ અને પાછળ એસ્કોર્ટ કરતી જોવા મળે છે.
આશુ બૈરવા સાથે અન્ય ત્રણ યુવકો પણ છે, જેમાંથી એકનું નામ કાર્તિકેય ભારદ્વાજ હોવાનું કહેવાય છે. કાર્તિકેય કોંગ્રેસના નેતા પુષ્પેન્દ્ર ભારદ્વાજના પુત્ર છે, જેમણે હાલના મુખ્યમંત્રી ભજનલાલ શર્મા સામે સાંગાનેર વિધાનસભા બેઠક પરથી કોંગ્રેસની ટિકિટ પર ચૂંટણી લડી હતી. જો કે, રાજકારણીઓના આ પુત્રોને મોજ-મસ્તી માટે પોલીસ એસ્કોર્ટ કેમ મળ્યો તે સમજની બહાર છે.
ડેપ્યુટી સીએમ પ્રેમચંદ બૈરવા પાસે ટ્રાન્સપોર્ટ વિભાગનો હવાલો પણ છે, પરંતુ તેમનો જ પુત્ર બેફામ વાહન ચલાવીને ટ્રાફિકના નિયમોનો ભંગ કરી રહ્યો છે.
વાયરલ વીડિયોમાં ચાર છોકરાઓ ખુલ્લી જીપમાં સવાર થઈ રહ્યા છે, જેઓ વરસાદની મોસમમાં ભીંજાઈને મજા લેતા જોવા મળે છે. તેમની પાછળ પોલીસની કાર દોડી રહી છે, જે ક્યારેક જીપની આગળ તો ક્યારેક તેની પાછળ દોડતી જોવા મળે છે. જોકે આ વીડિયો ક્યારનો અને ક્યાંનો છે તે સ્પષ્ટ નથી.
દાવો કરવામાં આવી રહ્યો છે કે જીપ ચલાવનાર યુવક નાયબ મુખ્યમંત્રી પ્રેમચંદ બૈરવાનો પુત્ર છે અને બીજી તરફ કોંગ્રેસ નેતા પુષ્પેન્દ્ર ભારદ્વાજનો પુત્ર બેઠો છે. ડેપ્યુટી સીએમના પુત્ર જે કાર ચલાવી રહ્યા છે તે કોંગ્રેસના નેતાના પુત્રની છે. આ વીડિયો કોંગ્રેસ નેતા પુષ્પેન્દ્ર ભારદ્વાજના પુત્ર કાર્તિકેય ભારદ્વાજના ઈન્સ્ટાગ્રામ એકાઉન્ટ પરથી પણ શેર કરવામાં આવ્યો છે, જેની ટેગલાઈન છે 'રાજકારણ હોય કે રોડ, અમે દરેક જગ્યાએ અમારી જ ચાલ ચાલી છીએ.'
