VIDEO: પ્રવાસીઓ માટે ખુશખબર, મનાલીમાં હવે નહીં નડે ટ્રાફિક જામ, ડ્રોન અને મોટરસાઇકલ રાઈડર્સ રાખશે બાજ નજર

VIDEO: હિમાચલ પ્રદેશના કુલ્લુ જિલ્લામાં ઉનાળુ પ્રવાસન સિઝન પૂર્વે સુરક્ષા અને ટ્રાફિક વ્યવસ્થા મજબૂત કરવામાં આવી છે. પ્રવાસીઓના ભારે ધસારાને પહોંચી વળવા મનાલી, કસોલ અને તીર્થન ઘાટીમાં 200 વધારાના પોલીસ અને હોમગાર્ડના જવાન તૈનાત કરાયા છે.

મનાલી શહેરને આઠ સેક્ટરમાં વિભાજિત કરી 24 કલાક દેખરેખ રાખવામાં આવી રહી છે. ટ્રાફિક જામ રોકવા માટે મોટરસાઈકલ રાઈડર્સ અને ડ્રોન સર્વેલન્સની મદદ લેવામાં આવી રહી છે, જેથી પ્રવાસીઓની મુસાફરી સુખદ અને સુરક્ષિત બની રહે.

પ્રશાસન દ્વારા મહિલા પોલીસ કર્મીઓ અને ક્વિક રિએક્શન ટીમને પણ સ્ટેન્ડબાય રાખવામાં આવી છે. ખાસ કરીને મે અને જૂન મહિનામાં વધતા પ્રવાસી પ્રવાહને ધ્યાનમાં રાખીને જિલ્લાના મુખ્ય માર્ગો પર વિશેષ ચેકપોસ્ટ બનાવવામાં આવી છે. એસપી મદન લાલ કૌશલના જણાવ્યા અનુસાર, પ્રવાસન ઉદ્યોગ સ્થાનિક અર્થતંત્રનો મુખ્ય આધાર હોવાથી સુરક્ષા અને સુવિધા વચ્ચે સંતુલન જાળવવા વહીવટી તંત્ર કટિબદ્ધ છે. આ વ્યાપક વ્યવસ્થાનો ઉદ્દેશ્ય કોઈપણ અપ્રિય ઘટનાને અટકાવવાનો અને શિસ્તબદ્ધ વાતાવરણ જાળવવાનો છે.