VIDEO: વડોદરાની તમામ શાળાઓ હવે માત્ર સવારની પાળીમાં જ ચાલશે, જાણો શા માટે કરાયો નિયમ

વડોદરામાં સતત વધતી ગરમી અને હીટવેવની આગાહીને ધ્યાને રાખીને જિલ્લા શિક્ષણ અધિકારી દ્વારા વિદ્યાર્થીઓના હિતમાં એક મહત્વનો આદેશ જારી કરવામાં આવ્યો છે. આ આદેશ મુજબ, વડોદરાની તમામ શાળાઓ હવે માત્ર સવારની પાળીમાં જ ચાલશે અને બપોરની પાળીઓ સંપૂર્ણપણે બંધ રાખવી પડશે, જેથી વિદ્યાર્થીઓને બપોરના આકરા તડકાથી બચાવી શકાય. આ નિયમ GSEB, CBSE અને ICSE સહિતના તમામ બોર્ડની શાળાઓને સમાન રીતે લાગુ પડશે. આ ઉપરાંત, શાળાઓમાં ઠંડા પાણી અને પંખાની સુવિધા સુનિશ્ચિત કરવા તેમજ ગરમીથી અસ્વસ્થ થનારા વિદ્યાર્થીઓ માટે ORS અને પ્રાથમિક સારવારની વ્યવસ્થા ઉપલબ્ધ રાખવા કડક સૂચના અપાઈ છે.