VIDEO: આ સુપરકાર કંપનીના લોગોમાં બિરાજમાન છે વિઘ્નહર્તા ભગવાન શ્રી ગણેશ

ભારતભરમાં ગણેશોત્સવની ઉજવણી ચાલી રહી છે. આ વચ્ચે એક અનોખી સુપરકાર કંપનીની ચર્ચા સોશિયલ મીડિયા અને ઓટોમોબાઈલ પ્રેમીઓમાં ચર્ચાનો વિષય બની રહી છે.  આ કંપનીએ લકના પ્રતીક તરીકે ભગવાન ગણેશનો ફોટો પોતાના લોગોમાં સામેલ કર્યો છે, જે તેની સફળતાનું કારણ પણ ગણાવવામાં આવે છે. આ કંપનીનું નામ છે લાન્ઝાન્તે(Lanzante), જે યુનિક અને રેસિંગ કારોના નિર્માણમાં નામના પ્રાપ્ત કરી ચૂકી છે.

Lanzanteની શરૂઆત

લાન્ઝાન્તેની સ્થાપના 1970ના દાયકામાં યુનાઈટેડ કિંગડમના હેમ્પશાયરમાં થઈ હતી. પોલ લાન્ઝાન્તે નામના એક એન્જિનિયરે એક નાનકડા ગેરેજથી આ કંપનીની શરૂઆત કરી હતી. તેમણે સુપરકારોનું રિસ્ટોરેશન અને તેમને રેસ માટે ટ્યુન કરવાનું કામ શરૂ કર્યું. તેમની કુશળતા અને સમર્પણથી 1995માં તેમણે પ્રતિષ્ઠિત લેમાન્સ રેસમાં મેકલેરન એફ-1 જીટીઆરને જીત અપાવી, જેનાથી તેમનું નામ રેસિંગ જગતમાં ગુંજવા લાગ્યું. આ સફળતાએ તેમને મેકલેરન જેવી પ્રતિષ્ઠિત કંપનીની નજરમાં લાવ્યા.

ગણેશજીનો લોગો

જેમ જેમ લાન્ઝાન્તેની કંપની લોકપ્રિય થતી ગઈ, તેમને એક અનોખી ઓળખ માટે લોગોની જરૂર પડી. આ દરમિયાન, વિશ્વવિખ્યાત બેન્ડ બીટલ્સના સભ્ય જ્યોર્જ હેરિસનએ પોલ લાન્ઝાન્તેને ભગવાન ગણેશ વિશે જણાવ્યું. હેરિસને કહ્યું કે ગણેશજી વિધ્નહર્તા છે અને તેમની કૃપાથી જીવનમાં લક આવે છે. આ પ્રેરણાથી પ્રભાવિત થઈને, લાન્ઝાન્તેએ પોતાના લોગોમાં ગણેશજીનો સમાવેશ કર્યો. આ લોગો લાન્ઝાન્તે માટે શુભસૂચક સાબિત થયો, અને કંપનીની સફળતામાં તેનો ફાળો ગણવામાં આવે છે.

સફળતાની સફર

લાન્ઝાન્તેની સફળતા એક નવી ઊંચાઈએ પહોંચી જ્યારે 2018માં તેમને ક્વીન્સ એવોર્ડ ફોર એન્ટરપ્રાઈઝથી સન્માનિત કરવામાં આવ્યા. આ પુરસ્કારથી કંપનીની આંતરરાષ્ટ્રીય સ્તરે ઓળખ વધી. 2025માં, લાન્ઝાન્તેએ પોતાનું પહેલું કાર મોડલ 95-99 લોન્ચ કર્યું, જેમાં ગણેશજીનો લોગો ઝળહળી રહ્યો. આ કારની મર્યાદિત 59 યુનિટ્સ જ બનાવવામાં આવશે, અને તેની કિંમત આશરે 15 કરોડ રૂપિયા રાખવામાં આવી છે. આ કાર રેસિંગ અને રોડ લીગલ યુનિકોર્ન તરીકે ઓળખાઈ રહી છે.

ગણપતિ બાપ્પાનો આશીર્વાદ

જ્યોર્જ હેરિસનની સલાહે લાન્ઝાન્તેને એક અનોખી દિશા આપી, અને ગણેશજીનો લોગો તેમના માટે લકનો સ્ત્રોત બન્યો છે. ભારતીય સંસ્કૃતિનો આ સંગમ આંતરરાષ્ટ્રીય સ્તરે એક સુપરકાર કંપનીની સફળતા સાથે જોડાયો છે, જે ગણેશજીની વિઘ્નહર્તા શક્તિનો પુરાવો છે. ગણેશોત્સવના આ પવિત્ર પ્રસંગે, લાન્ઝાન્તેની આ કહાણી ભક્તો માટે પ્રેરણાદાયી બની રહી છે.