VIDEO : NARMDA જિલ્લામાં ખુલ્લેઆમ દારૂના અડ્ડાઓ ધમધમી રહ્યા હોવાના ગંભીર આક્ષેપો

નર્મદા જિલ્લામાં દારૂબંધીના કાયદાનો સરેઆમ ભંગ થતો હોવાના અને ખુલ્લેઆમ દારૂના અડ્ડાઓ ધમધમી રહ્યા હોવાના ગંભીર આક્ષેપો ઉઠ્યા છે. પ્રાપ્ત અહેવાલો મુજબ, મહારાષ્ટ્ર અને મધ્યપ્રદેશની સરહદ પરથી કેમિકલયુક્ત ડુપ્લીકેટ ઈંગ્લિશ દારૂનો જથ્થો સપ્લાય કરવામાં આવે છે. સાગબારાની ધનશેરા ચેકપોસ્ટ અને નર્મદા ડેમમાં હોડીઓ દ્વારા બેરોકટોક રીતે દારૂ ઘૂસાડવામાં આવતો હોવાનું સામે આવ્યું છે. ઉમલ્લા, રાજપારડી, કુંવરપરા, ચિત્રોલ અને કેવડિયા જેવા વિસ્તારોમાં દારૂના સેન્ટરો ચાલતા હોવાનો દાવો કરવામાં આવ્યો છે. આ સમગ્ર નેટવર્કમાં રાજકીય આગેવાનો અને ઉચ્ચ પોલીસ અધિકારીઓની મિલીભગત હોવાનો આક્ષેપ કરવામાં આવ્યો છે, જેમાં ઘણા સમયથી એક જ જગ્યાએ તૈનાત પોલીસ અધિકારીઓની કામગીરી પર પણ સવાલો ઉઠ્યા છે. યુવાધનને બરબાદીમાંથી બચાવવા માટે તંત્ર દ્વારા કડક કાર્યવાહીની માંગ કરવામાં આવી છે. ચેતવણી આપવામાં આવી છે કે જો વહેલી તકે દારૂના આ અડ્ડાઓ પર તવાઈ નહીં બોલાવાય અને સરહદો સુરક્ષિત કરવા માટે SRP તૈનાત નહીં કરાય, તો તમામ સંડોવાયેલા રાજકીય આગેવાનોના નામ જાહેરમાં જાહેર કરવામાં આવશે.