VIDEO / PM નરેન્દ્ર મોદીએ નીરજ ચોપરા સાથે કરી વાત, કહ્યું- 'મનમાંથી ગોલ્ડ કાઢી નાખો, તમે પોતે...'

વડાપ્રધાન નરેન્દ્ર મોદીએ પેરિસ ઓલિમ્પિક 2024માં જેવલિન થ્રોમાં સિલ્વર મેડલ જીતનાર ભારતીય જેવલિન થ્રોઅર નીરજ ચોપરા સાથે વાત કરી હતી. પીએમ મોદીએ નીરજ ચોપરાને તેની જીત પર અભિનંદન પાઠવ્યા હતા. આ વાતચીતનો વીડિયો સામે આવ્યો છે. આ દરમિયાન પીએમ મોદીએ નીરજ ચોપરાને કહ્યું કે, 'તમે તમારા મનમાંથી ગોલ્ડ કાઢી નાખો, તમે પોતે જ સૌથી મોટા ગોલ્ડ છો.'

પીએમ મોદીએ નીરજને ફોન કરીને અભિનંદન આપ્યા અને કહ્યું- 'તમે દેશને ગૌરવ અપાવ્યું છે. આખો દેશ રાત્રે (8મી ઓગસ્ટ) તમારી ઈવેન્ટ જોઈ રહ્યો હતો. દેશની આશાઓ તમારા પર હતી.'

નીરજ ચોપડાએ કહ્યું- 'જે વિચાર્યું તે ન થયું'

આ દરમિયાન નીરજ ચોપડાએ પીએમ મોદીને કહ્યું- 'મેં જે વિચાર્યું હતું તેમ નથી થયું. લોકોને ગોલ્ડની અપેક્ષાઓ હતી, મેં પૂરા પ્રયાસ કર્યા પણ એવું બન્યું નહીં. સ્પર્ધા ખૂબ જ મજબૂત હતી. આમ છતાં મેડલ લાવીને હું ખુશ છું.'

પીએમ મોદીએ નીરજને કહ્યું- 'ઈજા છતાં સારું પ્રદર્શન કર્યું'

આ દરમિયાન વડાપ્રધાન નરેન્દ્ર મોદીએ કહ્યું કે, 'તમે ઈજાગ્રસ્ત હોવા છતાં સારું પ્રદર્શન કર્યું.' આ દરમિયાન પીએમ મોદીએ અરશદ નદીમનું નામ લીધા વિના નીરજ ચોપરાને કહ્યું કે, 'તમે કહ્યું હતું કે તેની સાથે સ્પર્ધા કઠિન છે.'

ભવિષ્યમાં વધુ મહેનત કરીશ

આ વાતચીત દરમિયાન નીરજ ચોપરાએ કહ્યું કે, આગામી દિવસોમાં વધુ સ્પર્ધાઓ આવવાની છે, તે તેના માટે વધુ મહેનત કરશે. આ વાતચીત દરમિયાન પીએમ મોદી નીરજને સતત પ્રોત્સાહિત કરી રહ્યા હતા.

પીએમ મોદીએ નીરજ ચોપરાની માતાના વખાણ કર્યા

આ દરમિયાન વડાપ્રધાન નરેન્દ્ર મોદીએ નીરજ ચોપરાની માતાના પણ વખાણ કર્યા હતા. વાસ્તવમાં, નીરજની માતા સરોજ દેવીએ કહ્યું હતું- 'અમે ખૂબ ખુશ છીએ. અમારા માટે સિલ્વર પણ ગોલ્ડ સમાન જ છે. જેને ગોલ્ડ મેડલ મળ્યો છે તે પણ અમારો છોકરો છે. ખૂબ મહેનત કરે છે.'

આવી સ્થિતિમાં, નીરજ ચોપરાની માતાએ પાકિસ્તાની જેવલિન થ્રોઅર અરશદ નદીમ વિશે જે કહ્યું તેનાથી વડાપ્રધાન ખૂબ જ ખુશ દેખાતા હતા.પીએમ મોદીએ કહ્યું, 'તમારા પરિવાર દ્વારા દેખાડવામાં આવેલી ખેલદિલી અને તમે જે રીતે તે ખેલાડી (અરશદ નદીમ) ની પ્રશંસા કરી તેના માટે હું તમને અભિનંદન આપવા માંગુ છું.'