VIDEO: મંચ પરથી ભાષણ આપી રહ્યા હતા નેતાજી ને અચાનક લાઈટો ગઈ, પછી જોવા જેવી થઈ!

ઉત્તર પ્રદેશમાં વિધાનસભા ચૂંટણી નજીક આવતાં તમામ રાજકીય પક્ષોએ તૈયારીઓ તેજ કરી છે. આ દરમિયાન બલિયા જિલ્લામાં યોજાયેલા નિષાદ પાર્ટીના કાર્યકર સંમેલનમાં એક અનોખો બનાવ બન્યો. રાષ્ટ્રીય અધ્યક્ષ સંજય નિષાદ કાર્યકરોને સંબોધી રહ્યા હતા ત્યારે અચાનક લાઈટો ગુલ થઈ ગઈ. ત્યારબાદ તેમણે ટોર્ચના અજવાળામાં પોતાનું સંબોધન ચાલુ રાખ્યું.

સંબોધન દરમિયાન સંજય નિષાદે પોતાની જ પાર્ટીના બ્રાહ્મણ નેતા કનક પાંડે પર આકરા પ્રહારો કર્યા. તેમણે કહ્યું કે જો તમારી જાતિના લોકો સંજય નિષાદનો વિરોધ કરશે તો તમે ધારાસભ્ય તો દૂર, સરપંચ પણ બની શકશો નહીં. આ ઉપરાંત તેમણે મંચ પર હાજર મહિલા મોરચાના અધ્યક્ષ અને કેટલાક કાર્યકરો અંગે પણ વિવાદાસ્પદ ટિપ્પણીઓ કરી હતી.

'જો જમીન ખાલી હૈ, વો જમીન હમારી હૈ' કહેતા જ લાઈટો ગઈ

સંજય નિષાદે પોતાના ભાષણ દરમિયાન બ્રાહ્મણ સમાજને લઈને અનેક નિવેદનો આપ્યા. તેમણે કનક પાંડેનું નામ લઈને કહ્યું કે તેમની જ જાતિના લોકો એમનો વિરોધ કરી રહ્યા છે. આ દરમિયાન તેમણે 'જો જમીન ખાલી હૈ, વો જમીન હમારી હૈ' એવું નિવેદન આપ્યું અને એ જ સમયે લાઈટો ગઈ હતી.

તેમણે વધુમાં કહ્યું કે, "તમે તમારી જાતિને સંભાળો, અમે અમારી જાતિને સંભાળીશું. પહેલાં તમે તમારી જાતિના નેતા બનો. જો તમારી જાતિના લોકો નિષાદ સમાજનો વિરોધ કરશે તો તમે ધારાસભ્ય તો દૂર, સરપંચ પણ બની શકશો નહીં."

અહેવાલ મુજબ, સંજય નિષાદ બલિયાના PWD ગેસ્ટ હાઉસમાં રોકાયા હતા. ત્યાં કેટલાક યુવકોએ અગાઉ બલિયાના લોકો અંગે આપેલા તેમના એક નિવેદનના વિરોધમાં સૂત્રોચ્ચાર કર્યો હતો. સંજય નિષાદને લાગ્યું કે વિરોધ કરનારા બ્રાહ્મણ સમાજના લોકો હતા, જેના કારણે તેમણે મંચ પરથી બ્રાહ્મણ સમાજને નિશાન બનાવ્યો.

કનક પાંડેએ આપ્યો જવાબ

સંજય નિષાદના નિવેદન પર પ્રતિક્રિયા આપતા કનક પાંડેએ જણાવ્યું કે તેમની સાથે સમગ્ર બ્રાહ્મણ સમાજ છે. તેમણે કહ્યું કે જે યુવકો વિરોધ કરી રહ્યા હતા તેઓ કોંગ્રેસ સાથે જોડાયેલા હતા, પરંતુ સંજય નિષાદે તેમને બ્રાહ્મણ સમાજના લોકો સમજી લીધા. કાર્યક્રમ દરમિયાન સંજય નિષાદે મંચ પર બેઠેલા મહિલા મોરચાના અધ્યક્ષને પણ જાહેરમાં ઉતારી પાડ્યા હતા. ઉપરાંત, તેમણે પોતાના જ કાર્યકરો અંગે પણ વિવાદાસ્પદ ટિપ્પણી કરતાં કહ્યું કે, "આ લોકો અખાડાના નહીં, ભાડાના લોકો છે." આ સમગ્ર ઘટનાને લઈને ઉત્તર પ્રદેશના રાજકીય વર્તુળોમાં ચર્ચા તેજ બની છે.