VIDEO: ભારત-ફિલિપાઇન્સ સંબંધોમાં EV ક્ષેત્ર બનશે ‘ગેમ ચેન્જર’  વેપાર 3 અબજ ડોલરને પાર

ભારત અને ફિલિપાઇન્સ વચ્ચેના દ્વિપક્ષીય સંબંધોમાં છેલ્લાં કેટલાંક વર્ષોમાં અભૂતપૂર્વ પ્રગતિ જોવા મળી છે. ભારતમાં ફિલિપાઇન્સના રાજદૂત જોસેલ એફ. ઇગ્નાસિઓએ આ સંબંધોની સફળતા અને ભવિષ્યની શક્યતાઓ અંગે ઉત્સાહ વ્યક્ત કર્યો છે.

વેપારમાં રેકોર્ડબ્રેક વૃદ્ધિ

રાજદૂત ઇગ્નાસિઓએ જણાવ્યું હતું કે, "ભારત અને ફિલિપાઇન્સના સંબંધો ખાસ કરીને છેલ્લા ત્રણ વર્ષમાં ખૂબ જ ઉચ્ચ સ્તરે પહોંચ્યા છે. વર્ષ 2023માં અમારો દ્વિપક્ષીય વેપાર પ્રથમ વખત 3 અબજ ડોલરની સપાટી વટાવી ગયો હતો, અને હવે આપણે ઝડપથી 4 અબજ ડોલરના આંકડા તરફ આગળ વધી રહ્યા છીએ."  વેપારના આ આંકડા દર્શાવે છે કે બંને દેશો વચ્ચે આર્થિક સહયોગ સતત મજબૂત બની રહ્યો છે.

ઇલેક્ટ્રિક વ્હીકલ અને ટેકનોલોજી ક્ષેત્રે નવી તકો

વેપારમાં આ નોંધપાત્ર વૃદ્ધિ બાદ હવે બંને દેશો આગળના નવા લક્ષ્યાંકો તરફ જોઈ રહ્યા છે. રાજદૂત ઇગ્નાસિઓએ ભવિષ્યની યોજનાઓ અંગે વાત કરતા ઉમેર્યું કે, "હવે અમે એ જોઈ રહ્યા છીએ કે આ સંબંધોમાં આગળનું નવું શિખર કયું હોઈ શકે... હું ઇચ્છું છું કે ફિલિપાઇન્સ અને ભારત ટેક્નોલોજીના ક્ષેત્રમાં પોતાની વિસ્તરતી ક્ષમતાઓનો વધુ ઉપયોગ કરે, ખાસ કરીને ઈલેક્ટ્રિક વ્હીકલ (EV) ઉદ્યોગમાં સહયોગ વધારે."

ભવિષ્યની દ્રષ્ટિ

હરિત ઊર્જા અને સસ્ટેનેબલ ટ્રાન્સપોર્ટ તરફ વિશ્વ આગળ વધી રહ્યું છે ત્યારે, ભારતની વિશાળ EV ઈકોસિસ્ટમ અને ઉત્પાદન ક્ષમતા અને ફિલિપાઇન્સની ટેકનિકલ જરૂરિયાતો વચ્ચેની આ ભાગીદારી બંને દેશો માટે ગેમ-ચેન્જર સાબિત થઈ શકે છે.