ટ્રમ્પની જીત સાથે જ USએ છોડી વિશ્વની સૌથી શક્તિશાળી પરમાણુ મિસાઈલ, શું ચીન-રશિયાને આપ્યો કોઈ મેસેજ?

•  Minuteman III મિસાઈલની રેન્જ લગભગ 10000 કિલોમીટર હોવાનું કહેવાય છે. આ મિસાઈલ અમેરિકાથી રશિયા અને ચીનને પણ નિશાન બનાવી શકે છે.

અમેરિકાએ રાષ્ટ્રપતિની ચૂંટણીમાં ડોનાલ્ડ ટ્રમ્પની જીતની જાહેરાત પહેલા વિશ્વની સૌથી શક્તિશાળી પરમાણુ મિસાઈલ Minuteman IIIનું પરીક્ષણ કર્યું છે. Minuteman III એ ઇન્ટરકોન્ટિનેન્ટલ બેલિસ્ટિક મિસાઇલ (ICBM) છે. આ પરીક્ષણે બતાવ્યું છે કે અમેરિકા 30 મિનિટમાં વિશ્વના કોઈપણ સ્થાન પર પરમાણુ હુમલો કરવા સક્ષમ છે. US એરફોર્સે આ પરીક્ષણને નિયમિત કવાયત ગણાવી છે, જો કે તેના સમયને લઈને પ્રશ્નો ઉભા થઈ રહ્યા છે. કેટલાક નિષ્ણાતો કહે છે કે આ પરીક્ષણ ચીન અને રશિયા માટે એક સંદેશ છે કે અમેરિકન સૈન્યની શક્તિ હજી નબળી પડી નથી.

આ પણ વાંચો : ડોનાલ્ડ ટ્રમ્પનું પ્રમુખ બનવું, ભારત માટે તો કપરાં ચઢાણ જ સાબિત થશે, જાણો કેમ? 

અમેરિકાએ ક્યાંથી પરીક્ષણ કર્યું?

US એરફોર્સે કહ્યું કે તેણે કેલિફોર્નિયામાં વેન્ડેનબર્ગ સ્પેસ ફોર્સ બેઝથી Minuteman III ઇન્ટરકોન્ટિનેન્ટલ બેલિસ્ટિક મિસાઇલ (ICBM) નું પ્રશિક્ષણ પ્રક્ષેપણ કર્યું છે. બેઝએ જણાવ્યું હતું કે, "એર ફોર્સ ગ્લોબલ સ્ટ્રાઈક કમાન્ડ એરમેન અને નેવી એરક્રુની સંયુક્ત ટીમે 5 નવેમ્બર, 2024 ના રોજ, પેસિફિક સમય અનુસાર રાત્રે 11:01 વાગ્યે  એરબોર્ન લોંચ કંટ્રોલ સિસ્ટમ (ALCS)થી વેન્ડેનબર્ગ સ્પેસ ફોર્સ બેઝ, કેલિફોર્નિયાથી બહુવિધ લક્ષિત રી-એન્ટ્રી વાહનોથી સજ્જ એક નિઃશસ્ત્ર Minuteman IIII ઇન્ટરકોન્ટિનેન્ટલ બેલેસ્ટિક મિસાઇલ લોન્ચ કરી.

મિસાઈલ પરીક્ષણનું લક્ષ્ય શું હતું?

સ્પેસ લોંચ ડેલ્ટા 30 ના ડેપ્યુટી કમાન્ડર કર્નલ ડોરિયન હેચરે જણાવ્યું હતું કે, "આ Minuteman III પરીક્ષણ પ્રક્ષેપણ વેન્ડેનબર્ગ, ગ્લોબલ સ્ટ્રાઈક કમાન્ડ અને યુએસ નેવીના કર્મચારીઓની મિશનની  તૈયારી, ચપળતા અને વ્યાવસાયીકરણનું ઉદાહરણ આપે છે." તેમણે એમ પણ કહ્યું હતું કે, "વેન્ડેનબર્ગ ખાતેની આ પ્રતિરોધક પ્રણાલીની દરેક કસોટી રાષ્ટ્રની મજબૂત ક્ષમતાઓને રેખાંકિત કરે છે. 

કમાન્ડરે કહ્યું- અમે મિસાઈલની ક્ષમતા તપાસી

એર ફોર્સ ગ્લોબલ સ્ટ્રાઈક કમાન્ડના કમાન્ડર જનરલ થોમસ એ. બુસીએરે જણાવ્યું હતું કે, "આ પરીક્ષણો દર્શાવે છે કે જ્યારે રાષ્ટ્રપતિ દ્વારા બોલાવવામાં આવે ત્યારે સ્ટ્રાઈકર એરમેન લડાઈમાં શું લાવે છે." તે આપણા રાષ્ટ્રની રક્ષા કરવા અને અમારા સહયોગીઓ અને ભાગીદારોની સુરક્ષા માટે વ્યૂહાત્મક બેકસ્ટોપ તરીકે સેવા આપે છે."

મિસાઈલ 4200 માઈલના અંતર સુધી પહોંચી હતી

ICBM ના રી-એન્ટ્રી વ્હીકલ આશરે 4,200 માઈલ પ્રવાસ કરીને યુ.એસ. આર્મી સ્પેસ અને મિસાઇલ ડિફેન્સ કમાન્ડના રોનાલ્ડ રીગન બેલિસ્ટિક મિસાઇલ ડિફેન્સ ટેસ્ટ સાઇટ પર પહોંચ્યા, જે માર્શલ આઇલેન્ડ રિપબ્લિકના ક્વાજાલિન એટોલ પર સ્થિત છે. આ સમય દરમિયાન, રીગન ટેસ્ટ સાઇટ સેન્સર્સમાંથી મિસાઇલ-સંબંધિત ડેટા એકત્રિત કરવામાં આવ્યો હતો, જેમાં હાઇ-ફિડેલિટી મેટ્રિક અને સિગ્નેચર રડાર, તેમજ ઓપ્ટિકલ સેન્સર્સ અને ટેલિમેટ્રીનો સમાવેશ થાય છે. આ પરીક્ષણો માટે, RTS ટીમના સભ્યોએ સિસ્ટમની કામગીરીનું મૂલ્યાંકન કરવા ફ્લાઇટના અંતિમ તબક્કા દરમિયાન રડાર, ઓપ્ટિકલ અને ટેલિમેટ્રી ડેટા એકત્રિત કર્યો.

Minuteman III કેટલી શક્તિશાળી મિસાઇલ છે

Minuteman III મિસાઇલની ગણતરી અમેરિકાના સૌથી શક્તિશાળી હથિયારોમાં થાય છે. આ મિસાઈલ એટલી શક્તિશાળી છે કે તે કોઈપણ નાના દેશના અસ્તિત્વને નષ્ટ કરી શકે છે. Minuteman IIIની રેન્જ અને પાવર તેને વિશ્વની સૌથી શક્તિશાળી મિસાઇલોમાંથી એક બનાવે છે. Minuteman III મિસાઈલની રેન્જ લગભગ 10000 કિલોમીટર હોવાનું કહેવાય છે. આ મિસાઈલ અમેરિકાથી રશિયા અને ચીનને પણ નિશાન બનાવી શકે છે.