VIDEO: અમેરિકામાં ઓમ શાંતિ.. નો નાદ ગુંજ્યો, ડેમોક્રેટિક પાર્ટીના કાર્યક્રમમાં હિન્દુ પૂજારીનું ભાષણ

અમેરિકાના શિકાગોમાં ડેમોક્રેટિક નેશનલ કન્વેન્શનના ત્રીજા દિવસે એક હિંદુ પૂજારીએ પહેલું ભાષણ આપ્યું. આ દરમિયાન સમગ્ર હોલ ‘ઓમ શાંતિ શાંતિ’ના નાદથી ગુંજી ઉઠ્યો હતો. આ દરમિયાન મેરીલેન્ડના એક મંદિરના પૂજારી રાકેશ ભટ્ટે અમેરિકાની એકતા માટે આશીર્વાદ માંગતી વૈદિક પ્રાર્થના કરી હતી. રાકેશ ભટ્ટે તેમના વક્તવ્ય દરમિયાન કહ્યું હતું કે, "આપણી વચ્ચે ભલે મતભેદો હોય, જ્યારે રાષ્ટ્રની વાત આવે ત્યારે આપણે એક થવું જોઈએ. આપણે સર્વસંમત હોવું જોઈએ. આપણે સાથે મળીને વિચારવું જોઈએ. આ બધું સમાજના ભલા માટે છે."

ગુરુવારે કમલા હેરિસના ભાષણ પહેલાં મંચ પર લેતાં રાકેશ ભટ્ટે અમેરિકન લોકોને 'વસુધૈવ કુટુંબકમ'ની વૈદિક પરંપરામાં વિશ્વાસ ધરાવતા નેતાને ચૂંટવાની અપીલ કરી હતી. રાકેશ ભટ્ટ મેરીલેન્ડમાં શ્રી શિવ વિષ્ણુ મંદિરના પૂજારી છે. તે ભારતીય મૂળના અને બેંગલુરુથી અમેરિકામાં સ્થાયી થયા છે. તેઓ હિન્દી, અંગ્રેજી, સંસ્કૃત, તમિલ, તેલુગુ, કન્નડ અને તુલુ ભાષામાં વાત કરી શકે છે. અને ત્રણ ભાષાઓ સંસ્કૃત, અંગ્રેજી અને કન્નડમાં સ્નાતક અને માસ્ટર ડિગ્રી ધરાવે છે.

X પર જુઓ

'ડેમોક્રેટિક પાર્ટી સર્વસમાવેશકતા અને વિવિધતા માટે પ્રતિબદ્ધ છે'

ડેમોક્રેટિક પાર્ટીના ડેપ્યુટી નેશનલ ફાયનાન્સ ચેર અજય ભુટોરિયાએ ટ્વિટર પર આ વિશે પોસ્ટ કર્યું. "આ એક મહત્ત્વપૂર્ણ ક્ષણ છે જે દર્શાવે છે કે ડેમોક્રેટિક પાર્ટી સમાવેશ અને વિવિધતા માટે પ્રતિબદ્ધ છે." અજય ભુટોરિયાએ વધુમાં જણાવ્યું હતું કે, "ભારતીય અમેરિકન સમુદાયની સમૃદ્ધ સાંસ્કૃતિક અને આધ્યાત્મિક પરંપરાઓને આટલા મોટા મંચ પર સન્માનિત જોવું પ્રોત્સાહક છે. આ ક્ષણ અમેરિકન સમાજમાં આપણા સમુદાયના વધતા પ્રભાવને દર્શાવે છે."

કમલા હેરિસની પકડ વધુ મજબૂત બની રહી છે
આ વર્ષના અંતમાં અમેરિકી રાષ્ટ્રપતિની ચૂંટણીમાં ડોનાલ્ડ ટ્રમ્પને હરાવવાની આશા સાથે ડેમોક્રેટ્સ સત્તાવાર રીતે 59 વર્ષીય કમલા હેરિસને સત્તા સોંપી રહ્યા છે. અલગ-અલગ સર્વેની વાત કરીએ તો ટ્રમ્પ હજુ પણ આ રેસમાં આગળ છે. જો કે, હેરિસ પણ પ્રગતિ કરી રહ્યા હોવાનું જણાઈ રહ્યું છે.