ચૂંટણી જીત્યા બાદ પહેલીવાર કોઈ વિદેશી નેતાને મળ્યા ટ્રમ્પ, જાણો કોની સાથે કરી આ ખાસ મુલાકાત

અમેરિકાના રાષ્ટ્રપતિની ચૂંટણી જીત્યા બાદ ડોનાલ્ડ ટ્રમ્પ ગુરુવારે પહેલીવાર કોઈ વિદેશી નેતાને મળ્યા હતા. અમેરિકાના નવા ચૂંટાયેલા રાષ્ટ્રપતિ ટ્રમ્પે આર્જેન્ટિનાના રાષ્ટ્રપતિ જેવિયર માઈલી  સાથે તેમના માર-એ-લાગો ક્લબમાં વાત કરી હતી. એક અધિકારીએ નામ ન આપવાની શરતે આ માહિતી આપી કારણ કે આ મીટિંગ વિશે કોઈ જાહેર જાહેરાત કરવામાં આવી નથી. સૂત્રએ જણાવ્યું કે બંને નેતાઓ વચ્ચેની બેઠક સફળ રહી અને આ પછી માઈલી રોકાણકારોને પણ મળ્યા હતા. 

માઈલી વારંવાર ટ્રમ્પના વખાણ કરે છે

માઈલી એક સ્વ-ઘોષિત 'અરાજક-મૂડીવાદી' છે અને તેમણે ઘણીવાર ટ્રમ્પની પ્રશંસા કરી છે. ટ્રમ્પને મળ્યા બાદ માઈલીએ 'માર-એ-લાગો' ખાતે 'અમેરિકા ફર્સ્ટ પોલિસી ઈન્સ્ટિટ્યૂટ ગાલા'ને સંબોધીત કર્યું હતું. આ દરમિયાન, તેમણે ડાબેરી વિચારધારાઓની ટીકા કરી અને X (અગાઉ ટ્વિટર) ના માલિક એલોન મસ્કની પ્રશંસા કરતા કહ્યું કે તેમનું સોશિયલ મીડિયા પ્લેટફોર્મ માનવતાને 'બચાવ' કરવામાં મદદ કરી રહ્યું છે. નવેમ્બર 2023માં માઈલી આર્જેન્ટિનાના રાષ્ટ્રપતિ બન્યા બાદ ટ્રમ્પે સોશિયલ મીડિયા પર લખ્યું હતું કે, 'તમે તમારા દેશને સાચા માર્ગ પર લાવશો અને આર્જેન્ટિનાને ફરીથી મહાન બનાવશો!'

આ પણ વાંચો : મેલાનિયા વ્હાઇટ હાઉસમાં નહીં રહે, શું ડોનાલ્ડ ટ્રમ્પના પત્ની સાથેના સંબંધો સારા નથી?

માઈલી અને ટ્રમ્પ ફેબ્રુઆરીમાં પહેલી વાર મળ્યા હતા

માઈલી અને ટ્રમ્પ પહેલીવાર ફેબ્રુઆરીમાં વોશિંગ્ટનમાં 'કન્ઝર્વેટિવ પોલિટિકલ એક્શન કોન્ફરન્સ' (CPAC)માં મળ્યા હતા. માઈલી એ ટ્રમ્પને જોતાની સાથે જ ગળે લગાવી, 'પ્રેસિડેન્ટ, પ્રેસિડેન્ટ.. ' એવી બૂમો પાડી અને તેમની સાથે તસવીરો ખેંચાવી. આર્જેન્ટિનાના રાષ્ટ્રપતિ માઈલી તેમના વિચિત્ર વ્યક્તિત્વ માટે જાણીતા છે. ટીવી પર આર્જેન્ટિનાની 'રાજકીય જાતિ' સામે અવાજ ઉઠાવનાર તે સૌપ્રથમ હતા.  જમણેરી નેતાએ ચૂંટણી ઝુંબેશ દરમિયાન તેમના ચૂંટણી પ્રતીક તરીકે ચેઇનસોનો ઉપયોગ કર્યો હતો, અને તેમનો સંદેશ આપ્યો હતો કે તેઓ જાહેર ખર્ચમાં ભારે ઘટાડો કરવા અને સરકારી મંત્રાલયોને નાબૂદ કરવા માગે છે.