જનતાએ ચૂંટણીમાં હરાવ્યા, નવાઝ શરીફે સીધા બનાવી દીધા PoKના વડાપ્રધાન! બેરિસ્ટર ગિલાનીની વરણીથી ભડકો!
છેલ્લું અપડેટ : 28 Aug 2026
પાકિસ્તાનના ગેરકાયદે કબજા હેઠળના કાશ્મીર (PoK)માં ચાલી રહેલી રાજકીય અસ્થિરતા વચ્ચે બેરિસ્ટર ઇફ્તિખાર અલી ગિલાનીને PoKના કથિત વડાપ્રધાન તરીકે ચૂંટવામાં આવ્યા છે. શુક્રવારે મુઝફ્ફરાબાદ સ્થિત PoKની કથિત વિધાનસભામાં યોજાયેલા મતદાનમાં સત્તાધારી પાકિસ્તાન મુસ્લિમ લીગ-નવાઝ (PML-N)ના ઉમેદવાર ગિલાનીને ૪૪માંથી ૩૦ મત મળ્યા હતા, જ્યારે તેમના હરીફ પાકિસ્તાન પીપલ્સ પાર્ટી (PPP)ના મુખ્તાર અહમદને માત્ર ૧૪ મત મળ્યા હતા.
ચૂંટણી હાર્યા છતાં પાછલા બારણેથી એન્ટ્રી
PML-N પ્રમુખ નવાઝ શરીફે ગુરુવારે જ આ પદ માટે ગિલાનીના નામની જાહેરાત કરી હતી. જોકે, ગિલાની જે સામાન્ય બેઠક પરથી સીધી ચૂંટણી લડ્યા હતા, ત્યાં તેમને કારમી હારનો સામનો કરવો પડ્યો હતો. સામાન્ય ચૂંટણીમાં પરાજય બાદ તેમને ટેકનોક્રેટ માટે અનામત રાખવામાં આવેલી બેઠક પરથી પાછલા બારણે વિધાનસભામાં પ્રવેશ અપાવવામાં આવ્યો હતો.
વિધાનસભા ચૂંટણીમાં ગોટાળા અને હિંસા
PoK વિધાનસભા માટે ૨૭ જુલાઈ, ૨ ઓગસ્ટ અને ૩ ઓગસ્ટ એમ ત્રણ તબક્કામાં ચૂંટણી યોજાઈ હતી. આ દરમિયાન વ્યાપક પાયે ધાંધલીના આક્ષેપો થયા હતા અને હિંસક અથડામણો પણ જોવા મળી હતી. કુલ ૫૩ બેઠકોમાંથી ૭ બેઠકો (પૂંચ અને સુધનૌતી જિલ્લા) પર કાયદો અને વ્યવસ્થાની ખરાબ સ્થિતિને કારણે હજુ સુધી ચૂંટણી થઈ શકી નથી. હાલ ૪૬ સભ્યો પૈકી શુક્રવારે માત્ર ૪૪ સભ્યોએ મતદાનમાં ભાગ લીધો હતો. પક્ષ સાથેના મતભેદોને કારણે PML-Nના પ્રાદેશિક અધ્યક્ષ શાહ ગુલામ કાદિર સત્રથી દૂર રહ્યા હતા.
PoKમાં લોકોનો ઉગ્ર વિરોધ અને અસંતોષ
જૂનની શરૂઆતથી જ ‘જોઇન્ટ અવામી એક્શન કમિટી’ (JAAC)ના નેતૃત્વ હેઠળ સ્થાનિક લોકો શરણાર્થીઓ માટે અનામત રાખવામાં આવેલી ૧૨ બેઠકો સામે મોટા પાયે વિરોધ પ્રદર્શન કરી રહ્યા છે. આ પ્રદર્શનોમાં અત્યાર સુધીમાં ઘણા નાગરિકો અને સુરક્ષાકર્મીઓના મોત થઈ ચૂક્યા છે. સરકાર દ્વારા આ સંગઠન પર પ્રતિબંધ લાદવામાં આવ્યો હોવા છતાં વિરોધ યથાવત છે. સામાન્ય ચૂંટણી હારેલા નેતાને અનામત બેઠક પરથી લાવી સીધા વડાપ્રધાન બનાવી દેવાતાં PoKમાં જનઆક્રોશ વધુ ભડકવાની સંભાવના છે.
ભારતનું સ્પષ્ટ વલણ
ભારતે ફરી એકવાર સ્પષ્ટ કર્યું છે કે જમ્મુ-કાશ્મીર અને લદ્દાખ સહિતનો સમગ્ર કેન્દ્રશાસિત પ્રદેશ ભારતનો અભિન્ન અને અવિભાજ્ય અંગ છે. નવી દિલ્હીએ સતત દોહરાવ્યું છે કે પાકિસ્તાને આ વિસ્તારો પર ગેરકાયદે અને બળજબરીપૂર્વક કબજો જમાવેલો છે અને ત્યાં થતી કોઈપણ કથિત ચૂંટણી કે રાજકીય પ્રક્રિયાનો કોઈ કાયદેસર આધાર નથી.