શ્રીલંકા બોમ્બ બ્લાસ્ટ: કોર્ટે 15 આતંકીઓને સંભળાવી 200 વર્ષની કેદ
છેલ્લું અપડેટ : 23 Sept 2026
સોર્સ : gstv
શ્રીલંકાની એક અદાલતે ગયા મંગળવારે ૨૦૧૯ના ઈસ્ટર આત્મઘાતી બોમ્બ વિસ્ફોટ કેસમાં સજાની જાહેરાત કરી હતી. અદાલતે ૨૪ આરોપીઓમાંથી ૧૫ને દોષિત ઠેરવ્યા અને તે દરેકને ૨૦૦ વર્ષથી વધુની જેલની સજા સંભળાવી. ઉલ્લેખનીય છે કે ૨૧ એપ્રિલ ૨૦૧૯ના રોજ, ISIS સાથે સંકળાયેલા સ્થાનિક ઇસ્લામિક કટ્ટરપંથી જૂથ 'નેશનલ તૌહીદ જમાત' (NTJ) સાથે જોડાયેલા નવ આત્મઘાતી બોમ્બરોએ ત્રણ કેથોલિક ચર્ચ અને ત્રણ લક્ઝરી હોટલોને નિશાન બનાવીને શ્રેણીબદ્ધ સંકલિત વિસ્ફોટો કર્યા હતા. આ હુમલાઓમાં ૧૧ ભારતીયો સહિત ૨૭૦ લોકોના મોત થયા હતા અને ૫૦૦થી વધુ લોકો ઘાયલ થયા હતા.
કોર્ટે ૧૫ દોષિતોને સખત કેદની સજા સંભળાવી
' અહેવાલ મુજબ, કોલંબો હાઈકોર્ટની એક બેન્ચે તમામ ૧૫ દોષિતોને ૨૨૦ વર્ષની સખત કેદની સજા ફટકારી છે. ચુકાદો સંભળાવતી વખતે, જસ્ટિસ નવરત્ને મારાસિંઘે, જસ્ટિસ રામનાથન કન્નન અને જસ્ટિસ સુજીવા નિસાંકાની બનેલી ત્રણ ન્યાયાધીશોની બેન્ચે ૧૫ આરોપીઓને દોષિત ઠેરવ્યા હતા, જ્યારે અન્ય નવને નિર્દોષ જાહેર કર્યા હતા.
૨૩,૨૭૦ આરોપો અને ૨,૩૦૯ સાક્ષીઓના નિવેદનો
ઉલ્લેખનીય છે કે આ કેસની સુનાવણી લગભગ પાંચ વર્ષ સુધી ચાલી હતી, ત્યારબાદ કોર્ટે મુખ્ય આરોપી નૌફર મૌલવીને દોષિત ઠેરવ્યો હતો. આરોપીઓ સામે કુલ ૨૩,૨૭૦ આરોપો ઘડવામાં આવ્યા હતા અને સરકારી પક્ષે ૨,૩૦૯ સાક્ષીઓના નિવેદનો નોંધ્યા હતા.
આતંકવાદ નિવારણ ધારા હેઠળ આરોપો દાખલ
આરોપીઓ સામે આતંકવાદ નિવારણ ધારા હેઠળ આરોપો મૂકવામાં આવ્યા હતા, જેમાં હત્યા અને હત્યાનો પ્રયાસ, આતંકવાદી કૃત્યો આચરવાનું કાવતરું રચવું તથા શસ્ત્રો અને વિસ્ફોટકો રાખવા અને તેનો ઉપયોગ કરવાનો સમાવેશ થાય છે.
નેશનલ થોહીદ જમાતના નેતાએ આત્મઘાતી હુમલાનું નેતૃત્વ કર્યું હતું
નેશનલ થોહીદ જમાતના નેતા ઝહરાન હાશિમે વ્યક્તિગત રીતે તે આત્મઘાતી ટુકડીનું નેતૃત્વ કર્યું હતું જેણે ઈસ્ટર સન્ડેની પ્રાર્થના સભાઓને નિશાન બનાવી હતી. આ હુમલાને કારણે શ્રીલંકામાં રાજકીય વિવાદ સર્જાયો હતો; તત્કાલીન રાષ્ટ્રપતિ મૈત્રીપાલા સિરીસેના અને વડાપ્રધાન રાનિલ વિક્રમસિંઘે પર અગાઉથી ગુપ્ત માહિતી હોવા છતાં હુમલાને રોકવામાં નિષ્ફળ રહેવાના આરોપો લાગ્યા હતા. તપાસ દરમિયાન, બોમ્બ વિસ્ફોટો સાથે સંકળાયેલા પાંચ શંકાસ્પદ વ્યક્તિઓને પણ યુએઈ (UAE) થી દેશમાં પાછા લાવવામાં આવ્યા હતા.
