મોટો ખુલાસો: શેખ હસીનાએ આપ્યો ગોળી ચલાવવાનો આદેશ અને સેના જોડાઈ ગઈ વિદ્રોહીઓ સાથે

શેખ હસીનાએ દેશમાંથી ભાગી જવાની આગલી રાત્રે લશ્કરી અધિકારીઓની બેઠક યોજી હતી અને રમખાણોને કચડી નાખવા માટે વિરોધીઓ પર ગોળીબાર કરવાનો આદેશ આપ્યો હતો.

બાંગ્લાદેશમાં શેખ હસીનાની સરકારને ઉથલાવી દેવામાં આવી છે અને તેમણે પોતાનો જીવ બચાવવા ભારતમાં આશરો લીધો છે. હસીનાએ દેશ છોડ્યા બાદ બાંગ્લાદેશમાં પરિસ્થિતિ સતત બદલાઈ રહી છે. હસીનાની પાર્ટી અવામી દળના નેતાઓનો નરસંહાર થઈ રહ્યો છે. અત્યાર સુધીમાં 20 નેતાઓની હત્યા કરવામાં આવી છે. એટલું જ નહીં, હિંદુઓ પર આકરા અત્યાચારના અહેવાલો પણ સામે આવ્યા છે. હત્યા થઈ, ઘરોમાં તોડફોડ થઈ અને ઘણા મંદિરોને આગ ચાંપી દેવામાં આવી.

હસીનાની વિદાય બાદથી બાંગ્લાદેશમાં ઓછામાં ઓછા 100 લોકોના મોત થયા છે. આ દરમિયાન હસીના સરકારને ઉથલાવી દેવા સંબંધિત એક નવો રિપોર્ટ સામે આવ્યો છે. રોઇટર્સે બાંગ્લાદેશી લશ્કરી અધિકારીઓને ટાંકીને જણાવ્યું હતું કે શેખ હસીનાએ દેશમાંથી ભાગી જવાની આગલી રાત્રે લશ્કરી અધિકારીઓની બેઠક યોજી હતી અને રમખાણોને ડામવા માટે વિરોધીઓ પર ગોળીબાર કરવાનો આદેશ આપ્યો હતો. સૈન્ય અધિકારીઓએ આ આદેશ સ્વીકારવાનો સ્પષ્ટ ઇનકાર કર્યો અને લશ્કર બળવાખોરો સાથે જોડાયું.

બાંગ્લાદેશમાં 15 વર્ષથી સત્તામાં સૌથી શક્તિશાળી નેતા શેખ હસીનાને બે મહિના સુધી ચાલેલા વિદ્રોહનો ભોગ બનવું પડ્યું હતું. શેખ હસીનાએ સત્તાવાર નિવાસસ્થાનમાંથી ભાગી જવાની આગલી રાત્રે વિરોધને રોકવા લશ્કરી અધિકારીઓ સાથે બેઠક કરી હતી. જેમાં તેમણે આર્મી ચીફને પ્રદર્શનકારીઓ પર ગોળીબાર કરવાનો આદેશ આપ્યો હતો. આર્મી ચીફે પોતાના સેનાપતિઓ સાથેની બેઠકમાં આ વાતનો ખુલાસો કર્યો હતો. બે સેવા આપતા સૈન્ય અધિકારીઓ નામ ન આપવાની શરતે બોલતા જાહેર કર્યું છે કે સેનાએ દેશભરમાં શેખ હસીનાના કડક કર્ફ્યુને લાગુ નહીં કરવાની અને નાગરિકો પર ગોળીબાર નહીં કરવાની પ્રતિજ્ઞા લીધી છે. અધિકારીઓએ કહ્યું કે સેનાનો શેખ હસીનાને સ્પષ્ટ સંદેશ છે કે તેઓ તેમની સાથે નથી.

હસીનાએ સેનાનું સમર્થન કેમ ગુમાવ્યું?

આ બાબતની જાણકારી ધરાવતા એક ભારતીય અધિકારીના જણાવ્યા અનુસાર, જનરલ વકાર-ઉઝ-ઝમાને હસીનાની ઓફિસનો સંપર્ક કર્યો અને વડા પ્રધાનને કહ્યું કે તેમના સૈનિકો તેમના કડક કર્ફ્યુ આદેશોને લાગુ કરવામાં અસમર્થ છે. અધિકારીએ કહ્યું સંદેશ સ્પષ્ટ હતો - હસીનાને હવે સેનાનું સમર્થન નથી.

બાંગ્લાદેશ હિંસામાં મૃત્યુઆંક 400ને પાર કરી ગયો છે

બાંગ્લાદેશમાં હિંસામાં મૃત્યુઆંક વધીને 440 થઈ ગયો છે. હસીનાના રાજીનામા બાદ સેનાએ સત્તા સંભાળી હતી. બાંગ્લાદેશના રાષ્ટ્રપતિ મોહમ્મદ શહાબુદ્દીને મંગળવારે સંસદ ભંગ કરી દીધી હતી અને નોબેલ પુરસ્કાર વિજેતા મોહમ્મદ યુનુસ (84)ને આગામી વચગાળાની સરકારના વડા તરીકે નિયુક્ત કર્યા હતા.