ઈઝરાયલની જેલમાં ફિલિસ્તીની કેદીઓ સાથે જાતીય હિંસા...: UNનો સનસનાટીભર્યો રિપોર્ટ

UN Report on Israel 2026: સંયુક્ત રાષ્ટ્રના (UN) એક નવા અહેવાલે ઇઝરાયલ અને UN વચ્ચે મોટો વિવાદ ઊભો કરી દીધો છે. આ અહેવાલમાં દાવો કરવામાં આવ્યો છે કે ઇઝરાયલી સુરક્ષા દળોએ ફિલિસ્તીની કેદીઓ સામે જાતીય હિંસા અને સતામણીની અનેક ઘટનાઓને અંજામ આપ્યો છે. આ ચોંકાવનારો રિપોર્ટ સામે આવ્યા બાદ ઇઝરાયલે તીખી પ્રતિક્રિયા આપી છે અને UNના મહાસચિવ એન્ટોનિયો ગુટેરેસની ઓફિસ સાથેના તમામ સંબંધો ખતમ કરવાની જાહેરાત કરી દીધી છે.

આ પણ વાંચો :

'હવે હુમલો કર્યો તો પરમાણુ..': ઈરાને અમેરિકા અને ઈઝરાયલને આપી આકરી ચેતવણી

શું કટ્ટર દુશ્મન ઈરાન પણ ઈઝરાયલ સાથે હાથ મિલાવશે? ટ્રમ્પના એક દાવાથી વૈશ્વિક રાજકારણમાં ખળભળાટ

રિપોર્ટમાં ઇઝરાયલી સુરક્ષા દળો પર કેવા લાગ્યા છે આરોપો?

UNના અહેવાલ અનુસાર, વર્ષ 2025 દરમિયાન ફિલિસ્તીની કેદીઓ વિરુદ્ધ જાતીય હિંસાના 31 પ્રમાણિત કેસોની ઓળખ કરવામાં આવી છે. આ કેસોમાં ગંભીર બાબતો સામે આવી છે. કેદીઓ સાથે બળાત્કાર, બળાત્કારનો પ્રયાસ, ખાનગી અંગો પર હિંસા, પરાણે કપડાં ઉતરાવવા, અપમાનજનક તલાશી અને જાતીય પ્રતાડના જેવી ઘટનાઓ શામેલ છે. અહેવાલમાં જણાવાયું છે કે, ઘણા કિસ્સાઓમાં પુરુષો અને છોકરાઓને નિશાન બનાવવામાં આવ્યા હતા. જ્યારે મહિલા કેદીઓને બળાત્કારની ધમકીઓ, પરાણે કપડાં ઉતરાવવા અને જાતીય સતામણી જેવી સ્થિતિનો સામનો કરવો પડ્યો હતો.

પીડિતોમાં પત્રકારોનો પણ સમાવેશ

રિપોર્ટ અનુસાર, આ ઘટનાઓ સ્દે તેમાન, એત્ઝિઓન ડિટેન્શન સેન્ટર, મેગિડો, ઓફર, રમલા અને નફ્હા જેવી વિવિધ જેલો તેમજ પૂછપરછના કેન્દ્રો પર થઈ હતી. પીડિતોમાં કેટલાક પત્રકારો અને માનવાધિકાર કાર્યકરો પણ સામેલ હતા. અહેવાલમાં એવો પણ આક્ષેપ કરવામાં આવ્યો છે કે, ઇઝરાયલી સત્તાવાળાઓએ UNના તપાસકર્તાઓને પૂરતી સુવિધા કે પહોંચ આપી ન હતી, જેના કારણે ઘણા કેસોની સ્વતંત્ર તપાસ પ્રભાવિત થઈ છે.

અમે હવે તમારી સાથે કામ નહીં કરીએ

આ રિપોર્ટ જાહેર થતાં જ ઇઝરાયલે ભારે આક્રોશ વ્યક્ત કર્યો છે. સંયુક્ત રાષ્ટ્રમાં ઇઝરાયલના રાજદૂત ડેની ડેનને સ્પષ્ટ શબ્દોમાં જણાવ્યું કે, અમે હવે તમારી સાથે કામ નહીં કરીએ. તેમણે આરોપ લગાવ્યો કે ઇઝરાયલી સૈનિકોને હમાસ જેવા સંગઠનો સાથે એક જ યાદીમાં મૂકવા એ તદ્દન અન્યાયી છે. ઇઝરાયલના વિદેશ મંત્રાલયે પણ આ રિપોર્ટને શરમજનક અને વાહિયાત ગણાવ્યો છે. મંત્રાલયે કહ્યું કે, UN હવે એક રાજકીય અને પક્ષપાતી સંસ્થા બની ચૂકી છે, જે સતત ઇઝરાયલને નિશાન બનાવે છે. જ્યાં સુધી નવા મહાસચિવની નિમણૂક ન થાય, ત્યાં સુધી ઇઝરાયલ ગુટેરેસની ઓફિસ સાથે કોઈપણ પ્રકારનો સહયોગ નહીં કરે.

UN પોતાના નિષ્કર્ષ પર અડગ

બીજી તરફ, સંયુક્ત રાષ્ટ્રએ પોતાના અહેવાલનો બચાવ કર્યો છે. મહાસચિવના પ્રવક્તાએ સ્પષ્ટપણે જણાવ્યું છે કે, મહાસચિવ પોતાના રિપોર્ટ પર કાયમ છે અને તેમાં કોઈ ફેરફાર કરવામાં આવશે નહીં. આ વિવાદ એવા સમયે સામે આવ્યો છે જ્યારે ગાઝા યુદ્ધ અને ફિલિસ્તીની કેદીઓ સાથેના વ્યવહારને લઈને આંતરરાષ્ટ્રીય સ્તરે ઇઝરાયલની ટીકાઓ વધી રહી છે. UNના આ રિપોર્ટથી ઇઝરાયલ અને આંતરરાષ્ટ્રીય સંસ્થાઓ વચ્ચેનો સંઘર્ષ હવે વધુ ઘેરો બન્યો છે.