રશિયાનો કિવ પર રાતભર મિસાઇલ અને ડ્રોનથી હુમલો: 3નાં મોત, 9 ઘાયલ; અનેક વિસ્તારોમાં વીજળી ગુલ

રશિયા અને યુક્રેન વચ્ચે ચાલી રહેલા યુદ્ધમાં ફરી એકવાર તણાવ વધ્યો છે. યુક્રેનની રાજધાની કિવ પર રશિયાએ રાતભર મિસાઇલ અને ડ્રોનથી હુમલા કર્યા હતા. આ હુમલામાં ત્રણ લોકોનાં મોત થયા છે, જ્યારે નવ લોકો ઘાયલ થયા છે. હુમલાને કારણે શહેરના અનેક વિસ્તારોમાં વીજ પુરવઠો ખોરવાયો છે અને પાયાના માળખાને પણ ભારે નુકસાન પહોંચ્યું છે. ઊર્જા પ્રદાતા કંપની DTEKના જણાવ્યા અનુસાર, પેચેરસ્કી, સોલોમિયાંસ્કી, હોલોસિવસ્કી, નિપ્રોવસ્કી અને ડાર્નિત્સ્કી જિલ્લાઓના અનેક વિસ્તારોમાં વીજળી ગુલ થઈ ગઈ હતી.
કેર્ચ બ્રિજ પરના હુમલાનો બદલો લેવાનો રશિયાનો દાવો
આ હુમલા રશિયાના રાષ્ટ્રપતિ વ્લાદિમીર પુતિનના નિવેદનના થોડા કલાકો બાદ થયા હતા. પુતિને આ અઠવાડિયે યુક્રેન દ્વારા મહત્વના કેર્ચ બ્રિજ પર કરવામાં આવેલા ત્રણ હવાઈ હુમલાનો બદલો લેવાની વાત કરી હતી. કેર્ચ બ્રિજ રશિયાની મુખ્ય ભૂમિને કબજા હેઠળના ક્રિમિયા સાથે જોડે છે. ગુરુવારે ચીનમાં પત્રકારો સાથે વાતચીત દરમિયાન પુતિને કહ્યું હતું કે રશિયા આ હુમલાઓનો જડબાતોડ જવાબ આપશે અને તેઓ આ બાબતે સંપૂર્ણપણે આશ્વસ્ત છે. પુતિને એમ પણ જણાવ્યું હતું કે બ્રિજનો માર્ગ વિભાગ ગંભીર રીતે ક્ષતિગ્રસ્ત થયો છે અને રશિયા તેનું પુનઃનિર્માણ કરશે.
કિવના અનેક વિસ્તારોમાં વીજ પુરવઠો ખોરવાયો
કિવ સિટી મિલિટરી એડમિનિસ્ટ્રેશનના જણાવ્યા અનુસાર, રાજધાનીના ચાર જિલ્લાઓમાં હુમલા થયા હતા. તેના કારણે મોટા પાયે વીજ પુરવઠો ખોરવાયો હતો. DTEKએ જણાવ્યું હતું કે પેચેરસ્કી, સોલોમિયાંસ્કી, હોલોસિવસ્કી, નિપ્રોવસ્કી અને ડાર્નિત્સ્કી જિલ્લાઓના કેટલાક વિસ્તારોમાં વીજળી બંધ થઈ ગઈ હતી. આ ઉપરાંત, ઓબોલોન્સ્કી અને હોલોસિવસ્કી જિલ્લાઓમાં બિનરહેણાંક ઇમારતોને નુકસાન થયું હતું. જ્યારે પોડિલ્સ્કી અને ડાર્નિત્સ્કી જિલ્લાઓમાં પરિવહન અને લોજિસ્ટિક્સ વ્યવસ્થાને પણ અસર પહોંચી હતી.
બે મોટા બ્રિજને નુકસાન, ટ્રાફિક બંધ કરાયો
કિવના મેયર વિતાલી ક્લિત્સ્કોના જણાવ્યા અનુસાર, બેલિસ્ટિક મિસાઇલ હુમલામાં પોડિલ્સ્કી બ્રિજને નુકસાન થયું હતું. તેના પગલે અધિકારીઓએ દ્નિપ્રો નદીના જમણા કિનારેથી ડાબા કિનારા તરફ જતા વાહનવ્યવહારને બંધ કરવો પડ્યો હતો. બીજી તરફ, ડ્રોન હુમલામાં ડાર્નિત્સ્કી બ્રિજને પણ નુકસાન પહોંચ્યું હતું. આ ઉપરાંત, રશિયાએ સાઉથર્ન બ્રિજને પણ નિશાન બનાવ્યો હતો, જેના કારણે ત્યાં વાહનવ્યવહાર મર્યાદિત કરવામાં આવ્યો છે. મેયર ક્લિત્સ્કોએ જણાવ્યું હતું કે સાઉથર્ન બ્રિજ પરથી માત્ર 18 ટન સુધીનાં વજનવાળાં જાહેર પરિવહનનાં વાહનોને જ અવરજવરની મંજૂરી આપવામાં આવી રહી છે.
નાગરિકોને ખાનગી વાહનોનો ઉપયોગ ટાળવા અપીલ
હુમલા બાદ કિવના મેયરે નાગરિકોને અપીલ કરી છે કે અત્યંત જરૂરી ન હોય ત્યાં સુધી ખાનગી કાર લઈને શહેરમાં મુસાફરી કરવાનું ટાળે. તેમણે વેપારી સંસ્થાઓ અને અન્ય કાર્યાલયો પાસેથી પણ શક્ય હોય ત્યાં સુધી કર્મચારીઓ માટે ઘરેથી કામ કરવાની (Remote Working) વ્યવસ્થા કરવા જણાવ્યું છે. રશિયાના સતત મિસાઇલ અને ડ્રોન હુમલાઓને કારણે કિવમાં વીજળી, પરિવહન અને અન્ય પાયાની સેવાઓ પર અસર પડી છે. શહેરમાં સ્થિતિ સામાન્ય બનાવવા માટે તંત્ર કામગીરી કરી રહ્યું છે.









