ટ્રમ્પના પુત્રના લગ્નમાં રશિયન ઉદ્યોગપતિની લાખો ડોલરની ભેટ, કોણ છે ઉમર ક્રેમલેવ?

ડોનાલ્ડ ટ્રમ્પ જુનિયરના ભવ્ય લગ્ન સમારોહને લઈને અમેરિકામાં નવો વિવાદ ઊભો થયો છે. રશિયન ઓલિગાર્ક ઉમર ક્રેમલેવે ટ્રમ્પ જુનિયરના લગ્નની કેટલીક ઉજવણી માટે લાખો ડોલરનું ભંડોળ પૂરું પાડ્યું હોવાના અહેવાલો સામે આવ્યા છે. આ નાણાંનો ઉપયોગ બહામાસમાં પ્રાઈવેટ આઈલેન્ડ પર આફ્ટર-પાર્ટી અને ભવ્ય આતશબાજી સહિતના આયોજન માટે કરવામાં આવ્યો હોવાનો દાવો છે. વિદેશી પ્રભાવ અને નૈતિક નિયમોને લઈને સવાલો ઊભા થયા બાદ ટ્રમ્પ પરિવારે આ મામલે સ્પષ્ટતા કરી છે.

ટ્રમ્પ જુનિયરને રશિયન ઓલિગાર્કની મોંઘી ભેટ

‘પ્રોપબ્લિકા’ (ProPublica)ની તપાસ મુજબ રશિયાના ઉમર ક્રેમલેવે ડોનાલ્ડ ટ્રમ્પ જુનિયરના લગ્ન સમારોહ સાથે જોડાયેલા કેટલાક ખર્ચ માટે સેંકડો હજારો ડોલર આપ્યા હતા. અહેવાલ અનુસાર, આ રકમનો ઉપયોગ બહામાસમાં પ્રાઈવેટ આઈલેન્ડ પર આયોજિત આફ્ટર-પાર્ટી અને અન્ય ભવ્ય કાર્યક્રમો માટે થયો હતો. આ ખુલાસા બાદ વિદેશી વ્યક્તિ પાસેથી મળેલી આટલી મોટી ભેટને લઈને અમેરિકામાં ચર્ચા શરૂ થઈ છે.

ટ્રમ્પે શું કહ્યું?

અમેરિકાના પ્રમુખ ડોનાલ્ડ ટ્રમ્પે ઓવલ ઑફિસમાં પત્રકારો સાથે વાતચીત દરમિયાન જણાવ્યું હતું કે લગ્ન પ્રસંગે ભેટ મળવી અસામાન્ય બાબત નથી. જોકે, તેમણે કહ્યું કે તેમને મળેલી માહિતી પ્રમાણે તેમના પુત્ર ડોનાલ્ડ ટ્રમ્પ જુનિયરે આ નાણાં પરત કરી દીધા છે. ટ્રમ્પે ઉમેર્યું કે તેમનો પુત્ર આ પ્રકારના વિવાદમાં પડવા માંગતો ન હતો અને તેથી નાણાં પરત કરવામાં આવ્યા.

ટ્રમ્પ જુનિયરના પ્રવક્તાએ પણ આપી પ્રતિક્રિયા

ડોનાલ્ડ ટ્રમ્પ જુનિયરના પ્રવક્તાએ ક્રેમલેવ તરફથી કરવામાં આવેલી ચુકવણી અંગેના અહેવાલને સંપૂર્ણપણે નકારી કાઢ્યો નથી. પ્રવક્તા અનુસાર, ઉમર ક્રેમલેવ ટ્રમ્પ જુનિયરના અંગત મિત્ર છે. સોશિયલ મીડિયા પર પણ આ ભેટનો બચાવ કરવામાં આવ્યો હતો અને તેને એક મિત્ર તરફથી મળેલી અસાધારણ રીતે ઉદાર લગ્નની ભેટ તરીકે રજૂ કરવામાં આવી હતી.

કોણ છે ઉમર ક્રેમલેવ?

ઉમર ક્રેમલેવ રશિયાના જાણીતા ઉદ્યોગપતિ અને ઇન્ટરનેશનલ બોક્સિંગ એસોસિએશન (IBA) સાથે જોડાયેલા પ્રભાવશાળી વ્યક્તિ છે. અહેવાલોમાં તેમને રશિયન રાષ્ટ્રપતિ વ્લાદિમીર પુતિનની નજીકના વર્તુળ સાથે જોડવામાં આવ્યા છે. આ કારણોસર જ ટ્રમ્પ જુનિયરના લગ્નમાં તેમની કથિત આર્થિક મદદને લઈને વિદેશી પ્રભાવનો મુદ્દો વધુ ચર્ચામાં આવ્યો છે.

અમેરિકન કૉંગ્રેસમાં પણ તપાસ

મામલો જાહેર થયા બાદ અમેરિકન કૉંગ્રેસના ડેમોક્રેટિક નેતાઓએ આ અંગે તપાસની માગ સાથે પ્રક્રિયા શરૂ કરી છે. વિવિધ એથિક્સ વૉચડૉગ (Ethics Watchdog) જૂથોએ પણ વિદેશી પ્રભાવશાળી વ્યક્તિ પાસેથી આટલી મોટી ભેટ સ્વીકારવા અંગે ચિંતા વ્યક્ત કરી છે. તેમના મતે, ભલે ડોનાલ્ડ ટ્રમ્પ જુનિયર સરકારી કર્મચારી ન હોય, છતાં આવી ભેટ સંભવિત હિતોના ટકરાવ (Conflict of Interest) અંગે પ્રશ્નો ઊભા કરી શકે છે.

હવે સમગ્ર મામલે સવાલો કેમ ઊભા થયા?

આ ઘટનામાં મુખ્ય સવાલ એ છે કે વિદેશી પ્રભાવશાળી વ્યક્તિ દ્વારા આપવામાં આવેલા નાણાંનો ઉપયોગ ખાનગી લગ્ન સમારોહ માટે કેવી રીતે થયો અને બાદમાં તે રકમ પરત કરવામાં આવી કે નહીં. ટ્રમ્પ પરિવાર તરફથી નાણાં પરત કર્યાની વાત કરવામાં આવી છે, જ્યારે સમગ્ર મામલે કૉંગ્રેસના કેટલાક સભ્યો અને એથિક્સ સંગઠનો વધુ તપાસની માગ કરી રહ્યા છે. ક્રેમલેવ અથવા સંબંધિત સંસ્થાઓ તરફથી આ મુદ્દે તાત્કાલિક કોઈ સત્તાવાર પ્રતિક્રિયા સામે આવી નથી.

આ ઘટનાએ ફરી એકવાર અમેરિકાના રાજકીય પરિવારો, વિદેશી પ્રભાવ અને ખાનગી ભેટો વચ્ચેના સંબંધને લઈને ચર્ચા જગાવી છે. જોકે, ભેટના સ્વરૂપ, ચુકવણી અને નાણાં પરત કરવાની બાબતો અંગે સામે આવેલા દાવાઓ અને અહેવાલોને અંતિમ કાનૂની નિષ્કર્ષ તરીકે જોવામાં ન આવે.