Independence Day: માત્ર ભારત જ નહીં 15મી ઓગસ્ટે આ દેશો પણ થયા હતા આઝાદ, જુઓ સંપૂર્ણ યાદી

ભારત આ વર્ષે તેનો 78મો સ્વતંત્રતા દિવસ ઉજવશે. આપણાં દેશને 15 ઓગસ્ટ 1947ના રોજ આઝાદી મળી હતી, ત્યારથી દર વર્ષે આ દિવસે ઉજવણી કરવામાં આવે છે, પરંતુ શું તમે જાણો છો કે, આ દિવસે સ્વતંત્રતાની ઉજવણી કરનાર ભારત એકમાત્ર દેશ નથી, પરંતુ અન્ય 4 દેશ છે. જેઓ આ દિવસે આઝાદ થયા હતા. ચાલો જાણીએ એ દેશ વિશે. આ 4 દેશ પણ 15 ઓગસ્ટે આઝાદીની ઉજવણી કરે છે 15 ઓગસ્ટના રોજ ભારતની સાથે અન્ય ચાર દેશોને આઝાદી મળી હતી. જેમાં બહેરીન, નોર્થ અને સાઉથ કોરિયા, લિક્ટેનસ્ટેઈન અને રિપબ્લિક ઓફ કોંગો સામેલ છે.

કોંગો

કોંગો એ આફ્રિકન ખંડની મધ્યમાં આવેલો લોકશાહી દેશ છે. આ દેશ ભારતની આઝાદીના 13 વર્ષ બાદ 15 ઓગસ્ટ 1960ના રોજ આઝાદ થયો હતો. ત્યાર પહેલા 1880થી આઝાદી સુધી આ જગ્યા પર ફ્રાન્સનો કબજો હતો. ઉલ્લેખનીય છે કે, કોંગો વિસ્તારની દ્રષ્ટિએ આફ્રિકન મહાદ્વીપનો ત્રીજો સૌથી મોટો દેશ છે.

બહેરીન

15 ઓગસ્ટ 1971ના રોજ બહેરીન પર બ્રિટિશ વસાહતી શાસનનો અંત આવ્યો. ભારતને આઝાદી મળ્યાના બે દાયકાથી વધુ સમય પછી, બહેરીને તેની સ્વતંત્રતાની ઘોષણા કરી હતી. જોકે, આ દેશ આ દિવસે પોતાનો સ્વતંત્રતા દિવસ ઉજવતો નથી. 15 ઓગસ્ટને બદલે, 16 ડિસેમ્બરને આ દેશમાં સ્વર્ગસ્થ શાસક ઇસા બિન સલમાન અલ ખલીફાના સિંહાસન પર આરોહણની યાદમાં રાષ્ટ્રીય સ્વતંત્રતા દિવસ તરીકે ઉજવવામાં આવે છે.

ઉત્તર કોરિયા અને દક્ષિણ કોરિયા

દર વર્ષે ઉત્તર કોરિયા અને દક્ષિણ કોરિયા બંનેમાં 15 ઓગસ્ટને રાષ્ટ્રીય મુક્તિ દિવસ તરીકે ઉજવવામાં આવે છે. હકીકતમાં, આ દિવસે, બીજા વિશ્વ યુદ્ધ પછી કોરિયા પર 35 વર્ષનો જાપાની કબજો અને સંસ્થાનવાદી શાસન સમાપ્ત થયું હતું. આઝાદીના ત્રણ વર્ષ પછી, કોરિયા ઉત્તર કોરિયા અને દક્ષિણ કોરિયામાં વહેંચાયેલું હતું. હવે તેઓ બે દેશ બની ગયા છે જે અલગ-અલગ સ્વતંત્રતાની ઉજવણી કરે છે.

લિક્ટેનસ્ટેઇન

લિક્ટેનસ્ટેઇનમાં પણ 15 ઓગસ્ટને રાષ્ટ્રીય દિવસ તરીકે ઉજવવામાં આવે છે. ઉલ્લેખનીય છે કે, આ દુનિયાનો છઠ્ઠો સૌથી નાનો દેશ છે. આ દેશ 1866માં જર્મન શાસનથી સ્વતંત્ર થયો હતો. આ દેશ 1940થી 15 ઓગસ્ટને તેના રાષ્ટ્રીય દિવસ તરીકે ઉજવે છે. 15 ઓગસ્ટ, 1940ના રોજ, લિક્ટેનસ્ટેઇન સરકારે સત્તાવાર રીતે 15 ઓગસ્ટને રાષ્ટ્રીય રજા જાહેર કરી.