મહિલાઓ માટે સૌથી અસુરક્ષિત સ્થાન તેનું ઘર, પરિવારના સભ્યો દ્વારા જ દરરોજ 140ની હત્યા: UN

UNના ડેટામાં ખુલાસો થયો છે કે મહિલાઓ માટે તેમનું પોતાનું ઘર પણ સુરક્ષિત નથી. UNએ મહિલા હત્યાના ચોંકાવનારા આંકડા જાહેર કર્યા છે. આ મુજબ વિશ્વભરમાં દરરોજ 140 મહિલાઓ અને છોકરીઓની હત્યા કરવામાં આવે છે. રિપોર્ટમાં ચોંકાવનારી વાત એ છે કે આ હત્યાઓનું સ્થળ મોટાભાગે ઘર છે અને હત્યારાઓ તેમના નજીકના સગાઓ છે.

નજીકના પુરૂષ સંબંધીઓ દ્વારા હત્યા

UN વુમન દ્વારા જાહેર કરાયેલા નારી હત્યાના આંકડા અનુસાર, 2023માં સમગ્ર વિશ્વમાં 85,000 છોકરીઓ અને મહિલાઓની પુરુષો દ્વારા હત્યા કરવામાં આવી હતી. તેમાંથી 60 ટકા અથવા 51,100 મહિલાઓની તેમના નજીકના પુરૂષ સંબંધીઓ દ્વારા હત્યા કરવામાં આવી હતી. અહેવાલો સૂચવે છે કે ઘર મહિલાઓ માટે સૌથી ખતરનાક સ્થાનોમાંથી એક બની રહ્યું છે.

UN વુમનના ડેપ્યુટી એક્ઝિક્યુટિવ ડાયરેક્ટર ન્યાર્દઝાઈ ગેમ્બોંજવાંડાએ જણાવ્યું હતું કે આંકડાઓના આધારે, મહિલાઓ અને છોકરીઓ સૌથી સુરક્ષિત ઘરોમાં પણ હિંસાનો સામનો કરે છે. તેમણે કહ્યું કે આ આંકડા મોટા ખતરાની માત્ર ઝલક છે. તમામ મૃત્યુ નોંધાયા નથી અને પોલીસ અહેવાલો અન્ય સત્તાવાર આંકડાઓ પર આધારિત છે. તેમણે એમ પણ કહ્યું કે વિશ્વના ઘણા ભાગોમાંથી આવો ડેટા ઉપલબ્ધ નથી.

સંબંધીઓ દ્વારા કરવામાં આવતી હત્યાઓમાં વધારો

રિપોર્ટ અનુસાર, 2022ની સરખામણીમાં નારી હત્યામાં ઘટાડો થયો છે, પરંતુ નજીકના સંબંધીઓ દ્વારા કરવામાં આવતી હત્યાઓમાં વધારો થયો છે. આફ્રિકામાં આ પ્રકારની હત્યાઓમાં સૌથી વધુ વધારો જોવા મળ્યો છે, ત્યારબાદ અમેરિકા અને ઓશેનિયાનો નંબર આવે છે. યુરોપ અને અમેરિકામાં તેમના પાર્ટનર દ્વારા મહિલાઓની હત્યાના કેસ સૌથી વધુ છે.