નેપાળમાં ફરી કુદરતી આફતનો કહેર, મનાસ્લુમાં ભયાનક ભૂસ્ખલનથી મચી અફરાતફરી

નેપાળમાં કુદરતી આપત્તિઓનો સિલસિલો યથાવત રહ્યો છે. અગાઉ ગ્લેશિયર તૂટવાથી આવેલી ભીષણ પૂર અને લેન્ડસ્લાઇડની ઘટનાઓ બાદ હવે ફરી એકવાર મનાસ્લુ વિસ્તારમાં ભૂસ્ખલનની ગંભીર ઘટના સામે આવી છે. મળતી માહિતી અનુસાર, આ દુર્ઘટના ક્રક ગામ પાસે બની છે, જેના કારણે આસપાસના વિસ્તારમાં ભારે અફરા-તફરી મચી ગઈ છે અને મોટા પાયે નુકસાન થયાની આશંકા છે.

સ્થાનિકોમાં ડરનો માહોલ, રાહત અને બચાવ કાર્ય ચાલુ

ઘટનાની જાણ થતાં જ સ્થાનિક લોકોમાં ભારે ભય ફેલાઈ ગયો હતો અને ઊંચા પહાડી વિસ્તારમાં રહેતા લોકોએ જીવ બચાવવા માટે ત્યાંથી ભાગવું પડ્યું હતું. સ્થાનિક રહેવાસીઓના જણાવ્યા મુજબ, પહાડનો મોટો ભાગ તૂટીને નીચે પડવાથી અનેક મકાનો અને રસ્તાઓને ભારે નુકસાન પહોંચ્યું છે. ઘટનાસ્થળે રેસ્ક્યુ ટીમ પહોંચી છે અને કાટમાળમાં ફસાયેલા લોકોને બહાર કાઢવાની કામગીરી યુદ્ધના ધોરણે ચાલી રહી છે. જો કે, ખરાબ હવામાનને કારણે રાહત અને બચાવ કામગીરીમાં ભારે મુશ્કેલીઓનો સામનો કરવો પડી રહ્યો છે.

અગાઉની આપત્તિઓ બાદ ફરી વધી મુશ્કેલીઓ

મનાસ્લુ ક્ષેત્ર અગાઉ પણ પૂર અને ભૂસ્ખલન જેવી કુદરતી આફતોનો સામનો કરી ચૂક્યું છે. આ વર્ષે ઓગસ્ટ મહિનામાં સર્જાયેલી મોટી આપત્તિના ઘા હજુ રૂઝાયા નથી ત્યાં તાજેતરની આ ઘટનાએ લોકોમાં ફરી એકવાર ભારે ડર પેદા કરી દીધો છે. આ દુર્ઘટનાને કારણે પ્રવાસન પ્રવૃત્તિઓ તેમજ સ્થાનિક સ્તરે થતી અવરજવર પણ પ્રભાવિત થવાની પૂરેપૂરી આશંકા સેવાઈ રહી છે.