ઈરાન યુદ્ધ ભારે પડ્યું: મોંઘવારી અને ઈંધણ સંકટથી અમેરિકન અર્થતંત્ર પર દબાણ, ટ્રમ્પ સરકાર સામે મોટો પડકાર
છેલ્લું અપડેટ : 13 Sept 2026
અમેરિકામાં સતત વધી રહેલી મોંઘવારી અને ડીઝલના રેકોર્ડબ્રેક ભાવ વધારાને કારણે દેશના રાષ્ટ્રપ્રમુખ ડૉનાલ્ડ ટ્રમ્પની મુશ્કેલીઓ ચિંતાજનક સ્તરે પહોંચી ગઈ છે. ઇરાન સાથે ચાલી રહેલા યુદ્ધના કારણે વૈશ્વિક ઇંધણ પુરવઠા પર માઠી અસર પડી છે, જેનાથી અમેરિકન અર્થતંત્ર પર ગંભીર દબાણ સર્જાયું છે.
મોંઘવારી અને આર્થિક આંકડાઓનું વધતું દબાણ
શ્રમ વિભાગના તાજેતરના આંકડાઓ મુજબ, અમેરિકામાં મોંઘવારી ઊંચા સ્તરે યથાવત છે. ઓગસ્ટ મહિનામાં ગ્રાહક ભાવાંકમાં ગત વર્ષની સરખામણીએ 3.4% નો વધારો નોંધાયો છે. જ્યારે માસિક ધોરણે જુલાઈથી ઓગસ્ટ દરમિયાન કિંમતોમાં 0.4% નો ઉછાળો આવ્યો છે, જે અગાઉના મહિનામાં 0.1% હતો. કોવિડ-19 મહામારી બાદ પહેલીવાર મોંઘવારીનું આ સ્તર યુએસ ફેડરલ રિઝર્વ માટે મોટો પડકાર બની ગયું છે અને મધ્યાવધિ ચૂંટણી નજીક હોવાથી ટ્રમ્પ પ્રશાસનની મુશ્કેલીઓમાં નોંધપાત્ર વધારો થયો છે.
ડીઝલના ભાવ પ્રતિ ગેલોન 6 ડૉલરને પાર
અમેરિકામાં ઇંધણના ભાવોએ નવી સર્વોચ્ચ સપાટી વટાવી છે. યુએસ-ઇરાન યુદ્ધના કારણે વૈશ્વિક ઇંધણ માર્કેટ પ્રભાવિત થતાં ડીઝલની સરેરાશ કિંમત 6 ડૉલર પ્રતિ ગેલોનથી વધુ થઈ ગઈ છે. મોટર ક્લબ ટ્રિપલ એ (AAA) ના જણાવ્યા અનુસાર, રાષ્ટ્રીય સરેરાશ કિંમત 6.05 ડૉલર રહી છે, જે ગયા અઠવાડિયે 5.85 ડૉલર અને ગત વર્ષની સમાન અવધિમાં 3.70 ડૉલર પ્રતિ ગેલોન હતી. ડીઝલ મોંઘું થવાથી પરિવહન અને માલસામાનની હેરફેરનો ખર્ચ વધ્યો છે, જેના કારણે રોજિંદી વસ્તુઓની કિંમતો પર સીધી અસર પડી રહી છે.
આવાસ બજાર અને વેપાર પર ગંભીર અસર
ઇંધણના ઊંચા ભાવો અને વધતી વ્યાજદરોના માહોલ વચ્ચે અમેરિકામાં ઘરોની વેચાણ પ્રવૃત્તિ પણ મંદ પડી ગઈ છે. વ્યવસાયોએ ઓનલાઈન ઓર્ડર અને ડિલિવરી પર વધારાનો ચાર્જ લગાવવાનું શરૂ કરી દીધું છે, જે સીધી રીતે સામાન્ય નાગરિકોના ખિસ્સા પર આર્થિક ભાર વધારી રહ્યું છે.
