'અમેરિકા નાકાબંધીના નામે દરિયાઈ ચાંચિયાગીરી કરી રહ્યું છે', ઈરાને ફરી સ્ટ્રેટ ઓફ હોર્મુઝ કર્યું બંધ

છેલ્લું અપડેટ : 18 Apr 2026

મધ્ય-પૂર્વના સૌથી મહત્વના જળમાર્ગ હોર્મુઝ સ્ટ્રેટમાં ઈરાને ફરી એકવાર પોતાની પકડ મજબૂત કરી છે. ઈરાનના ખાતમ અલ-અંબિયા સેન્ટ્રલ હેડક્વાર્ટરના પ્રવક્તાએ સત્તાવાર જાહેરાત કરી છે કે, આ જળમાર્ગ પર હવે ફરીથી જૂની સ્થિતિ મુજબ 'કડક સૈન્ય નિયંત્રણ' (Strict Military Control) લાગુ કરી દેવામાં આવ્યું છે. ઈરાને આ માટે અમેરિકાના ઉલ્લંઘનોને જવાબદાર ઠેરવ્યા છે.

અમેરિકા પર 'પાયરસી'નો ગંભીર આક્ષેપ

ઈરાની પ્રવક્તાએ જણાવ્યું હતું કે, અમેરિકા નાકાબંધી (Blockade) ના બહાના હેઠળ આ વિસ્તારમાં દરિયાઈ ચાંચિયાગીરી અથવા લૂંટફાટ (Piracy) જેવી પ્રવૃત્તિઓ કરી રહ્યું છે. અમેરિકન દળો દ્વારા વારંવાર આંતરરાષ્ટ્રીય નિયમોનું ઉલ્લંઘન કરવામાં આવતું હોવાથી, ઈરાને પોતાની સુરક્ષા અને સાર્વભૌમત્વ જાળવવા માટે આ વ્યૂહાત્મક માર્ગ પર સૈન્ય કંટ્રોલ વધારવાનો નિર્ણય લીધો છે.

હોર્મુઝ સ્ટ્રેટ દુનિયાના કાચા તેલના પુરવઠા માટે કરોડરજ્જુ સમાન છે. ઈરાને અહીં સૈન્ય નિયંત્રણ વધારતા હવે અહીંથી પસાર થતા વેપારી જહાજો અને ઓઈલ ટેન્કરો પર ઈરાની રિવોલ્યુશનરી ગાર્ડ્સ (IRGC) ની બાજ નજર રહેશે. જો તણાવ વધશે તો તેલની કિંમતોમાં વૈશ્વિક સ્તરે ઉછાળો જોવા મળી શકે છે.

ઇસ્લામાબાદ મંત્રણા પર અસરની શક્યતા

એક તરફ પાકિસ્તાનમાં અમેરિકા અને ઈરાન વચ્ચે શાંતિ મંત્રણા થવાની તૈયારીઓ છે, ત્યારે બીજી તરફ જમીની હકીકત (Ground Reality) માં ઈરાને આકરું વલણ અપનાવ્યું છે. ઈરાનનું આ પગલું અમેરિકા પર દબાણ લાવવાની રણનીતિ પણ હોઈ શકે છે.