VIDEO: રશિયન તેલ ખરીદવા પર ભારત-ચીન પર 100% ટેરિફ, ટ્રમ્પે કાયદા પર કર્યા હસ્તાક્ષર
છેલ્લું અપડેટ : 19 Sept 2026
વોશિંગ્ટન : અમેરિકાના રાષ્ટ્રપતિ ડોનાલ્ડ ટ્રમ્પે રશિયા અને ઈરાન પર પ્રતિબંધો વધારતા ‘Lindsey O. Graham Sanctioning Russia and Iran Act of 2026’ પર હસ્તાક્ષર કરી તેને કાયદાનું સ્વરૂપ આપી દીધું છે. આ કાયદા હેઠળ રશિયન તેલ અને ગેસ ખરીદતા દેશો પર અમેરિકાને 100 ટકા સુધી ટેરિફ (Tariff) લાદવાની સત્તા આપવામાં આવી છે. ભારત અને ચીન રશિયન ક્રૂડ ઓઈલના મોટા ખરીદદારો હોવાથી બંને દેશો પર આ જોગવાઈ લાગુ થવાની શક્યતા છે. જોકે, હાલ 100 ટકા ટેરિફ સીધો લાગુ થયો નથી; કાયદો અમેરિકન રાષ્ટ્રપતિને તે નક્કી કરવાની સત્તા આપે છે.
100 ટકા સુધી ટેરિફની સત્તા
નવા કાયદા મુજબ રશિયન ક્રૂડ ઓઈલ અથવા નેચરલ ગેસના પાંચ સૌથી મોટા ખરીદદાર દેશોમાંથી કોઈ દેશ સામે 100 ટકા સુધી ટેરિફ લગાવી શકાય છે. કયા દેશ પર કેટલો ટેરિફ લાગુ કરવો તે અંગે અંતિમ નિર્ણય ટ્રમ્પના હાથમાં રહેશે. કાયદો રશિયા સાથે ઊર્જા વેપાર ચાલુ રાખતા દેશો પર આર્થિક દબાણ વધારવાના હેતુથી લાવવામાં આવ્યો છે.
ભારત અને ચીન પર સીધી નજર
આ કાયદાની જોગવાઈ ભારત માટે મહત્વપૂર્ણ છે, કારણ કે ભારત અને ચીન રશિયન ક્રૂડ ઓઈલના મોટા ખરીદદારોમાં સામેલ છે. તેથી ભવિષ્યમાં અમેરિકન વહીવટીતંત્ર જો આ સત્તાનો ઉપયોગ કરે તો ભારતીય માલસામાન પર પણ વધારાનો ટેરિફ લાગી શકે છે. જોકે, કાયદો માત્ર સત્તા આપે છે અને દરેક દેશ પર ટેરિફ કેટલો લાગશે તે હજુ નક્કી કરવામાં આવ્યું નથી.
રશિયાની ‘શેડો ફ્લીટ’ પણ નિશાન પર
નવા કાયદામાં રશિયાના અધિકારીઓ, બેન્કો અને અન્ય સંસ્થાઓ ઉપરાંત રશિયન તેલના પરિવહન માટે ઉપયોગમાં લેવાતા ‘શેડો ફ્લીટ’ (Shadow Fleet)ના ટેન્કરોને પણ નિશાન બનાવવામાં આવ્યા છે. આ ઉપરાંત રશિયાના એનર્જી અને ડિફેન્સ સેક્ટર સાથે સંકળાયેલી કેટલીક પ્રવૃત્તિઓ સામે પણ પ્રતિબંધોનો વ્યાપ વધારવામાં આવ્યો છે.
ઈરાન પર પણ પ્રતિબંધો વધારાયા
આ કાયદો માત્ર રશિયા પૂરતો મર્યાદિત નથી. તેમાં ઈરાન પર અગાઉથી લાગુ પ્રતિબંધોને પણ આગળ વધારવામાં આવ્યા છે. અમેરિકાના જણાવ્યા અનુસાર, કાયદાનો હેતુ રશિયા અને ઈરાન સામેના પ્રતિબંધો, ટેરિફ અને અન્ય નિયંત્રણોને વધુ મજબૂત બનાવવાનો છે.
ભારતીય નિકાસકારો પર શું અસર?
જો ભારત પર 100 ટકા ટેરિફ લાગુ કરવામાં આવે તો અમેરિકન બજારમાં ભારતીય ઉત્પાદનોની કિંમત વધી શકે છે અને અમેરિકામાં નિકાસ કરતા ભારતીય ઉદ્યોગો પર દબાણ વધી શકે છે. જોકે, તેની વાસ્તવિક અસર કયા ઉત્પાદનો પર ટેરિફ લાગશે, દર કેટલો હશે અને તેનો અમલ ક્યારે થશે તેના પર નિર્ભર રહેશે. હાલ ભારતીય નિકાસકારો અમેરિકાના આગામી નિર્ણય પર નજર રાખી રહ્યા છે.
કાયદાનું નામ લિન્ડસે ગ્રેહામના નામે
આ કાયદાનું નામ દક્ષિણ કેરોલિનાના દિવંગત રિપબ્લિકન સેનેટર લિન્ડસે ગ્રેહામના નામ પરથી રાખવામાં આવ્યું છે. અમેરિકન સેનેટે ઓગસ્ટમાં અને હાઉસ ઓફ રિપ્રેઝન્ટેટિવ્સે સપ્ટેમ્બરમાં બિલને મંજૂરી આપી હતી. ત્યારબાદ 18 સપ્ટેમ્બર 2026ના રોજ ટ્રમ્પે તેના પર હસ્તાક્ષર કર્યા હતા.
