ફ્રાન્સમાં બે રાફેલ પ્લેન અથડાતા મોટો અકસ્માત, એરક્રાફ્ટ ઈન્સ્ટ્રક્ટર અને તાલીમાર્થી પાઇલટ ગુમ

ઉત્તર-પૂર્વ ફ્રાન્સમાં બે રાફેલ ફાઈટર પ્લેન હવામાં અથડાઈને મોટો અકસ્માત થયો હતો. આ બંને રાફેલ એરક્રાફ્ટ સેન્ટ-ડિઝિયર એર બેઝ પરથી ઉડાન ભરી હતી. આ દુર્ઘટના દરમિયાન, રાફેલ વિમાનમાં સવાર એક પાયલટ પોતે વિમાનમાંથી બહાર નીકળી ગયો હતો. પરંતુ અન્ય વિમાનમાંથી એક પ્રશિક્ષક અને તાલીમાર્થી પાઈલટ હજુ પણ ગુમ છે.

ઉત્તર-પૂર્વ ફ્રાન્સના શહેર કોલમ્બે-લેસ-બેલેસમાં એક મોટી દુર્ઘટના થઈ છે. મળતી માહિતી મુજબ, બે રાફેલ ફાઈટર પ્લેન હવામાં અથડાઈને જમીન પર પડી ગયા. સૈન્ય અધિકારીઓએ જણાવ્યું કે રાફેલ વિમાનમાં સવાર ક્રૂ મેમ્બરની શોધ ચાલુ છે. આ મામલામાં પેરિસમાં વાયુસેનાના પ્રવક્તાએ કહ્યું કે બંને વિમાનોએ સેન્ટ-ડિઝિયર એરબેઝ પરથી ઉડાન ભરી હતી.

એક એરક્રાફ્ટ ઈન્સ્ટ્રક્ટર અને ટ્રેઈની પાઈલટ ગુમ

વાયુસેનાના પ્રવક્તાએ જણાવ્યું હતું કે આ દુર્ઘટના દરમિયાન રાફેલ વિમાનમાં સવાર એક પાયલટ પોતે વિમાનમાંથી બહાર નીકળી ગયો હતો. પરંતુ અન્ય વિમાનમાંથી એક પ્રશિક્ષક અને તાલીમાર્થી પાઈલટ હજુ પણ ગુમ છે. અમે હજુ બીજા ક્રૂની શોધમાં છીએ.

આ મામલામાં ફ્રાન્સના રક્ષા મંત્રી સેબેસ્ટિયન લેકોર્નુએ સોશિયલ મીડિયા પ્લેટફોર્મ X પર કહ્યું કે, એક પાઈલટ સુરક્ષિત અને સ્વસ્થ જોવા મળ્યો છે. ઓપરેશનમાં સામેલ સશસ્ત્ર દળો અને પોલીસનો આભાર માનતા તેમણે કહ્યું કે દુર્ઘટના બાદ પણ શોધખોળ ચાલુ છે. બંને વિમાનો વચ્ચે અથડામણનું કારણ શું હતું તે તાત્કાલિક સ્પષ્ટ થયું નથી.

ડેપ્યુટી મેયરે અકસ્માતનો જોરદાર અવાજ સાંભળ્યો હતો

દરમિયાન કોલમ્બે-લેસ-બેલેસના ડેપ્યુટી મેયર પેટ્રિસ બોનોક્સે જણાવ્યું હતું કે અમે બપોરે 12:30 વાગ્યાની આસપાસ જોરદાર અવાજ સાંભળ્યો હતો. સાઉન્ડ બેરિયર તોડતા ફાઈટર જેટનો આ સામાન્ય અવાજ નહોતો. 

રાફેલ વિમાનની વિશેષતા?

રાફેલ એક ફાઇટર એરક્રાફ્ટ છે, જેનો ઉપયોગ દુશ્મનના એરક્રાફ્ટનો શિકાર કરવા, જમીન અને દરિયાઈ લક્ષ્યો પર હુમલો કરવા, જાસૂસી કરવા અને ફ્રાન્સના પરમાણુ હથિયારો વહન કરવા માટે થાય છે. રાફેલ એ ફ્રેન્ચ શસ્ત્ર ઉદ્યોગ માટે સૌથી વધુ વેચાતું વિમાન પણ છે. પરંતુ રાફેલ જેટને લગતા અકસ્માતો બહુ ઓછા છે. અગાઉ ડિસેમ્બર 2007માં દક્ષિણ-પશ્ચિમ ફ્રાન્સમાં ન્યુક્વેન પાસે રાફેલ જેટ ક્રેશ થયું હતું. તપાસકર્તાઓએ તારણ કાઢ્યું હતું કે પાઇલટ અસ્વસ્થ થઈ ગયો હતો. એવું માનવામાં આવે છે કે આ રાફેલની પ્રથમ દુર્ઘટના હતી.