'બધા મોબાઈલ ફોન બંધ કરી દૂર મૂકી દો': લેબનોનમાં મોબાઈલ ફોનને સ્પર્શતા પણ લોકોમાં ફફડાટ

ઇઝરાયેલની સેના અને તેની ગુપ્તચર સંસ્થા મોસાદના કારનામાઓએ હંમેશા દુશ્મન અને સમગ્ર વિશ્વને ચોંકાવી દીધા છે. લેબનોનમાં સક્રિય આતંકવાદી સંગઠન હિઝબુલ્લાહ જ્યારે છેલ્લા એક વર્ષથી હમાસ સાથે ચાલી રહેલા યુદ્ધમાં ઉતર્યું ત્યારે એવું લાગતું હતું કે ઇઝરાયેલ હવે બે મોરચે ઘેરાયેલું છે. પરંતુ જે રીતે ઈઝરાયેલે હાઈબ્રિડ વોરફેરનો આશરો લઈને હિઝબુલ્લાહ પર હુમલો કર્યો છે તે ચોંકાવનારો છે. મંગળવારે બપોરે લેબનોનમાં એક સાથે લગભગ 3 હજાર પેજર્સમાં વિસ્ફોટ થયો હતો. આ વિસ્ફોટોમાં 9 લોકોના મોત થયા હતા અને લગભગ 1900 લોકો ઘાયલ થયા હતા.

એટલું જ નહીં બુધવારે વોકી-ટોકીમાં વિસ્ફોટ થયા હતા, જેમાં 14 લોકોના મોત થયા હતા. આ મૃતકોમાં મોટાભાગના હિઝબુલ્લાહ લડવૈયાઓનો સમાવેશ થાય છે. આ ઘટના બુધવારે બની હતી, જ્યારે હિઝબુલ્લાહના બે લડવૈયાઓને દફનાવવા માટે ભીડ એકઠી થઈ હતી. આ સમય દરમિયાન વિસ્ફોટ થયો ,  અને હળવો ધુમાડો નીકળવા લાગ્યો, ઇઝરાયેલના આ હુમલાઓને કારણે લેબનોનમાં ગભરાટનો માહોલ છે. લોકો મોબાઈલ ફોનને સ્પર્શતા પણ ડરે છે. આનાથી લોકોમાં એટલો ગભરાટ ફેલાય છે કે દરેક લોકો અહીં-તહીં દોડીને ક્યાંક છુપાઈ જાય છે. આ દરમિયાન લાઉડસ્પીકર પર ધાર્મિક નારા લગાવવામાં આવે છે, પરંતુ વિસ્ફોટ પછી તે પણ બંધ થઈ જાય છે.

પરિસ્થિતિ એવી બની જાય છે કે લોકો એકબીજાની સામે જોઈને કહે છે કે ફોન સ્વીચ ઓફ કરો. ફોનની બેટરી કાઢી લો! વાસ્તવમાં, આ લોકોને ડર છે કે ફોનમાં પણ  વિસ્ફોટ થઈ શકે છે અને ઈઝરાયેલે તેમની સાથે પણ કંઈક કર્યું હશે. આ સમય દરમિયાન, લાઉડસ્પીકર દ્વારા પણ જાહેરાત કરવામાં આવે છે કે દરેક વ્યક્તિએ તેમના મોબાઈલ ફોન બંધ કરી દે, તેની બેટરીઓ કાઢી એક બાજુ મૂકી દે. દરેકના મનમાં એવો ડર છે કે તેમનો ફોન અથવા તેમની પાસે ઉભેલી કોઈ વ્યક્તિના ફોનમાં બ્લાસ્ટ થઈ શકે છે. 

રિપોર્ટ અનુસાર, એક મહિલા તેના ઘરે ફોન કરીને બાળકોની સાથે વાત કરે છે, અને તેમની સુખાકારી પૂછી મોબાઈલ ફોન સ્વીચ ઓફ કરવા અને તેનાથી દૂર સુરક્ષિત જગ્યાએ બેસી જવા કહે છે. વાસ્તવમાં આ ડર લેબનોનમાં પેજર હુમલાને કારણે છે.  હવે જ્યારે વોકી-ટોકી પણ ફૂટી રહી છે, તો તેમાં વધુ વધારો થયો હોવો જોઈએ. અત્યારે દુનિયાભરની એજન્સીઓ અને નિષ્ણાતો એ જાણવાનો પ્રયાસ કરી રહ્યા છે કે ઈઝરાયેલે આ વિસ્ફોટો કેવી રીતે કર્યા અને તે પણ આટલા દૂર બેસીને.