VIDEO: પ્રિય મિત્ર નરેન્દ્ર..." — મેક્રોન હિન્દીમાં બોલ્યા, પીએમ મોદીના વખાણ કર્યા, અને તેઓ ભારત ક્યારે આવશે તે જાહેર કર્યું

ગુરુવારે (18 જૂન) ફ્રાન્સના રાષ્ટ્રપતિ ઇમેન્યુઅલ મેક્રોને વડા પ્રધાન નરેન્દ્ર મોદીને હિન્દીમાં એક અનેખો  વિદાય સંદેશ આપ્યો. મેક્રોને હિન્દીમાં કહ્યું, "પ્રિય મિત્ર નરેન્દ્ર, હું ખૂબ ખુશ છું. નાઇસ, એવિયન અને પેરિસમાં તમારું સ્વાગત કરીને મને ખૂબ આનંદ થયો. ફ્રાન્સ અને ભારત વચ્ચેની મિત્રતા કાયમ રહે." મેક્રોને પીએમ મોદીની પેરિસ મુલાકાતના સમાપન પર આ વિદાય સંદેશ આપ્યો, જે તેમના ફ્રાન્સ પ્રવાસના અંતિમ તબક્કાને ચિહ્નિત કરે છે.   આ પછી, ફ્રેન્ચ રાષ્ટ્રપતિએ કહ્યું, "મને આશા છે કે મેં તે સાચું કહ્યું છે. મારા પ્રિય નરેન્દ્ર મોદી, હું તમારી મિત્રતા માટે ખૂબ ખૂબ આભાર માનું છું. ફ્રાન્સ તમને ખૂબ પ્રેમ કરે છે. મને આનંદ છે કે તમે દિલ્હી પાછા ફરતા પહેલા ઘણા મિત્રો સાથે પેરિસમાં છો." મેક્રોને એમ પણ ઉલ્લેખ કર્યો કે તેઓ આગામી ફેબ્રુઆરીમાં ભારતની મુલાકાત લેવાની યોજના ધરાવે છે.

પેરિસમાં ભારતીય સમુદાયને પીએમ મોદીનું સંબોધન

ફ્રાન્સથી રવાના થતાં પહેલાં પીએમ મોદીએ પેરિસમાં વસતા ભારતીય સમુદાયને સંબોધિત કર્યો હતો અને ભારત અને ફ્રાન્સના દ્વિપક્ષીય સંબંધોમાં પ્રવાસી ભારતીયોને એક મજબૂત સ્તંભ ગણાવ્યા હતા. તેમણે છેલ્લા 12 વર્ષમાં ભારતે સાધેલી આર્થિક પ્રગતિના આંકડા રજૂ કરતા જણાવ્યું કે, 'છેલ્લા 12 વર્ષમાં ભારતની નિકાસમાં 35 ગણો વધારો થયો છે. દેશમાં મોબાઈલ મેન્યુફેક્ચરિંગ યુનિટ્સમાં 100 ગણો અદભુત વિકાસ થયો છે, જેના કારણે ભારત આજે વિશ્વનો બીજો સૌથી મોટો મોબાઈલ ઉત્પાદક દેશ બની ગયો છે. આ ઝડપી પ્રગતિના જોરે ભારત અત્યારે વિશ્વની સૌથી ઝડપથી વિકસતી મુખ્ય અર્થવ્યવસ્થા છે.'

ઇન્ફ્રાસ્ટ્રક્ચરમાં અભૂતપૂર્વ વધારો

પીએમ મોદીએ સતત 12 વર્ષ સુધી દેશની સેવા કરવાની તક આપવા બદલ જનતાનો આભાર માન્યો હતો. તેમણે ભાવુક થતા કહ્યું કે, 'આ ભારતની લોકશાહીની તાકાત છે કે જેણે એક ચા વેચનારને આ સ્થાન પર પહોંચાડ્યો છે. છેલ્લા 12 વર્ષ 1.4 અબજ ભારતીયોની અદભુત ક્ષમતાના સાક્ષી રહ્યા છે. આ સમયગાળા દરમિયાન ભારતનો જીડીપી (GDP) બમણો થયો છે, સાથે જ દેશમાં ઍરપૉર્ટ, યુનિવર્સિટીઓ અને હાઇવે જેવા ઇન્ફ્રાસ્ટ્રક્ચરમાં અભૂતપૂર્વ વધારો થયો છે. એટલું જ નહીં, આ વિકાસના કારણે દેશના 25 કરોડ લોકોને ગરીબી રેખામાંથી બહાર લાવવામાં મોટી સફળતા મળી છે.'