World Emoji Day 2025 / ઈમોજી વિના અધુરી લાગે છે ચેટિંગ, પરંતુ શું તમે જાણો છો કેવી રીતે થઈ હતી તેની શરૂઆત?

આજે મોટાભાગના લોકો સોશિયલ મીડિયા પર ચેટ કરવાનું પસંદ કરે છે. પછી ભલે તે મિત્રો હોય કે સંબંધીઓ હોય, કે પછી પાર્ટનર હોય, ચેટિંગ વિના દિવસ અધૂરો રહે છે. આ ચેટિંગ આજે આપણી વાતચીતનો સૌથી મોટો ભાગ બની ગયું છે. પરંતુ અમે તમને જણાવી દઈએ કે ચેટિંગ હવે ફક્ત શબ્દો સુધી મર્યાદિત નથી, હવે લોકોની લાગણીઓ ઈમોજી દ્વારા પણ બહાર આવે છે.

પછી ભલે તે ખુશી વ્યક્ત કરવાની હોય કે ગુસ્સો વ્યક્ત કરવાની હોય કે કોઈ વસ્તુ પર પ્રેમ વ્યક્ત કરવાની હોય. દરેક લાગણી માટે એક ખાસ ઈમોજી ચોક્કસપણે મળશે. આ ઈમોજીની ઉજવણી માટે, દર વર્ષે 17 જુલાઈએ વિશ્વ ઈમોજી દિવસ (World Emoji Day) ઉજવવામાં આવે છે. આજે અમે તમને જણાવીશું કે આ દિવસનો ઈતિહાસ શું છેઅને તે પણ જણાવીશું કે ચેટિંગ દરમિયાન ક્યા ઈમોજીનો ઉપયોગ સૌથી વધુ થાય છે.

આ દિવસ કેમ ઉજવવામાં આવે છે?

ઈમોજીનો ઉપયોગ સૌપ્રથમ જાપાનના ટોક્યોમાં થયો હતો, પરંતુ 2010થી વૈશ્વિક સ્તરે તેનો ક્રેઝ વધ્યો છે. આજે ઈમોજી ફક્ત ચેટિંગનો ભાગ નથી, પરંતુ ડિજિટલ કોમ્યુનિકેશનની એક મહત્ત્વપૂર્ણ ભાષા પણ છે. એવું કહેવાય છે કે ઈમોજી બે જાપાની શબ્દો 'E' એટલે કે 'પિક્ચર' અને 'Moji' એટલે કે 'કેરેક્ટર' થી બનેલો છે. લોકો લાગણીઓ દર્શાવવા માટે ઈમોજીનો ઉપયોગ કરે છે.

શિગેતાકાએ તેની શરૂઆત કરી હતી

ઈમોજીનો ઉપયોગ સૌપ્રથમ જાપાની કલાકાર શિગેતાકા દ્વારા કરવામાં આવ્યો હતો. તેને ઈમોજી દ્વારા મોબાઈલ પર ટેક્સ્ટ મોકલવાનો વિચાર આવ્યો. 22 ફેબ્રુઆરી 1999ના રોજ, ઈમોજીનો સંપૂર્ણ સેટ તૈયાર કરવામાં આવ્યો. ધીમે ધીમે તે લોકોમાં પ્રખ્યાત થયો. વર્ષ 2016માં, ઈમોજી સેટ ન્યૂ યોર્કના એક મ્યુઝિયમમાં રાખવામાં આવ્યો. જ્યાંથી તેને સમગ્ર વિશ્વમાં લોકપ્રિયતા મળી. આજે હસવું, ખુશી વ્યક્ત કરવી, રડવું, ગુસ્સો કરવો વગેરે ઈમોજીનો ઉપયોગ દરેક નાની વસ્તુ માટે થાય છે.

જોકે, વિશ્વ ઈમોજી દિવસ (World Emoji Day) ઉજવવાનો શ્રેય ઈમોજીપીડિયાના સ્થાપક જેરેમી બર્ગને જાય છે, જેણે 2014માં તેની શરૂઆત કરી હતી. ત્યારથી, દર વર્ષે 17 જુલાઈના રોજ વિશ્વ ઈમોજી દિવસ (World Emoji Day) ઉજવવામાં આવે છે.

સૌથી વધુ ઉપયોગમાં લેવાતા ઈમોજી

Face with Tears of Joy: જ્યારે કંઈક ખૂબ રમુજી લાગે છે, ત્યારે લોકો આ ઈમોજીનો ઉપયોગ કરે છે.

Red Heart: આ ઈમોજીનો ઉપયોગ પ્રેમ વ્યક્ત કરવા માટે થાય છે.

Pleading Face: તેનો ઉપયોગ નિર્દોષતા અથવા ઈમોશનલ અપીલ દર્શાવવા માટે થાય છે.

Heart Eyes: આ ઈમોજી કોઈ વસ્તુ માટે અપાર પ્રેમ વ્યક્ત કરવા માટે બેસ્ટ છે.

Rolling on the Floor Laughing: જ્યારે હાસ્યને કાબૂમાં રાખી શકાતું નથી, ત્યારે લોકો આ ઈમોજી મોકલે છે.