VIDEO: 10નો સિક્કો લેવાની કોઈ ના પાડે તો તેને આ વીડિયો બતાવજો, આ યુવકે 1.10 લાખની બાઈક ખરીદી

Viral Video: સોશિયલ મીડિયા પર એક વીડિયો ઝડપથી વાયરલ થઈ રહ્યો છે, જેને જોઈને લોકો આશ્ચર્યચકિત થઈ ગયા છે. આ વીડિયો તેલંગાણાના યાદાદ્રી-ભુવનગિરી જિલ્લાનો છે, જ્યાં એક યુવક બાઈક ખરીદવા માટે હજારો સિક્કા ભરેલી થેલીઓ લઈને શોરૂમ પહોંચ્યો હતો. આ યુવકનું નામ કોન્ડે રઘુપતિ છે, જે ચિત્યાલા મંડલના વેલિમિનેડુ ગામનો રહેવાસી છે.

રઘુપતિએ ચિત્યાલાના શ્રી વિનાયક મોટર્સ શોરૂમમાંથી હીરો સ્પ્લેન્ડર પ્લસ બાઈક ખરીદી હતી. પરંતુ તેણે ન તો નોટોમાં ચૂકવણી કરી અને ન તો ઓનલાઈન પેમેન્ટ કર્યું. તેણે બાઈકની 1.10 લાખ રૂપિયાની સંપૂર્ણ કિંમત માત્ર 10-10 રૂપિયાના સિક્કાઓમાં ચૂકવી હતી.

સિક્કાથી ભરેલી થેલીઓ લઈને પહોંચ્યો શોરૂમ

વીડિયોમાં જોવા મળે છે કે રઘુપતિ અનેક પ્લાસ્ટિકની થેલીઓમાં સિક્કા ભરીને શોરૂમ પહોંચ્યો હતો. જ્યારે તેણે સિક્કાથી ભરેલી થેલીઓ બહાર કાઢી ત્યારે ત્યાં હાજર લોકો અને શોરૂમના કર્મચારીઓ આશ્ચર્યમાં પડી ગયા હતા. જોકે, શોરૂમના સ્ટાફે ધીરજપૂર્વક તમામ સિક્કાઓ ગણવાનું શરૂ કર્યું. લાંબી ગણતરી બાદ જાણવા મળ્યું કે સિક્કાઓની કુલ રકમ ખરેખર 1 લાખ 10 હજાર રૂપિયા હતી. આ પહેલી ઘટના નથી. અગાઉ પણ તેલંગાણાના એક યુટ્યુબર એરોવેની વેંકટેશે 2.85 લાખ રૂપિયાની KTM બાઈક માત્ર 1-1 રૂપિયાના સિક્કાઓથી ખરીદી હતી, જેને ગણવામાં શોરૂમના કર્મચારીઓને આખો દિવસ લાગી ગયો હતો.

વીડિયો વાયરલ થતાં લોકોની કરી કોમેન્ટ

વીડિયો સોશિયલ મીડિયા પર વાયરલ થતાં જ લોકો તરફથી વિવિધ પ્રકારની પ્રતિક્રિયાઓ આવી રહી છે. કેટલાક યુઝર્સે તેને બચતનું ઉત્તમ ઉદાહરણ ગણાવ્યું છે. એક યુઝરે લખ્યું કે આ વીડિયો બચતનું મહત્વ સમજાવે છે. જ્યારે કેટલાક લોકોએ આ રીતની ટીકા પણ કરી છે. એક યુઝરે રમૂજી અંદાજમાં લખ્યું કે, "આટલા બધા સિક્કા જોઈને શોરૂમના કર્મચારીઓના મનમાં શું ચાલતું હશે તેની કલ્પના કરી શકાય!"