IPL 2026માં આ ટીમનો હેડ કોચ બની શકે છે યુવરાજ સિંહ, મેનેજમેન્ટમાં ફેરફાર કરવા માંગે છે ફ્રેન્ચાઈઝીના માલિક!
છેલ્લું અપડેટ : 30 Oct 2025
ભૂતપૂર્વ ભારતીય ખેલાડી યુવરાજ સિંહ કોચિંગની દુનિયામાં પ્રવેશવાની તૈયારી કરી રહ્યો છે. એવા અહેવાલ આવી રહ્યા છે છે કે IPL ફ્રેન્ચાઈઝી લખનૌ સુપર જાયન્ટ્સ (LSG) ટીમના નવા હેડ કોચ બનવા માટે તેની સાથે વાતચીત કરી રહી છે. ભૂતપૂર્વ ઓસ્ટ્રેલિયન કોચ જસ્ટિન લેંગર હાલમાં ટીમનું કોચિંગ કરી રહ્યો છે. જોકે, અહેવાલો સૂચવે છે કે ટીમના માલિક સંજીવ ગોએન્કા હવે ટીમની જવાબદારી એક ભારતીયને સોંપવા માંગે છે.
યુવરાજ સિંહ અને LSG વચ્ચે વાતચીત ચાલી રહી છે
મીડિયા અહેવાલો સૂચવે છે કે યુવરાજ સિંહ અને LSG વચ્ચે ચર્ચા ચાલી રહી છે. જો આ ડીલ ફાઈનલ થઈ જાય છે, તો તે IPL ઈતિહાસમાં એક મોટો કોચિંગ પગલું હશે. જોકે યુવરાજે કોઈપણ પ્રોફેશનલ ટીમ સાથે હેડ કોચ તરીકે કામ નથી કર્યું, તેણે અબુ ધાબી T10 લીગમાં મેન્ટર તરીકે સેવા આપી છે. વધુમાં, તે લાંબા સમયથી યુવા ખેલાડીઓને ટ્રેનિંગ આપી રહ્યો છે, જેમાં શુભમન ગિલ અને અભિષેક શર્મા જેવા ખેલાડીઓનો સમાવેશ થાય છે. તે હવે પ્રિયાંશ આર્ય અને પ્રભસિમરન સિંહ જેવા યુવાનો સાથે પણ કામ કરી રહ્યો છે.
પહેલા પણ ચર્ચાઓ થઈ છે
યુવરાજ સિંહનું નામ IPL ટીમ સાથે જોડાયું હોય તેવું આ પહેલીવાર નથી. ગઈ સિઝનમાં એવા અહેવાલો આવ્યા હતા કે જો ગુજરાત ટાઈટન્સ (GT) આશિષ નેહરાથી અલગ થઈ જાય, તો યુવરાજને તેના સ્થાને લાવવામાં આવી શકે છે. તેવી જ રીતે, દિલ્હી કેપિટલ્સ (DC) એ પણ રિકી પોન્ટિંગના સ્થાને યુવરાજને સામેલ કરવાની ચર્ચા કરી હતી, પરંતુ અંતે, હેમાંગ બડાનીને કોચ તરીકે નિયુક્ત કરવામાં આવ્યો હતો.
2022માં IPLમાં પ્રવેશ કરનાર LSG એ તેની પ્રથમ બે સિઝનમાં પ્લેઓફમાં સ્થાન મેળવ્યું હતું, પરંતુ ત્યારબાદ ટીમ બે વાર સાતમા સ્થાને રહી હતી. આના કારણે મેનેજમેન્ટમાં ઘણા ફેરફારો થયા છે.