ICUમાંથી બહાર નીકળ્યા બાદ શ્રેયસ અય્યરનું પહેલું નિવેદન સામે આવ્યું, ઈજા પર આપ્યું મોટું અપડેટ
છેલ્લું અપડેટ : 30 Oct 2025
સિડની ODI દરમિયાન ઈજાગ્રસ્ત થયા બાદ ટીમ ઈન્ડિયાના ODI વાઈસ કેપ્ટન શ્રેયસ અય્યરને સિડનીની એક હોસ્પિટલમાં દાખલ કરવામાં આવ્યો છે. તેની ગંભીર હાલતને કારણે તેને થોડા સમય માટે ICUમાં રાખવામાં આવ્યો હતો. જોકે, છેલ્લા કેટલાક દિવસોમાં તેની સ્થિતિમાં સુધારો થયો છે, જેના કારણે તેને ICUમાંથી રજા આપવામાં આવી છે. અય્યરે હવે તેની ઈજા પછી પોતાની પહેલી પ્રતિક્રિયા આપી છે. સોશિયલ મીડિયા પર પોસ્ટ શેર કરીને શ્રેયસે તેના બધા ફેન્સનો આભાર માન્યો છે.
શ્રેયસ અય્યરની પહેલી પ્રતિક્રિયા
25 ઓક્ટોબરના રોજ સિડનીમાં ત્રીજી ODI દરમિયાન અય્યરને સ્પ્લીન ઈજા થઈ હતી. પાંચ દિવસ સુધી, BCCI સતત ભારતીય ફેન્સને ઈજા વિશે અપડેટ આપતું રહ્યું હતું, પરંતુ અય્યરે કોઈ પ્રતિક્રિયા નહતી આપી. હવે, ICUમાંથી બહાર આવ્યા પછી, ભારતીય સ્ટાર ખેલાડીએ સોશિયલ મીડિયા પર પોસ્ટ શેર કરીને તેના ફેન્સને કહ્યું, "હું હાલમાં રિકવરી પ્રોસેસમાં છું અને દરેક પસાર થતા દિવસ સાથે સ્વસ્થ થઈ રહ્યો છું. મને મળેલી બધી શુભેચ્છાઓ અને સપોર્ટ માટે હું ખૂબ આભારી છું. તેનો ખરેખર મહત્ત્વપૂર્ણ છે. મને તમારા વિચારોમાં રાખવા બદલ આભાર."
અય્યરને મળશે 2 મહિનાનો બ્રેક?
ટીમ ઈન્ડિયાનો સ્ટાર બેટ્સમેન શ્રેયસ અય્યર ઈજાથી ખૂબ પરેશાન છે. આ ઈજાના કારણે તેને લગભગ બે મહિના સુધી ક્રિકેટથી દૂર રહેવું પડી શકે છે. તે જાન્યુઆરીમાં ન્યુઝીલેન્ડ સામેની ત્રણ મેચની ODI સિરીઝમાં પાછો ફરી શકે છે. છેલ્લા ત્રણ વર્ષોમાં, અય્યરે ODI ફોર્મેટમાં સતત રન બનાવીને પોતાને સાબિત કર્યો છે, જેના કારણે તેને ઓસ્ટ્રેલિયા પ્રવાસ પહેલા વાઈસ કેપ્ટન તરીકે નિયુક્ત કરવામાં આવ્યો હતો. ઈજામાંથી પાછા ફર્યા પછી, અય્યર T20 ફોર્મેટમાં પાછા ફરવા માટે પણ તમામ પ્રયાસો કરશે. તેણે અત્યાર સુધી ભારતીય ટીમ માટે ત્રણેય ફોર્મેટમાં પોતાને સાબિત કર્યો છે.