ક્રિકેટનું એ ખતરનાક સાધન, જેણે લીધો 17 વર્ષીય ખેલાડીનો જીવ; ટીમ ઈન્ડિયા પણ કરે છે તેનો ઉપયોગ
છેલ્લું અપડેટ : 30 Oct 2025
ક્રિકેટ ઓસ્ટ્રેલિયાએ 30મી તારીખે સવારે ફેન્સને એક દુઃખદ સમાચાર આપ્યા હતા. પ્રેક્ટિસ દરમિયાન 17 વર્ષીય બેન ઓસ્ટિનનું બોલ વાગવાથી હોસ્પિટલમાં મૃત્યુ થયું હતું. ઓસ્ટિનના મૃત્યુ પછી, ક્રિકેટ ફેન્સ થ્રોડાઉન સ્પેશિયાલિસ્ટની વેંગર સ્ટીક વિશે જાણવા માંગે છે. આ લાકડીથી ફેંકવામાં આવેલો બોલ ઓસ્ટિનને વાગ્યો હતો. ટીમ ઈન્ડિયાના થ્રોડાઉન સ્પેશિયાલિસ્ટ રઘુ પણ તેનો ઉપયોગ કરે છે. જેના કારણે ફેન્સ જાણવા માંગે છે કે તેનો પ્રયોગ શા માટે કરવામાં આવે છે.
ક્રિકેટમાં વેંગર શું છે?
ટ્રેનિંગ દરમિયાન, ખેલાડીઓ અને થ્રોડાઉન સ્પેશિયાલિસ્ટ સાઈડ આર્મ બોલ થ્રોઅરનો ઉપયોગ કરે છે, જેને બોલચાલમાં વેંગર તરીકે ઓળખવામાં આવે છે. તમને જણાવી દઈએ કે વેંગર બે પ્રકારના હોય છે. એક સાઈડ આર્મ ક્લબ છે, જેનો ઉપયોગ શરૂઆત કરનારાઓ દ્વારા થાય છે. બીજો સાઈડ આર્મ એલીટ છે, જેનો ઉપયોગ ઈન્ટરનેશનલ અને નેશનલ લેવલના ખેલાડીઓ દ્વારા થાય છે. સાઈડ આર્મ એલીટ સતત સારી ગતિએ બોલિંગ કરવામાં મદદ કરે છે. આનાથી થ્રોડાઉન સ્પેશિયાલિસ્ટ બેટ્સમેન સામે વધુ બોલ ફેંકી શકે છે, અને તેમને 10થી 15 ઓવર દોડીને બોલિંગ કરવાની જરૂર નથી, જેના કારણે તેના ખભા, પીઠ અને પગ પર વધુ પડતો ભાર પડે છે. આ જ કારણ છે કે હવે લગભગ દરેક ટીમ પાસે બે થ્રોડાઉન સ્પેશિયાલિસ્ટ છે.
વેંગરનો ઉપયોગ કરવાના જોખમો શું છે?
નાના ક્લબો પણ વેંગરનો ઉપયોગ કરે છે કારણ કે તે સસ્તા છે. સાઈડ આર્મ ક્લબની કિંમત લગભગ 65 ડોલર છે, તો સાઈડ આર્મ એલિટની કિંમત લગભગ 99 ડોલર છે. બોલિંગ મશીનની કિંમત વધુ હોવાના કારણે પણ વેંગરનો ઉપયોગ કરવામાં આવે છે. જો વેંગરનો યોગ્ય રીતે ઉપયોગ ન કરવામાં આવે તો, બોલ બીમર પણ થઈ શકે છે. આ સિવાય કમરથી ઉપર બાઉન્સર અને ફુલ ટોસ થઈ શકે છે. આનાથી બોલ ખેલાડીને કોઈપણ ખોટી જગ્યાએ વાગી શકે છે, જેનાથી ઈજા થવાનું જોખમ વધી શકે છે. તેથી, આ સ્ટીકનો ઉપયોગ ફક્ત સ્પેશિયાલિસ્ટ થ્રોડાઉન દ્વારા જ કરાવવો જોઈએ.
