IPLની બાકીની મેચો ક્યારે રમાશે? BCCI એ ફ્રેન્ચાઇઝીઓને આપ્યું મોટું અપડેટ 

ભારતીય ક્રિકેટ કંટ્રોલ બોર્ડ (BCCI) એ પંજાબ કિંગ્સ સિવાયની તમામ IPL ટીમોને મંગળવાર સુધીમાં પોતપોતાના હોમ ગ્રાઉન્ડ પર રિપોર્ટ કરવા જણાવ્યું છે. અહેવાલ મુજબ, બોર્ડે બધી ફ્રેન્ચાઇઝીઓને મૌખિક રીતે જાણ કરી છે કે તેઓ ટૂંક સમયમાં નવું શેડ્યૂલ લાવવા અને IPL 2025 ફરી શરૂ કરવાની યોજના બનાવી રહ્યા છે. BCCIએ ફ્રેન્ચાઇઝીઓને તેમના સંબંધિત વિદેશી ખેલાડીઓ સાથે વાત કરવા અને તેમની ભવિષ્યની યોજનાઓ વિશે પૂછવા અને તેઓ ક્યારે ભારત પાછા આવી શકે છે તે પણ પૂછવા જણાવ્યું છે.

ખેલાડીઓ ભેગા કરવા જણાવ્યું
BCCIએ ફ્રેન્ચાઇઝીઓને મંગળવાર સુધીમાં પોતપોતાના ખેલાડીઓ ભેગા કરવા જણાવ્યું છે. IPLમાં હજુ કુલ 16 મેચ રમવાની બાકી છે, જેમાં 12 લીગ રાઉન્ડ અને ચાર પ્લેઓફ મેચનો સમાવેશ થાય છે. તેનો અંતિમ મુકાબલો 25 મેના રોજ યોજાવાનો છે. જોકે, ભારત-પાકિસ્તાન સંઘર્ષને કારણે IPL એક અઠવાડિયા માટે મુલતવી રાખવામાં આવી હતી. હવે જ્યારે યુદ્ધવિરામ લાગુ થઈ ગયો છે, ત્યારે BCCI શક્ય તેટલી વહેલી તકે IPL ફરી શરૂ કરવા માંગે છે.

મોટાભાગના વિદેશી ખેલાડીઓ સ્વદેશ જવા રવાના થયા
શુક્રવારે IPL મુલતવી રાખ્યા પછી તરત જ, મોટાભાગના વિદેશી ખેલાડીઓ અને સપોર્ટ સ્ટાફ તે જ સાંજે પોતાના ઘરે જવા રવાના થઈ ગયા. જે વિદેશી ખેલાડીઓ પાછા જવા માંગતા હતા, તેમના માટે તેમની ફ્રેન્ચાઇઝી દ્વારા પરત ફરવાની વ્યવસ્થા કરવામાં આવી હતી. અહેવાલ મુજબ, BCCIએ ફ્રેન્ચાઇઝીઓને મંગળવાર સુધીમાં રિપોર્ટ કરવા કહ્યું છે કારણ કે તે 25 મેની નિર્ધારિત તારીખ સુધીમાં આઈપીએલ પૂર્ણ કરવા માંગે છે. લીગ રાઉન્ડમાં 12 મેચ બાકી છે અને બીસીસીઆઈ આ બધી મેચોને ડબલ હેડર સાથે સમાપ્ત કરવા માંગે છે.

મહત્તમ ડબલ હેડર, 25 મે ના રોજ ફાઇનલ?
અહેવાલ અનુસાર બોર્ડ 15 મેની આસપાસ લીગ ફરી શરૂ કરવાનું વિચારી રહ્યું છે. જો લીગ 15 મેથી શરૂ થાય તો પણ, દરરોજ ડબલ હેડર સાથે 12 મેચ 20 મે સુધીમાં પૂર્ણ થશે. આ પછી, ક્વોલિફાયર-1, એલિમિનેટર અને ક્વોલિફાયર-2 મેચ 21 થી 24 મે દરમિયાન રમી શકાય છે અને ફાઇનલ 25 મેના રોજ રમી શકાય છે.

'પંજાબ માટે  ન્યૂટ્રલ સ્થળ નક્કી કરવામાં આવશે'
બીસીસીઆઈના એક સૂત્રના જણાવ્યા અનુસાર "તમામ ફ્રેન્ચાઇઝીઓને મંગળવાર સુધીમાં તેમના બધા ખેલાડીઓ સાથે તેમના હોમ ગ્રાઉન્ડ પર રિપોર્ટ કરવા માટે કહેવામાં આવ્યું છે. પંજાબને તટસ્થ સ્થાન આપવામાં આવશે. તેથી તેમના રિપોર્ટિંગ સ્થાનની પુષ્ટિ હજુ બાકી છે. બોર્ડ શક્ય તેટલા ડબલ હેડર્સ રાખવાની યોજના બનાવી રહ્યું છે જેથી તેઓ તેમની નિર્ધારિત તારીખ મુજબ આઈપીએલ પૂર્ણ કરી શકે. BCCI આ મામલે સરકાર સાથે પણ વાત કરશે. દરમિયાન, IPLના ચેરમેન અરુણ ધુમલે જણાવ્યું હતું કે તેઓ શનિવારે ભારત અને પાકિસ્તાન વચ્ચે યુદ્ધવિરામની જાહેરાત થયા પછી સ્થગિત આઈપીએલ તાત્કાલિક ફરી શરૂ થવાની શક્યતા જોઈ રહ્યા છે.

'કેન્દ્ર સરકારનો પણ સંપર્ક કરવામાં આવશે'
તેમણે કહ્યું, 'હમણાં જ યુદ્ધવિરામની જાહેરાત કરવામાં આવી છે. અમે હવે IPL ફરી શરૂ કરવાની અને સમાપ્ત કરવાની શક્યતા જોઈ રહ્યા છીએ. જો તાત્કાલિક કામગીરી શક્ય હોય તો આપણે સ્થળની તારીખો અને મેચો પર કામ કરવાની જરૂર છે. હવે અમે ટીમ માલિકો, બ્રોડકાસ્ટર્સ અને સંકળાયેલા દરેક વ્યક્તિ સહિત તમામ હિસ્સેદારો સાથે વાત કરીશું અને આગળનો રસ્તો શોધીશું. સૌથી અગત્યનું, આપણે આ વિશે સરકાર સાથે પણ વાત કરવી પડશે.

મેચો માટે ત્રણ સ્થળો નક્કી કરવામાં આવશે?
અહેવાલ અનુસાર BCCI એ બાકીની IPL મેચો માટે ચેન્નાઈ, બેંગલુરુ અને હૈદરાબાદને શોર્ટલિસ્ટ કર્યા છે. જોકે, સ્થળો અંગેનો અંતિમ નિર્ણય સરકાર સાથે પરામર્શ કર્યા પછી લેવામાં આવશે. શુક્રવારે બીસીસીઆઈએ IPLને એક અઠવાડિયા માટે મુલતવી રાખવાનો નિર્ણય લીધો. ગુરુવારે, ધર્મશાળાના HPCA સ્ટેડિયમમાં દિલ્હી કેપિટલ્સ અને પંજાબ કિંગ્સ વચ્ચેની IPL મેચ સુરક્ષાના કારણોસર રદ કરવામાં આવી હતી. ધર્મશાલાના HPCA સ્ટેડિયમમાં ફ્લડલાઇટ બંધ થયા પછી આ ઘટના બની. ધુમલે કહ્યું હતું કે આ નિર્ણય સાવચેતી રૂપે લેવામાં આવ્યો છે.