રાશિદ ખાનના નામે થઈ મોટી સિદ્ધી, T20Iમાં આ કારનામું કરનાર વિશ્વનો પહેલો બોલર બન્યો
અફઘાનિસ્તાનના સ્ટાર સ્પિનર રાશિદ ખાને T20I ક્રિકેટમાં એક એવી સિદ્ધિ હાંસલ કરી છે જે પહેલા કોઈ બોલર નથી કરી શક્યો. તે T20I ક્રિકેટમાં 200 વિકેટ પૂર્ણ કરનાર વિશ્વનો પ્રથમ બોલર બન્યો છે. તેણે ગુરુવારે (29 ઓક્ટોબર) શારજાહમાં ઝિમ્બાબ્વે સામેની T20I સિરીઝની બીજી મેચમાં તદવાનાશે મારુમાનીને આઉટ કરીને આ ઐતિહાસિક સિદ્ધિ હાંસલ કરી હતી.
રાશિદ ખાને ઓક્ટોબર 2015માં ઝિમ્બાબ્વે સામે T20I ડેબ્યુ કર્યું હતું. સપ્ટેમ્બર 2025માં, તે ટિમ સાઉથીને પાછળ છોડીને T20Iમાં સૌથી સફળ બોલર બન્યો હતો. હવે 200 વિકેટનો આંકડો પાર કરીને તેણે પોતાનું વર્ચસ્વ વધુ મજબૂત બનાવ્યું છે. ઈંગ્લેન્ડનો આદિલ રાશિદ 171 વિકેટ સાથે આ યાદીમાં બીજા ક્રમે છે.
અફઘાનિસ્તાનના અઝમતુલ્લાહ ઉમરઝઈ અને ઇજાઝ અહમદ અહમદઝાઈએ પણ આ મેચમાં ઈતિહાસ રચ્યો. તેમણે છઠ્ઠી વિકેટ માટે 142 રન ઉમેર્યા. T20I મેચોમાં આ વિકેટ માટે આ સૌથી મોટી પાર્ટનરશિપ છે. તેઓએ આન્દ્રે રસેલ અને શેરફેન રૂધરફોર્ડ દ્વારા 139 રનના રેકોર્ડને તોડી નાખ્યો.
આ T20I મેચોમાં અફઘાનિસ્તાન દ્વારા કોઈપણ વિકેટ માટે સૌથી મોટી પાર્ટનરશિપ પણ છે. અગાઉની પાર્ટનરશિપ મોહમ્મદ નબી અને ઇબ્રાહિમ ઝદરાન વચ્ચે 86 રનની હતી.
મેચમાં, અફઘાનિસ્તાને ટોસ હારીને પ્રથમ બેટિંગ કરતા સાત વિકેટે 221 રન બનાવ્યા. ઉમરઝઈએ 50 બોલમાં 116 રનની વિસ્ફોટક ઈનિંગ રમી, જ્યારે ઇજાઝ અહમદ અહમદઝઈએ 27 બોલમાં 52 રન બનાવ્યા. જવાબમાં, ઝિમ્બાબ્વેએ સારી શરૂઆત કરી, જેમાં બ્રાયન બેનેટ અને ઇનોસન્ટ કૈયાએ પ્રથમ વિકેટ માટે 39 રન ઉમેર્યા.
જોકે, ત્યારબાદ ઝિમ્બાબ્વેએ 84 રનના સ્કોર પર પાંચ વિકેટ ગુમાવી દીધી. કેપ્ટન સિકંદર રઝાએ અણનમ 106 અને તફધ્વા ત્સિગાએ અણનમ 31 રન બનાવીને છઠ્ઠી વિકેટ માટે 120 રન ઉમેર્યા, પરંતુ ટીમ 20 ઓવરમાં માત્ર 202 રન જ બનાવી શકી.
