VIDEO: વિરાટ કોહલીએ પોતાનો 163મો ODI કેચ પૂરો કર્યો, આ બે દિગ્ગજને પાછળ છોડી મોટી સિદ્ધિ મેળવી
એક તરફ ઘણા લોકોનું કહેવું છે કે વિરાટ કોહલી ODIમા
એક તરફ ઘણા લોકોનું કહેવું છે કે વિરાટ કોહલી ODIમાંથી રિટાયરમેન્ટ લઈ લેશે. તો બીજી તરફ આજે વિરાટે ઘણી સિદ્ધિઓ મેળવી લોકોનું મોઢું બંધ કરાવ્યું છે. સિડની ક્રિકેટ ગ્રાઉન્ડ (SCG) ખાતે શનિવારે (25મી ઓક્ટોબર) ભારત અને ઓસ્ટ્રેલિયા વચ્ચે રમાઈ રહેલી ત્રીજી વન-ડે ઇન્ટરનેશનલ (ODI) મેચમાં વિરાટ કોહલીએ પોતાનો જલવો બતાવ્યો. તેણે ફરી એકવાર પોતાની ફિલ્ડિંગથી સાબિત કરી દીધું કે તે વિશ્વના સૌથી ફિટ ક્રિકેટરોમાંનો એક છે. મેચ દરમિયાન કોહલીએ એક અદ્ભુત અને ઝડપથી કેચ પકડીને ઓસ્ટ્રેલિયાના બેટર મેથ્યુ શોર્ટને પેવેલિયન પરત ફરતો કર્યો હતો.
આ રીતે પકડ્યો શાનદાર કેચ
ઓસ્ટ્રેલિયાની ઇનિંગ્સની 23મી ઓવરમાં વોશિંગ્ટન સુંદરની બોલિંગ પર મેથ્યુ શોર્ટે મિડ-વિકેટ તરફ એક ઝડપી શોટ રમ્યો હતો. બોલ એટલી ઝડપથી આવ્યો કે ફિલ્ડિંગ કરી રહેલા કોહલી પાસે પ્રતિક્રિયા આપવા માટે માંડ એક સેકન્ડનો સમય હતો. જો કે, કોહલીએ પોતાની ચપળતાથી બોલને પોતાના હાથમાં જકડીને એક અકલ્પનીય કેચ પૂરો કર્યો. કોહલીના આ કેચથી સ્ટેડિયમમાં હાજર હજારો દર્શકો રોમાંચિત થઈ ગયા હતા અને આખું મેદાન 'કોહલી... કોહલી...'ના નારાઓથી ગુંજી ઉઠ્યું હતું.
ફિલ્ડિંગમાં તોડ્યો રિકી પોન્ટિંગનો રેકોર્ડ
આ કેચ પકડવાની સાથે જ વિરાટ કોહલીએ ODI ક્રિકેટમાં એક મોટી સિદ્ધિ પણ હાંસલ કરી દીધી છે. આ મેચમાં કોહલીએ પોતાનો 163મો ODI કેચ પૂરો કરીને ઓસ્ટ્રેલિયાના દિગ્ગજ કેપ્ટન રિકી પોન્ટિંગ (160 કેચ)ને પાછળ છોડી દીધો છે. નોંધનીય છે કે, ODI ક્રિકેટમાં સૌથી વધુ કેચ પકડનારા ખેલાડીઓની યાદીમાં હવે કોહલી મહેલા જયવર્ધને (218 કેચ)થી જ પાછળ છે.
કોહલી ODIમાં બીજા ક્રમનો સૌથી વધુ રન બનાવનાર ખેલાડી પણ બન્યો
વિરાટ કોહલી ODIમાં બીજા ક્રમનો સૌથી વધુ રન બનાવનાર ખેલાડી પણ બન્યો છે. કોહલીએ હવે આ ફોર્મેટમાં 14,235 રન બનાવ્યા છે, જે શ્રીલંકાના ભૂતપૂર્વ કેપ્ટન કુમાર સંગાકારાના રનને પાછળ છોડી ગયા છે. સંગાકારાએ ODIમાં 14,234 રન બનાવ્યા છે. હવે, ફક્ત સચિન તેંડુલકર, જેમણે 18,426 રન બનાવ્યા છે, તે આ બાબતમાં કોહલીથી આગળ છે.
વિરાટે સચિનને આ મામલે પાછળ છોડ્યો
ઓસ્ટ્રેલિયા સામેની પોતાની અડધી સદી સાથે, કોહલીએ લક્ષ્યનો પીછો કરતી વખતે સૌથી વધુ 50+ રન બનાવવાના સંદર્ભમાં સચિન તેંડુલકરને પાછળ છોડી દીધો છે. કોહલીએ વનડેમાં 70મી વખત પીછો કરતી વખતે 50+ રન બનાવ્યા, જ્યારે સચિને પોતાના સમય દરમિયાન 69 વખત 50+ રન બનાવ્યા હતા.
