શેફાલી-સ્મૃતિની જોડીએ લખ્યો નવો ઈતિહાસ, ઝિમ્બાબ્વે સામેની T20I મેચમાં બનાવ્યો વર્લ્ડ રેકોર્ડ

શેફાલી વર્મા અને સ્મૃતિ મંધાનાની જોડીએ T20 આંતરરાષ્ટ્રીય મેચોમાં એવી સિદ્ધિ હાંસલ કરી જે બીજા કોઈએ હાંસલનથી કરી. તેઓએ હવે એક કેલેન્ડર વર્ષમાં 1,000થી વધુ રનની પાર્ટનરશિપ નોંધાવી છે.

આ સાથે મંધાના-શેફાલીની જોડી એક જ વર્ષમાં 1,000 કે તેથી વધુ રનની પાર્ટનરશિપ કરનારી વિશ્વની પ્રથમ જોડી બની. આ સીમાચિહ્ન સુધી પહોંચવા માટે તેમને ફક્ત 13 રનની જરૂર હતી, જે તેમણે પ્રથમ ઓવરમાં જ હાંસલ કરી હતી.

શેફાલી-મંધાનાની જોડીની શાનદાર બેટિંગ

મંધાના-શેફાલીની જોડીએ આ સમયગાળા દરમિયાન બીજો રેકોર્ડ પણ બનાવ્યો. તેઓ હવે એક કેલેન્ડર વર્ષમાં કોઈપણ વિકેટ માટે સૌથી વધુ 50થી વધુની પાર્ટનરશિપનો રેકોર્ડ ધરાવે છે.

આ મંધાના-શેફાલીની નવમી 50+ પાર્ટનરશિપ હતી. આ સમયગાળા દરમિયાન તેઓએ એક વર્ષમાં સૌથી વધુ 50થી વધુની પાર્ટનરશિપ માટે હોંગકોંગ મહિલા યાસ્મીન દાસવાની અને નતાશા માઇલ્સનો રેકોર્ડ તોડી નાખ્યો.

યાસ્મીન અને નતાશાએ આ વર્ષે આઠ 50થી વધુની પાર્ટનરશિપ કરી છે. જોકે, મંધાના અને શેફાલી હવે આ યાદીમાં તેમને પાછળ છોડી દીધા છે.

ભારતે મેચ સરળતાથી જીતી લીધી

શેફાલીની ધમાકેદાર અડધી સદી અને મંધાનાની અણનમ ઈનિંગના કારણે ભારતે બીજી T20Iમાં ઝિમ્બાબ્વેને 9 વિકેટથી હરાવ્યું. આ સાથે, ટીમ ઈન્ડિયાએ સિરીઝમાં 2-0ની અજેય લીડ મેળવી છે.

શેફાલીએ 24 બોલમાં ઝડપી 55 રન બનાવ્યા, જેમાં છ ચોગ્ગા અને ચાર છગ્ગાનો સમાવેશ થાય છે. કેપ્ટન સ્મૃતિ મંધાના 25 બોલમાં 47 રન બનાવી અણનમ રહી, મેચનો અંત એક છગ્ગા સાથે કર્યો.

મંધાના અને શેફાલીએ 96 રનની ઓપનિંગ પાર્ટનરશિપ કરી. ભારતે ફક્ત 8.5 ઓવરમાં 103 રનનો ટાર્ગેટ સરળતાથી ચેઝ કરી લીધો.

આ પહેલા ઝિમ્બાબ્વેએ 20 ઓવરમાં 8 વિકેટ ગુમાવીને 102 રન બનાવ્યા હતા. ઝિમ્બાબ્વે તરફથી ચિપો મુગેરી-તિરિપાનોએ 34 અને જોસેફાઈન કોમોએ 27 રન બનાવ્યા હતા. ભારત તરફથી નિક્કી પ્રસાદે બે વિકેટ ઝડપી હતી.