Video: હાથમાં દંડ, શરીર પર RSSનો ગણવેશ અને માથે કાળી ટોપી! ટીમ ઈન્ડિયાના પૂર્વ ક્રિકેટરની તસવીરો વાયરલ
ભારતીય ક્રિકેટ ટીમના પૂર્વ બેટ્સમેન કેદાર જાધવ (Kedar Jadhav) હાલ પોતાની ક્રિકેટ કારકિર્દીને કારણે નહીં, પરંતુ રાષ્ટ્રીય સ્વયંસેવક સંઘ (RSS)ના કાર્યક્રમમાં ભાગ લેવા બદલ ચર્ચામાં છે. 20 ઑક્ટોબર, 2026ના રોજ મહારાષ્ટ્રના પુણેમાં યોજાયેલા સંઘના વિજયાદશમી ઉત્સવમાં કેદાર જાધવ જોડાયા હતા. આ દરમિયાન તેમણે સંઘના પથસંચલનમાં ભાગ લીધો હતો. ત્યારબાદ ગણવેશમાં તેમની તસવીરો સોશિયલ મીડિયા પર સામે આવતાં ચર્ચા શરૂ થઈ છે.
RSSના ગણવેશમાં જોવા મળ્યા કેદાર જાધવ
પુણેના ડેક્કન જિમખાના કોલોની વિસ્તારમાં આયોજિત વિજયાદશમી કાર્યક્રમમાં કેદાર જાધવ સફેદ શર્ટ, ખાખી પેન્ટ અને કાળી ટોપી પહેરેલા જોવા મળ્યા હતા. પથસંચલન દરમિયાન તેમના હાથમાં દંડ (લાકડી) પણ હતો. તેમણે પોતાના ઇન્સ્ટાગ્રામ (Instagram) એકાઉન્ટ પર આ કાર્યક્રમની તસવીરો શેર કરી હતી. ત્યારબાદ તેમની તસવીરો ચર્ચાનો વિષય બની હતી.
કેદાર જાધવે પોતાની પોસ્ટમાં રાષ્ટ્રીય સ્વયંસેવક સંઘની પ્રવૃત્તિઓ અને તેના વિચારો સાથે જોડાયેલો સંદેશ પણ શેર કર્યો હતો.
2024માં ક્રિકેટના તમામ ફોર્મેટમાંથી નિવૃત્તિ
41 વર્ષીય કેદાર જાધવે 3 જૂન, 2024ના રોજ ક્રિકેટનાં તમામ ફોર્મેટમાંથી નિવૃત્તિની જાહેરાત કરી હતી. તેમણે સોશિયલ મીડિયા મારફતે પોતાના નિર્ણયની જાણકારી આપી હતી. જાધવે 16 નવેમ્બર, 2014ના રોજ શ્રીલંકા સામે રાંચીમાં વનડે (ODI) મેચ રમીને આંતરરાષ્ટ્રીય ક્રિકેટમાં પદાર્પણ કર્યું હતું.
ભારત માટે તેમણે 73 વનડે મેચમાં 42.09ની સરેરાશથી 1,389 રન બનાવ્યા હતા. આ દરમિયાન તેમણે બે સદી અને છ અડધી સદી ફટકારી હતી. બોલિંગમાં પણ યોગદાન આપતાં તેમણે 27 વિકેટ ઝડપી હતી. જ્યારે નવ ટી-20 આંતરરાષ્ટ્રીય મેચમાં તેમના નામે 58 રન નોંધાયેલા છે.
IPLમાં પણ રમી ચૂક્યા છે
કેદાર જાધવ ઇન્ડિયન પ્રીમિયર લીગ (IPL)માં ચેન્નાઈ સુપર કિંગ્સ (CSK) અને સનરાઇઝર્સ હૈદરાબાદ (SRH) જેવી ટીમોનો હિસ્સો રહી ચૂક્યા છે. મહેન્દ્ર સિંહ ધોનીની કેપ્ટનશિપ હેઠળ ચેન્નાઈ તરફથી રમતી વખતે પણ તેમણે ઉપયોગી પ્રદર્શન કર્યું હતું.
તેમણે પોતાની IPL કારકિર્દીમાં 95 મેચ રમીને 1,196 રન બનાવ્યા હતા અને ચાર અડધી સદી ફટકારી હતી.
ક્રિકેટમાંથી નિવૃત્તિ લીધા બાદ કેદાર જાધવ સામાજિક પ્રવૃત્તિઓમાં પણ ભાગ લેતા રહ્યા છે. હવે RSSના વિજયાદશમી ઉત્સવમાં તેમની હાજરી અને ગણવેશમાં સામે આવેલી તસવીરોને કારણે તેઓ ફરી ચર્ચામાં આવ્યા છે.
