SA vs AUS / 10 વર્ષ બાદ ટીમમાં વાપસી કરી, કેન્સરને માત આપી બનાવી જગ્યા; 33 બોલમાં ખાતું ખોલ્યા વિના થયો આઉટ
છેલ્લું અપડેટ : 09 Oct 2026
ઓસ્ટ્રેલિયન ક્રિકેટ ટીમનો 2018નો સાઉથ આફ્રિકા પ્રવાસ બધાને યાદ હશે. આ પ્રવાસમાં જે બન્યું તેનાથી ઓસ્ટ્રેલિયન ક્રિકેટ બદલાઈ ગયું. ઓસ્ટ્રેલિયન ટીમ પર બોલ ટેમ્પરિંગનો આરોપ લાગ્યો. તે પ્રવાસ પછી ઓસ્ટ્રેલિયા હવે આ વર્ષે સાઉથ આફ્રિકાનો પ્રવાસ કરી રહ્યું છે. આ પ્રવાસની પહેલી ટેસ્ટ મેચ માટે ટીમે 10 વર્ષ પછી એક ખેલાડીને તક આપી છે.
આ ખેલાડીનું નામ નિક મેડિસન છે. મેડિસનને 10 વર્ષ પછી ઓસ્ટ્રેલિયન ટીમમાં રમવાની તક મળી, છતાં, તે આ તકનો લાભ ન લઈ શક્યો. તે પોતાનું ખાતું પણ ન ખોલી શક્યો.
સંઘર્ષ પછી આઉટ
ઓસ્ટ્રેલિયન કેપ્ટન પેટ કમિન્સે ટોસ જીતીને પહેલા બેટિંગ કરવાનો નિર્ણય લીધો. ટ્રેવિસ હેડ સાથે મેડિસનને તક મળી. આ પહેલા મેડિસન 2016માં મેલબર્નમાં પાકિસ્તાન સામે પોતાની છેલ્લી ટેસ્ટ મેચ રમી હતી. આ મેચ પહેલા તેણે ઓસ્ટ્રેલિયા માટે ફક્ત ત્રણ ટેસ્ટ મેચ રમી હતી અને તેને ટીમમાંથી બહાર કરવામાં આવ્યો હતો. તેને ટીમમાં પોતાનું સ્થાન પાછું મેળવવા માટે સંઘર્ષ કરવો પડ્યો હતો. આ પ્રવાસ માટે પણ તેની પસંદગી નહતી કરવામાં આવી, પરંતુ જોશ ઈંગ્લિસની ઈજાને કારણે મેડિસનને તક મળી.
મેડિસન પ્રથમ ઈનિંગમાં પોતાની તકનો લાભ લેવામાં નિષ્ફળ ગયો, 33 બોલ રમી અને ખાતું ખોલ્યા વિના પવેલિયન પાછો ફર્યો. તેને માર્કો યાનસન દ્વારા બોલ્ડ કરવામાં આવ્યો. 34 વર્ષીય ખેલાડી માટે હવે બીજી ઈનિંગ મહત્ત્વપૂર્ણ રહેશે.
ફર્સ્ટ-ક્લાસ ક્રિકેટ નથી રમ્યો
મેડિસન 2025થી ફર્સ્ટ-ક્લાસ ક્રિકેટ નથી રમ્યો. તેથી, તેને ઓસ્ટ્રેલિયન ટેસ્ટ ટીમમાં સીધો સમાવેશ કરવો જોખમી હતો. જોકે, સ્થાનિક ક્રિકેટમાં તેની એવરેજ સારી રહી છે. 2018થી 2024 સુધી, તેણે શેફિલ્ડ શીલ્ડમાં 52.37ની એવરેજથી સ્કોર કર્યો હતો. ત્યારબાદ તેને કેન્સર હોવાનું નિદાન થયું. 10 મહિના સુધી આ બીમારી સામે લડ્યા બાદ તે મેદાનમાં પાછો ફર્યો.